ဇန်န၀ါရီ ၁၉
အာဏာပိုင်တို့၏ ဖမ်းဆီးထိန်းသိမ်းခြင်းကို ခံခဲ့ရသည့် ရုရှားအတိုက်အခံခေါင်းဆောင် အလက်ဇီ နာဗယ်ညီက ရုရှားပြည်သူများ လမ်းပေါ်ထွက် ဆန္ဒပြကြရန် ဇန်န၀ါရီ ၁၈ ရက်တွင် တိုက်တွန်းပန်ကြားသွားခဲ့သည်။
ဂျာမနီကနေ ရုရှားသို့ ပြန်ရောက်လာခဲ့သည့် နာဗယ်ညီကို တရားရုံး အမှုစစ်ဆေးစီရင်မှုမတိုင်မီ ရက် ၃၀ ကြာ ထိန်းသိမ်းထားရန်အတွက် တရားသူကြီးတစ်ဦးက ချုပ်မိန့်ပေးခဲ့ပြီးနောက်ပိုင်း နာဗယ်ညီက အထက်ပါအတိုင်း ပန်ကြားမှုကို လုပ်ဆောင်ခဲ့ခြင်း ဖြစ်သည်။
အတိုက်အခံခေါင်းဆောင် နာဗယ်ညီ ပြန်လည် လွတ်မြောက်ရေးအတွက် အနောက်နိုင်ငံများက တောင်းဆိုလျက် ရှိသည်။
တရားရုံး အမိန့်ချမှုမတိုင်မီ နာဗယ်ညီကို ထိန်းသိမ်းထားခြင်း မပြုရန် ကုလသမဂ္ဂနှင့် အနောက်နိုင်ငံများက မော်စကို ကို ပြောထားသလို မော်စကိုအပေါ် ဒဏ်ခတ်ပိတ်ဆို့မှုအသစ်များ ချမှတ်ရန် နိုင်ငံအချို့ကလည်း တောင်းဆိုနေခဲ့ကြသည်။ မော်စကိုဘက်ကမူ ကိုယ့်ကိစ္စ ကိုယ်လုပ်ကြရန် တနင်္လာနေ့တွင် ပြန်လည်တုံ့ပြန်ထားခဲ့သည်။
နာဗယ်ညီသည် ယမန်နှစ် နွေရာသီက အာရုံကြောအဆိပ်တစ်မျိုး မိခဲ့ပြီးနောက် ပထမဆုံးအကြိမ်အဖြစ် ဇန်န၀ါရီ ၁၇ ရက်က ရုရှားသို့ လေယာဥ်ဖြင့် ပြန်လာခဲ့ပြီးနောက် လေဆိပ်မှာပင် အာဏာပိုင်တို့က ၎င်းကို ထိန်းသိမ်းခဲ့ခြင်း ဖြစ်သည်။ ဆိုင်းငံ့ ထောင်ဒဏ်ပြစ်ဒဏ်တစ်ခုနှင့်ပတ်သက်သည့် စည်းကမ်းချက်များကို ချိုးဖောက်မှုအတွက် ၎င်းအား ထိန်းသိမ်းထားရန် ချုပ်မိန့်ပေးခဲ့ခြင်းက ၎င်းအား နှစ်ချီကြာ အကျဥ်းချထားနိုင်သည့် ရှေ့ပြေးနိမိတ်တစ်ခုလည်း ဖြစ်နိုင်သည်။
အဆိုပါ တူညီသော အမှုတွင် အလွဲသုံးစားမှု ဆိုင်ရာ ထောင်ဒဏ် သုံးနှစ်ခွဲ ဆိုင်းငံ့ ပြစ်ဒဏ်တစ်ခုကို လာမည့်လတွင် အမှန်တကယ် ထောင်ဒဏ်ပြစ်ဒဏ်ကျခံရမှုကာလအဖြစ်သို့ ပြောင်းလဲရန် မော်စကို အကျဥ်းဦးစီးဌာနက သက်ဆိုင်ရာ အာဏာပိုင်တို့ထံ တင်ပြထားသည်။ အဆိုပါအမှုသည် အကွက်ဆင်ခံထားရခြင်း ဖြစ်ကြောင်း နာဗယ်ညီဘက်က ပြောထားသလို ၎င်းသည် အခြား သီးခြား အမှုသုံးခုကိုလည်း ရင်ဆိုင်နေရသည်။
ရဲစခန်းတစ်ခုကနေ ထွက်ခဲ့စဥ် နာဗယ်ညီက ၎င်း၏ ထောက်ခံသူများကို ၎င်းတို့ အမှန်တကယ် ကြောက်ရမည့် တစ်ခုတည်းသော အရာက ၎င်းတို့၏ ကိုယ်ပိုင်ကြောက်စိတ်ပင် ဖြစ်ကြောင်း ပြောသွားခဲ့သည်။
“မကြောက်ကြပါနဲ့၊ လမ်းတွေပေါ် ထွက်ကြပါ၊ ကျွန်တော့်အတွက် မထွက်ကြပါနဲ့၊ ခင်ဗျားတို့ ကိုယ်တိုင် အတွက်နဲ့ ခင်ဗျားတို့ရဲ့ အနာဂတ်အတွက် အပြင်ထွက်ကြပါ” လို့ နာဗယ်ညီက တွစ်တာတွင် တင်ခဲ့သည့် ဗီဒီယိုတစ်ခုတွင် ပြောခဲ့သည်။
၎င်းကို ထောက်ခံသူများသည် ယခု စနေနေ့တွင် နိုင်ငံတ၀န်း စည်းဝေးကြရန် စီစဥ်နေပြီး ယခုလကုန်တွင် အင်အား ၁၀,၀၀၀ ခန့်ရှိ လူထုတွေ့ဆုံပွဲတစ်ခုအတွက် လျှောက်လွှာတစ်စောင်ကို မော်စကို အာဏာပိုင်များထံ တင်ပြထားသည်။
တနင်္လာနေ့က ရုရှားတစ်၀န်း နာဗယ်ညီ ထောက်ခံသူများနှင့် ဂျာနယ်လစ် ၇၀ ကျော် ထိန်းသိမ်းခံခဲ့ရကြောင်း စောင့်ကြည့်လေ့လာမှုအဖွဲ့ OVD-Info က ပြောခဲ့သည်။
၎င်းအပေါ် ဆက်ဆံမှုက ဥပဒေနှင့် မညီကြောင်း အသက် ၄၄ နှစ်ရှိ နာဗယ်ညီက ပြောခဲ့ပြီး သမ္မတ ပူတင်သည် ၎င်းအား ကြောက်လန့်တကြားနှင့် ဖယ်ရှားရန် ကြိုးပမ်းနေကြောင်း နာဗယ်ညီက စွပ်စွဲခဲ့သည်။
ရုရှားအစိုးရက တုံ့ပြန်ပြောဆိုခဲ့ခြင်းမရှိသော်လည်း နာဗယ်ညီအနေဖြင့် အမှားလုပ်ထားပါက တရားဥပဒေအရ ရင်ဆိုင်ရလိမ့်မည်ဟု အစောပိုင်းက ပြောထားသည်။
နာဗယ်ညီကို ထောက်ခံသူ ၂၀၀ ခန့်သည် အလွန်အေးသော အပူချိန်အောက်တွင် ရဲစခန်းတစ်ခုရှေ့ လာရောက်စုဝေးခဲ့ကြသည်။
နာဗယ်ညီကို ထိန်းသိမ်းရန် ချုပ်မိန့်ပေးကြောင်း ကြားသိရချိန် ထောက်ခံသူများက “ရှက်စရာပဲ” ၊ “ပူတင် နုတ်ထွက်တော့” ဆိုပြီး အော်ဟစ်ခဲ့ကြသည်။
ရုရှားအစိုးရအပေါ် ဝေဖန်သူ နာဗယ်ညီ ပြီးခဲ့သည့် ဇန်န၀ါရီ ၁၇ ရက် ညနေခင်းက ရုရှားသို့ ပြန်လာခဲ့ချိန် ၎င်းကို လေဆိပ်ရှိ ပတ်စ်ပို့စစ်ဆေးသော နေရာ၌ နှာခေါင်းစည်းတပ် ရဲလေးဦးက ထိန်းသိမ်းခေါ်ဆောင်သွားခဲ့သည်။
