တရုတ်အစိုးရက ထိန်းသိမ်းထားသူအားလုံးကို ပြန်လွှတ်ပေးမည်ဟု အခိုင်အမာပြောကြားနေသော်လည်း အနောက်မြောက်ဒေသ ရှန်ကျန်းပြည်နယ်ရှိ ဝီဂါများနှင့် အခြားတူရကီမွတ်စလင်များကို ဆက်လက် ထိန်းသိမ်းထားဆဲဖြစ်ကြောင်း အမေရိကန်ပြည်ထောင်စု အပြည်ပြည်ဆိုင်ရာ ဘာသာရေး လွတ်လပ်ခွင့်ကော်မရှင် (USCIRF) က ထုတ်ပြန်သောအစီရင်ခံစာတွင် ဖော်ပြထားသည်။
“ စက်တင်ဘာလမှာ သြစတြေးလျမဟာဗျူဟာဆိုင်ရာ မူဝါဒအင်စတီကျု့က ၂၀၁၉ နဲ့ ၂၀၂၀ မှာ တည်ဆောက်ခဲ့တဲ့အဆောက်အဦအသစ်တွေအပါအဝင် ဝီဂါဒေသ (ရှင်ကျန်းလို့လဲသိကြပါတယ်) အနှံ့အပြားမှာရှိတဲ့ ထိန်းသိမ်းရေးစခန်း ၃၈၀ ကို ဖော်ထုတ်နိုင်ခဲ့ပါတယ်”
“တရုတ်အစိုးရက ထိန်းသိမ်းထားသူအားလုံးကို ပြန်လွှတ်လို့ဆိုပေမယ့် ရှန်ကျန်းပြည်နယ်ရှိ ဝီဂါတွေနဲ့ အခြားတူရကီမွတ်စလင်တွေကို ဆက်လက် ထိန်းသိမ်းထားဆဲဖြစ်တယ် ”ဟု အစီရင်ခံစာက ဖော်ပြထားသည်။
USCIRF သည် ၂၀၂၀ ပြည့်နှစ်အတွင်းဖြစ်ပေါ်တိုးတက်မှုများကို မှတ်တမ်းတင်ထားသော ၂၀၂၁ ခုနှစ် နှစ်ပတ်လည်အစီရင်ခံစာကို ထုတ်ပြန်ခဲ့သည်။
ယင်း အစီရင်ခံစာတွင် ၂၀၁၇ ခုနှစ်မှစ၍ အာဏာပိုင်များသည် မုတ်ဆိတ်မွှေးအရှည်ထားခြင်း၊ အရက်ကို ငြင်းပယ်ခြင်း သို့မဟုတ်“ ဘာသာရေးအစွန်းရောက်ခြင်း၏လက္ခဏာ” ဟု ယူဆသော အခြားအပြုအမူများ ပြသခြင်းအတွက် မွတ်စလင်သန်းပေါင်းများစွာကို ထိုစခန်းများသို့ ပို့ဆောင်ခဲ့သည်ဟု ဖော်ပြခဲ့သည်။
ရှင်ကျန်းတွင် တရုတ်အစိုးရ၏ ဆက်လက်ပြုလုပ်နေသော အရေးယူမှုများသည် နိုင်ငံတကာဥပဒေအရ လူမျိုးတုံးသတ်ဖြတ်မှုသဘောဆောင်သည့်အတွက် ကျွမ်းကျင်သူများက စိုးရိမ်ပူပန်နေကြသည်။
ဒေသတွင်းရှိ အကျဉ်းထောင်များ၊ အကျဉ်းစခန်းများ၊ စက်ရုံများနှင့် စက်မှုဇုန်များတွင် ဝီဂါများအား အဓမ္မလုပ်အားပေးခိုင်းစေမှုများ ပြုလုပ်နေကြောင်းလည်း အစီရင်ခံစာများက ဖော်ပြခဲ့သည်။
ထို့ပြင် အာဏာပိုင်များသည် ထိုအသိုင်းအဝိုင်း၏ ဘာသာရေး၊ လူမျိုးရေးနှင့် ယဉ်ကျေးမှုဆိုင်ရာ ဝိသေသလက္ခဏာများအတွက် အရေးကြီးသောဗလီများနှင့် ဘုရားကျောင်းများအပါအဝင် ဝီဂါများ၏ ဘာသာရေးဆိုင်ရာ နေရာအများအပြားကို ပိတ်ပစ်ခြင်းနှင့် ဖျက်ဆီးခြင်းများကိုလည်း ဆက်လက်ပြုလုပ်ခဲ့သည်။
အမေရိကန်အစိုးရသို့ အမေရိကန်လူ့အခွင့်အရေးကော်မရှင်၏ နောက်ဆုံးအကြံပြုချက်များအရ အပြည်ပြည်ဆိုင်ရာ ဘာသာရေးလွတ်လပ်ခွင့် အက်ဥပဒေက သတ်မှတ်ထားသည့် ဘာသာရေးလွတ်လပ်ခွင့်ကို စနစ်တကျဆက်လက်ချိုးဖောက်ခြင်းကြောင့် တရုတ်နိုင်ငံအား“ အထူးစိုးရိမ်ဖွယ်ရာရှိသောနိုင်ငံ” (CPC) အဖြစ်ပြန်လည်သတ်မှတ်သည်ဟု ဖော်ပြထားသည်။
“ ဝီဂါလူ့အခွင့်အရေးမူဝါဒအက်ဥပဒေနှင့် တိဘက်မူဝါဒနှင့် ထောက်ပံ့ရေးအက်ဥပဒေကဲ့သို့သော အမေရိကန်၏ လက်ရှိဥပဒေများကို အပြည့်အဝလိုက်နာကျင့်သုံးရန်နှင့် တရုတ်အစိုးရအေဂျင်စီများနှင့် ဘာသာရေး လွတ်လပ်ခွင့်ကို အလွန်အမင်းချိုးဖောက်သူ တာဝန်ရှိသူများအပေါ် ပစ်မှတ်ထားသော ဘဏ္ဍာရေးနှင့် ဗီဇာပိတ်ဆို့မှုများကို ဆက်လက်ချမှတ်ရန်လည်း ၂၀၂၁ ခုနှစ် နှစ်ပတ်လည် အစီရင်ခံစာတွင် အကြံပြုထားသည်။
