နိုဝင်ဘာ ၁၆
ဗင်နီဇွဲလားအစိုးရက ရုရှားနိုင်ငံထုတ် COVID-19 ကာကွယ်ဆေးဖြစ်တဲ့ Sputnik V ကို ဆေးပမာဏ ၁၀ သန်းဝယ်ယူဖို့ သဘောတူလိုက်ပြီလို့ သမ္မတ နီကိုးလက်စ် မာဒူရိုက နိုဝင်ဘာ ၁၅ ရက် တနင်္ဂနွေနေ့မှာ ပြောလိုက်ပါတယ်။
ဗင်နီဇွဲလားသမ္မတ မာဒူရိုက “၂၀၂၁ ခုနှစ် ပထမ သုံးလပတ်မှာ ကာကွယ်ဆေးရတော့မှာပါ။ ဇန်နဝါရီ၊ ဖေဖော်ဝါရီ၊ မတ်၊ ဧပြီ ဒါမှမဟုတ် မေလ အတွင်းမှာ COVID-19 ထိုးဆေးပမာဏ အနည်းဆုံး ၁၀ သန်း ရနိုင်မယ်လို့ မျှော်လင့်ထားပါတယ်။ ဗင်နီဇွဲလားက ဓာတ်ခွဲခန်းတွေမှာလည်း ရုရှားကာကွယ်ဆေးတွေကို ထုတ်လုပ်သွားမှာပါ” လို့ ရုပ်မြင်သံကြားမိန့်ခွန်းမှာ ပြောဆိုခဲ့တာဖြစ်ပါတယ်။
ဩဂုတ်လတုန်းက ရုရှားဟာ COVID-19 ကာကွယ်ဆေး ပထမဆုံးမှတ်ပုံတင်တဲ့နိုင်ငံဖြစ်ခဲ့ပါတယ်။
၁၉၅၇ ခုနှစ်က အာကာသထဲလွှတ်တင်ခဲ့တဲ့ ရုရှားရဲ့ ကမ္ဘာ့ပထမဆုံးဂြိုဟ်တုကို အစွဲပြုပြီး ကာကွယ်ဆေးအမည်ကို Sputnik V (စပတ်နစ်ခ် ဖိုက်) လို့အမည်ပေးခဲ့ပါတယ်။
ဒါပေမယ့် ကာကွယ်ဆေးထုတ်ပြန်ကြေညာချက်နဲ့ပတ်သက်ပြီး နိုင်ငံတကာအသိုက်အဝန်းရဲ့ ယုံမှားသံသယဖြစ်မှုကိုလည်း ကြုံတွေ့ခဲ့ရပါတယ်။
အမေရိကန်ဆေးကုမ္ပဏီ ဖိုက်ဇာ (Pfizer) နဲ့ ဂျာမန်ဇီဝနည်းပညာကုမ္ပဏီ ဘိုင်ရွန်တက် (BioNTech) တို့ပူးပေါင်းထုတ်လုပ်တဲ့ ကာကွယ်ဆေးရဲ့ အဆင့် ၃ စမ်းသပ်မှုက ၉၀ ရာခိုင်နှုန်းထိရောက်တယ်လို့ ထုတ်ပြန်ပြီး နှစ်ရက်အကြာမှာပဲ ရုရှားရဲ့ COVID-19 ကာကွယ်ဆေးကလည်း ၉၂ ရာခိုင်နှုန်း ထိရောက်မှုရှိတယ်လို့ ဆေးတီထွင်သူတွေက ထုတ်ပြန်ခဲ့ပါတယ်။
အောက်တိုဘာလအစောပိုင်းက Sputnik V ကိုဗစ်ကာကွယ်ဆေး လက်တွေ့စမ်းသပ်မှုလုပ်ဆောင်မှုမှာ သမ္မတမာဒူရိုရဲ့သား နီကိုးလက်စ်မာဒူရိုဂဲရာ အပါအဝင် ဗင်နီဇွဲလားက စေတနာ့ဝန်ထမ်း ၂ ၀၀၀ ခန့်လည်း ပါဝင်ခဲ့ကြပါတယ်။
ဗင်နီဇွဲလားမှာ ကပ်ရောဂါစတင်ဖြစ်ပွားတဲ့ မတ်လက စပြီး ကိုရိုနာဗိုင်းရပ်စ်ကူးစက်ခံရသူ ၉၆ ၉၃၃ ဦးနဲ့ သေဆုံးသူ ၈၄၈ ဦးရှိပါတယ်။
ဒါပေမယ့် အတိုက်အခံအဖွဲ့တွေနဲ့ အစိုးရမဟုတ်တဲ့အဖွဲ့အစည်းတွေက အဆိုပါကိန်းဂဏန်းတွေအပေါ် သံသယဖြစ်ခဲ့ပြီး ရောဂါကူးစက်ခံရသူနဲ့ သေဆုံးသူအရေအတွက်ဟာ တရားဝင်ထုတ်ပြန်ချက်တွေထက် ပိုမိုများပြားနိုင်တယ်လို့ ဝေဖန်ပြောဆိုခဲ့ပါတယ်။
