ဇန်နဝါရီ ၁၁ 

ဂျပန်နိုင်ငံ၏ Chugai ဆေးဝါးကုမ္ပဏီက ထုတ်လုပ်သော အဆစ်အမြစ်ရောင် ရောဂါကုဆေးဝါးက ကိုဗစ်-၁၉ လူနာများကို ကုသရာတွင် ထိရောက်မှု ရှိကြောင်းကို တွေ့ရှိရကြောင်း ဗြိတိန်အစိုးရက ပြောသည်။ ထိုဆေးဝါးက သေဆုံးနိုင်ခြေ အန္တရာယ်ကို လျော့ကျစေသလို ဆေးရုံတက်ရောက်ရမှု ရက်ကာလကိုပါ တိုတောင်းစေနိုင်သည်ဟု သိရသည်။ 

Actemra အဖြစ် ရောင်းချသည့် Chugai ၏ tocilizumab ဆေးဝါးသည် ကိုဗစ်-၁၉ ကြောင့် လူနာများ၏ သေဆုံးနိုင်ခြေအလားအလာကို ၂၄ ရာခိုင်နှုန်း လျော့ကျစေနိုင်သလို အထူးကြပ်မတ်ကုသဆောင် (ICU) များ၌ လူနာများ တက်ရောက်ရမှု ကာလကို ခုနစ်ရက်ကနေ ဆယ်ရက်အထိ တိုတောင်းလျော့ကျစေနိုင်ကြောင်း ယူကေ အစိုးရ ပံ့ပိုးသည့် စမ်းသပ်စစ်ဆေးမှုတစ်ခုက တွေ့ရှိထားခဲ့သည်။ 

ယခု စမ်းသပ်ချက် ရလဒ်များက ကပ်ရောဂါအတွက် နည်းလမ်းအဖြေတစ်ခု ရှာဖွေမှုတွင် အဓိကကျသည့် တိုးတက်မှုဖြစ်စဉ်တစ်ခုဖြစ်ကြောင်း ဗြိတိန်ကျန်းမာရေးဝန်ကြီး မတ် ဟန်းကော့ခ်က ပြောသည်။ 

ထို့ပြင် ကုသမှုများက ကိုရိုနာဗိုင်းရပ်စ်ကို အနိုင်ယူတိုက်ဖျက်ရာတွင် အဓိကကျသည့် အခန်းကဏ္ဍကနေ ပါဝင်လိမ့်မည်ဟု ယုံကြည်ကြောင်း ၎င်းက ထုတ်ဖော်ခဲ့သည်။ 

ယူကေတွင် ကိုရိုနာဗိုင်းရပ်စ် ကူးစက်ခံရသူအသစ် တွေ့ရှိမှုသည် ပြီးခဲ့သည့် ရက်များအတွင်း တစ်နေ့လျင် ၅၀,၀၀၀ ဝန်းကျင်အထိ မြင့်တက်ထားခဲ့ပြီး ဆေးရုံများအပေါ် ဝန်ပိစေခဲ့သည်။ အစိုးရသည် နိုင်ငံတစ်ဝန်း ICU များ၌ Actemra ဆေး အသုံးပြုမှုကို တရားဝင် ခွင့်ပြုထားပြီး ထိုဆေးကို ဥရောပတွင် ထုတ်လုပ်ရောင်းချသည့် Chugai ၏ မိခင်ကုမ္ပဏီ Roche နှင့်လည်း ချိတ်ဆက်ညှိနှိုင်းလုပ်ဆောင်သွားမည်ဖြစ်သည်။ 

Actemra ဆေးဝါးသည် ပြင်းထန် အဆုတ်ရောင်ရောဂါ ရှိနေသည့် လူနာများတွင် ကိုယ်ခံအား တုံ့ပြန်မှု ထိန်းညှိရာတွင် ထိရောက်နိုင်ဖွယ် ရှိနေသည်။ ကိုရိုနာဗိုင်းရပ်စ်ကြောင့် အစပြုဖြစ်ပေါ်သည့် ပြင်းထန် အဆုတ်ရောင်ရောဂါ ရှိသည့် လူနာများကို ကုသရန်အတွက် ဂျပန်တွင် ယမန်နှစ် မေလနောက်ပိုင်းကတည်းက လက်တွေ့စမ်းသပ်မှုတစ်ခုကို လုပ်ဆောင်ထားခဲ့သည်။ ထို့ပြင် ကိုဗစ်-၁၉ ကုသဆေး remdesivir နှင့် ပေါင်းစပ်ပြီး Actemra ဆေး၏ ထိရောက်နိုင်စွမ်းနှင့်ပတ်သက်၍လည်း နောက်ထပ် လက်တွေ့စမ်းသပ်ချက်တစ်ခုကို စမ်းသပ်လုပ်ဆောင်နေသည်။ 

အဆိုပါ စမ်းသပ်ချက်များ၏ ရလဒ်များ မကြာမီ ထွက်လာရန် ရှိနေပြီး Chugai အနေဖြင့် ယခုနှစ်အတွင်း ဂျပန်တွင် အတည်ပြုချက် လျှောက်ထားရန် ရည်ရွယ်လျက် ရှိသည်။