နိုဝင်ဘာ ၂၉

တရုတ်တွင် ပြည်တွင်းထုတ် ကိုရိုနာဗိုင်းရပ်စ် ကာကွယ်ဆေးထိုးနှံမှုများ၏ ထိရောက်မှုနှင့် ဘေးကင်းစိတ်ချရမှုပိုင်းအပေါ် မေးခွန်းများ ထွက်ပေါ်နေခြင်းနှင့်အတူ တရုတ်၏ ကာကွယ်ဆေး သံခင်းတမန်ခင်းသည်လည်း ဆုတ်ဆိုင်းမှုတစ်ခုနှင့် ရင်ဆိုင်နေရသည်။ တရုတ်နိုင်ငံအနေဖြင့် ယင်း၏ စမ်းသပ်ကာကွယ်ဆေးများ လက်တွေ့စမ်းသပ်မှု အဆင့်တွင်သာ ရှိနေသော်ငြား ကာကွယ်ဆေးကို ကျယ်ကျယ်ပြန့်ပြန့် စတင် မိတ်ဆက်အသုံးပြုမှုများ အရှိန်မြှင့်လုပ်ထားခဲ့သည်။ 

ပေကျင်းသည် COVID-19 ကာကွယ်ဆေးတစ်ခု ထုတ်လုပ်ရေး ကမ္ဘာလုံးဆိုင်ရာ ပြိုင်ပွဲကို တစ်ချိန်က ဦးဆောင်ထားခဲ့သော်လည်း ယခုအခါ အမေရိကန်နှင့် ဥရောပ ဆေးဝါးထုတ် ကုမ္ပဏီများက ယင်းတို့၏ ကာကွယ်ဆေးများကို စျေးကွက်ထဲသို့ ယူဆောင်ဖြန့်ချိရန် နီးစပ်နေပြီ ဖြစ်သည်။ 

ကနဦး လက်တွေ့စမ်းသပ်ချက်များအပေါ် အခြေပြုပြီး တရုတ်ဆေးဝါးထုတ်ကုမ္ပဏီ ဆိုင်နိုဗက် ဘိုင်အိုတက် (Sinovac Biotech) ၏ စမ်းသပ်ကာကွယ်ဆေး၏ ထိရောက်နိုင်စွမ်းနှင့်ပတ်သက်သည့် လေ့လာချက်တစ်ရပ်ကို နိုဝင်ဘာ ၁၇ ရက်က ဗြိတိန်ဆေးပညာဂျာနယ် သည် လန်းဆက် (The Lancet) က ဖော်ပြခဲ့သည်။ တရုတ်ကုမ္ပဏီ၏ ကာကွယ်ဆေးသည် ပြန်လည်သက်သာလာသော ကိုရိုနာဗိုင်းရပ်စ် လူနာများတွင် ပြသသည့် ပဋိပစ္စည်းများနှင့် ယှဉ်ပါက ပိုမို နိမ့်ကျသော လယ်ဗယ်များရှိသည့် ရောဂါကာကွယ်သော ပဋိပစ္စည်းများကို ထုတ်လုပ်ဖြစ်ပေါ်စေခဲ့သည်ကို တွေ့ရှိခဲ့သည်။ ထိရောက်မှုက အသင့်အတင့်သာ ဖြစ်မည်ဟု စိစစ်တွက်ချက်ခဲ့ရသည်။ 

ယှဉ်ကြည့်ပါက အမေရိကန် အခြေစိုက် ဖိုက်ဇာ (Pfizer) နှင့် မိုဒါးနား (Moderna) တို့၏ ကာကွယ်ဆေးများသည် ၉၀ ရာခိုင်နှုန်းကျော် ထိရောက်မှု ရှိသည်ကို တွေ့ရှိထားပြီး ဗြိတိန်၏ အက်စထရာ ဇန်နကာ (AstraZeneca) ၏ ကာကွယ်ဆေးသည်လည်း အလုံးစုံ ထိရောက်နိုင်စွမ်း ၇၀ ရာခိုင်နှုန်း ရှိသည်ကို တွေ့ရှိထားခဲ့သည်။ အမေရိကန် ဆေးဝါးကုမ္ပဏီနှစ်ခုစလုံးသည် ယင်းတို့၏ ထုတ်ကုန်များကို ထုတ်လုပ်ရန် နောက်ဆုံးပေါ် ခေတ်အမီဆုံး နည်းပညာကို အသုံးပြုထားခဲ့သည်။ 

ဆိုင်နိုဗက်သည် ယင်း၏ ကာကွယ်ဆေးကို ထုတ်လုပ်ရန် နာမကျန်းမှုကို ဖြစ်စေခြင်း မရှိသည့် ဗိုင်းရပ်စ်အသေတစ်ခုကို အသုံးပြုခဲ့သည်။ ယင်းသည် တုပ်ကွေးကဲ့သို့ ရောဂါဖြစ်ပွားစေသော ပစ္စည်းများကို တိုက်ဖျက်ရာတွင် ကာလကြာ အသုံးပြုခဲ့သည့် နည်းလမ်းတစ်ခု ဖြစ်သည်။ ပိုမို အားကောင်းခိုင်မာသော ရလဒ်များကို မျှော်လင့်ထားခဲ့သည့်အတွက်ကြောင့် ယခုကဲ့သို့ အသင့်အတင့် အောင်မြင်မှု ရသည်ဆိုသည့် သတင်းက ဂယက်ရိုက်မှုများကို ဖြစ်စေခဲ့သည်။ 

ပဋိပစ္စည်းများ ရှိမှုနှင့် ဘေးကင်းစိတ်ချရမှု ပြဿနာ မတွေ့ရဟု The Lancet လေ့လာချက်ရှိ အဖွဲ့က အတည်ပြုခဲ့ရာ ယင်းက လက်တွေ့စမ်းသပ်ချက်များ ဆက်လုပ်ရန် လုံလောက်သည့် အထောက်အထား ဖြစ်သည်။ နောက်ဆုံး အပြီးသတ် အဆင့် စမ်းသပ်မှုများသည် ချောချောမွေ့မွေ့ဖြင့် ဆက်သွားနေကြောင်း ဆိုင်နိုဗက်၏ စီနီယာညွန်ကြားရေးမှူး မုန်ဝေနင်းက နိုဝင်ဘာ ၂၀ ရက် အွန်လိုင်းကွန်းဖရင့်တစ်ခုတွင် ပြောခဲ့သည်။ 

“မှန်းကြည့်ရသလောက်တော့ လာမယ့်လကျရင် ကျွန်တော်တို့ ဒေတာအချက်အလက်တွေ ရနိုင်ပါလိမ့်မယ်” ဟု ၎င်းက ပြောသည်။ 

ကမ္ဘာတဝန်း စမ်းသပ်ကာကွယ်ဆေး ၁၁ ခု သည် ယခုအခါ နောက်ဆုံးအဆင့် လက်တွေ့စမ်းသပ်မှုများတွင် ရှိနေပြီး ယင်းတို့အနက် လေးခုသည် တရုတ်ကာကွယ်ဆေးများဖြစ်သည်။ တရုတ်သည် ကာကွယ်ဆေး ထုတ်လုပ်ဖော်စပ်မှုကို ဇန်နဝါရီလက အလွန့်အလွန် စိတ်လှုပ်ရှားမှုတစ်ခုနှင့်အတူ စတင်ခဲ့ပြီး အဓိကအားဖြင့် ဆိုင်နိုဗက်နှင့် နိုင်ငံပိုင် ဆေးဝါးကုမ္ပဏီကြီး ဆိုင်နိုဖမ်း ဂရု(ပ်) ကနေတဆင့် လုပ်ဆောင်ခဲ့သည်။ 

နောက်ဆုံး အဆင့် စမ်းသပ်မှုများ လုပ်လက်စ တန်းလန်းတွင်သာ ဆက်ရှိနေခဲ့သော်လည်း ကုမ္ပဏီနှစ်ခုစလုံးသည် ပြည်တွင်း၌ ကာကွယ်ဆေးထိုးနှံမှုများကို အရှိန်မြှင့်လုပ်ထားခဲ့သည်။ 

နိုဝင်ဘာ ၂၆ ရက်က ပေကျင်းရှိ ဆိုင်နိုဖမ်း သုတေသနဓာတ်ခွဲခန်းတစ်ခုတွင် ကာကွယ်ဆေးထိုးနှံမှုကို ခံယူရန် လူများ တန်းစီ စောင့်ဆိုင်းခဲ့ကြသည်။ ယင်းသည် လက်တွေ့စမ်းသပ်မှု အပြီးသတ်ချိန် မတိုင်မီ ချဲ့ထွင်ထားခဲ့သော ပရိုဂရမ်တစ်ခုဖြစ်သည်။ 

လူ တစ်သန်းနီးပါး ကာကွယ်ဆေးထိုးနှံခံပြီးပြီ ဖြစ်သည်ဟု ကုမ္ပဏီက နိုဝင်ဘာ ၁၈ ရက်တွင် ပြောခဲ့ရာ ယင်းက စက်တင်ဘာလက လူပေါင်း ၃၅၀,၀၀၀ ကနေ မြင့်တက်လာခဲ့ခြင်း ဖြစ်သည်။ နိုင်ငံပိုင် ကုမ္ပဏီများ၏ ဝန်ထမ်းများကဲ့သို့သော လူပုဂ္ဂိုလ်များ၏ ကာကွယ်ဆေးထိုးနှံမှုက ပြီးခဲ့သည့် နှစ်လအတွင်း သုံးဆနီးပါး မြင့်တက်ခဲ့သည်။ 

ထိုကဲ့သို့ ဝန်ထမ်းများ စက်တင်ဘာလတွင် ကာကွယ်ဆေးထိုးနှံခံခဲ့သည်ဟု သတင်းများ ထွက်ပေါ်ခဲ့သော်လည်း ဆိုင်နိုဖမ်းသည် ၎င်းတို့ကို ဆက်သွယ်ရန် ကြိုးပမ်းမှု မလုပ်ခဲ့ပေ။ 

ယင်းက ထုတ်လုပ်ဆဲသာ ရှိသေးသည့် ကာကွယ်ဆေးတစ်ခုကို ထိုးနှံခံသူများ၏ ကျန်းမာရေးကို စစ်ဆေးကြည့်ရှုရန် အားထုတ်ကြိုးပမ်းမှုများ လုပ်ရခြင်းနှင့်ပတ်သက်၍ မေးခွန်းများကို ထွက်ပေါ်စေခဲ့သည်။ ပုံမှန်အားဖြင့် ယင်းကဲ့သို့ ဆက်သွယ်မှုက ကာကွယ်ဆေးထိုးပြီးနောက် မှန်မှန်ကန်ကန် ဖြစ်ပေါ်ရမည်ဖြစ်သလို နောက်ပိုင်း ခြောက်လကနေ တစ်နှစ်အထိ ဆက်သွယ်မှုများ လုပ်ရမည်ဖြစ်သည်။ 

“ကာကွယ်ဆေးထိုးသူ တစ်သန်းနား ကပ်လာတဲ့နောက်မှာ ဆိုးကျိုးဖြစ်စေတဲ့ တုံ့ပြန်မှု တစ်ခုတောင်မှ မရှိခဲ့ပါဘူး” ဟု ဆိုင်နိုဖမ်း၏ ဥက္ကဌ လျိုကျင်ကျန်းက နိုဝင်ဘာ ၁၈ ရက်တွင် ထုတ်ပြန်ပြောဆိုခဲ့သည်။ 

ကိုရိုနာဗိုင်းရပ်စ် ကာကွယ်ဆေး ထုတ်လုပ်မှုသည် ကမ္ဘာတဝန်း အကြိတ်အနယ် ဆက်လက်ဖြစ်ပေါ်နေသည်။ ဥရောပနှင့် အမေရိကန် ဆေးဝါး ကုမ္ပဏီများသည် လုပ်ငန်းစဉ်နှင့်ပတ်သက်၍ တက်ကြွထက်သန်စွာ ပွင့်လင်းမြင်သာမှု ထုတ်ဖော်ထားသလို လက်တွေ့စမ်းသပ်ချက် ဒေတာများကို ထုတ်ဖော်ကာ ဘေးထွက်ဆိုးကျိုးများကို အသိပေးထားခဲ့သည်။ 

ဖိုက်ဇာသည် နိုဝင်ဘာ ၂၀ ရက်က အမေရိကန် အစားအစာနှင့် ဆေးဝါး ကွပ်ကဲမှုအဖွဲ့ထံမှ အရေးပေါ် အတည်ပြုချက်ရရန် လျှောက်ထားခဲ့ပြီးဖြစ်ပြီး ကာကွယ်ဆေးထိုးနှံမှုများသည် အဆောလျင်ဆုံး ဒီဇင်ဘာ ၁၁ ရက်တွင် စတင်သွားဖွယ် ရှိနေသည်။ 

ဆိုင်နိုဖမ်းသည် ယင်း၏ ကာကွယ်ဆေးကို ရောင်းချခွင့်အတွက် နိုဝင်ဘာ ၂၅ ရက်က တရုတ် အမျိုးသားဆေးဝါးအဖွဲ့အစည်းထံ လျှောက်ထားခဲ့ကြောင်း နိုင်ငံပိုင် ဆင်ဟွာ သတင်းအေဂျင်စီက ဖော်ပြသည်။ အသေးစိတ် အချက်အလက်များကို မသိရသော်လည်း ဆိုင်နိုဖမ်းသည် ဆေးကို အရေးပေါ် ပေးခြင်းကနေ အများကို ရောင်းချရန် ပြင်ဆင်မှုများဆီ စတင် ပြောင်းရွှေ့လုပ်ဆောင်သွားနိုင်သည်။ 

တရုတ်ကုမ္ပဏီသုံးခုဖြစ်သော ဆိုင်နိုဗက် ၊ ဆိုင်နိုဖမ်းနှင့် ကင်ဆိုင်နိုင် ဘိုင်အို (CanSinoBio) တို့သည် အင်ဒိုနီးရှားနှင့် ဘရာဇီး အပါအဝင် အနည်းဆုံး နိုင်ငံ ၁၃ နိုင်ငံတွင် နောက်ဆုံးအဆင့် လက်တွေ့စမ်းသပ်မှုများကို လုပ်ဆောင်နေသည်။ စမ်းသပ်ကာကွယ်ဆေးများ အောင်မြင်ပါက အဆိုပါ နိုင်ငံများသည် ဦးစားပေးနေရာတွင် ရှိနေမည်ဖြစ်သည်။ 

ထို ဦးစားပေး ကာကွယ်ဆေး ဖြည့်ဆည်းထောက်ပံ့မှု အစီအစဉ်သည် ဖွံ့ဖြိုးဆဲ ကမ္ဘာတွင် တရုတ်၏ သြဇာကို ချဲ့ထွင်ရန် သမ္မတ ရှီကျင့်ဖျင်၏ ရည်မှန်းချက် တစ်စိတ်တစ်ဒေသ ဖြစ်သည်။ သို့သော် လုံးလုံးလျားလျား ကာကွယ်ဆေးအသစ်များကို အလျင်အမြန် ထုတ်လုပ်မှုက အန္တရာယ်များသော အားထုတ်မှုဖြစ်နေပြီး တရုတ်အနေဖြင့် ကိုရိုနာဗိုင်းရပ်စ် ကာကွယ်ဆေး ထုတ်လုပ်မှုတွင် ဦးဆောင်မှုနေရာကို ပြန်လည် ရယူနိုင်မည်လားဆိုသည်ကို ဆက်လက်စောင့်ကြည့်ရန် လိုဦးမည်ဖြစ်ပေသည်။