အတိုက်အခံပါတီ NLD ဥက္ကဋ္ဌ ဒေါ်အောင်ဆန်းစုကြည်က ပါတီမှ ရွေးကောက်ခံအမတ်များနှင့် နိုဝင်ဘာ ၂၈ရက်တွင် ရန်ကုန်မြို့ တော်ဝင်နှင်းဆီခန်းမတွင် တွေ့ဆုံမည်ဖြစ်သည်။

NLD ဗဟိုအလုပ်အမှုဆောင်အဖွဲ့၏ နိုဝင်ဘာ ၁၆ ရက်က ထုတ်ပြန်ချက်တွင် ဥက္ကဌဒေါ်အောင်ဆန်းစုကြည်က တိုင်းဒေသကြီး သုံးခုနှင့် ပြည်နယ်တစ်ခုမှ ရွေးကောက်ခံအမတ်များနှင့် တွေ့ဆုံရန်ရှိကြောင်း ဖော်ပြထားသည်။

ယခု တွေ့ဆုံအစည်းအဝေးသည် နိုဝင်ဘာ ၈ ရက် ရွေးကောက်ပွဲတွင် တောင်ပြိုကမ်းပြိုအနိုင်ရပြီးနောက် NLD က ပထမဆုံးကျင်းပသည့် အထူးအစည်းအဝေးတစ်ရပ်ဖြစ်ပြီး ၂၀၁၆ ခုနှစ် ဇန်နဝါရီ ၃၀ တွင် လက်ရှိလွှတ်တော်သက်တမ်းကုန်ပြီးနောက် လွှတ်တော်ထဲ မဝင်ရသေးမီ ရွေးကောက်ခံလွှတ်တော်အမတ်များအဖြစ် တာဝန်ထမ်းဆောင်ရမည့် ပါတီဝင်များအတွက် မူဝါဒလုပ်ငန်းစဉ်ကြမ်းအား ချမှတ်ရန် ဖြစ်နိုင်သည်။

ဒေါ်အောင်ဆန်းစုကြည်ကိုယ်တိုင်လည်း လာမည့်လွှတ်တော်သက်တမ်းအတွက် ပြည်သူ့လွှတ်တော်အမတ်အဖြစ် ပြန်လည်ရွေးကောက်ခံရပြီးဖြစ်သည်။

လာမည့်လွှတ်တော်သုံးရပ်လုံး အမတ်ဦးရေ စုစုပေါင်း ၁၁၃၉ ဦးတွင် NLD ပါတီက ၇၇ ဒသမ ၃ ရာခိုင်နှုန်းဖြင့် အမတ်နေရာ ၈၈၀ နေရာ အနိုင်ရခဲ့သည်။ ပြည်သူ့လွှတ်တော်တွင် ၇၉ ရာခိုင်နှုန်းဖြင့် အမတ်နေရာ ၂၅၄ နေရာ၊ အမျိုးသားလွှတ်တော်တွင် ၈၀ ရာခိုင်နှုန်းဖြင့် အမတ် ၁၃၅ ဦးနှင့် တိုင်းဒေသကြီးနှင့် ပြည်နယ်လွှတ်တော်တွင် ၇၅ ဒသမ ၇ ရာခိုင်နှုန်းဖြင့် ၄၇၄ ဦး အသီးသီး အနိုင်ရခဲ့သည်။

ပြည်သူလွှတ်တော်နှင့် အမျိုးသားလွှတ်တော်နှစ်ရပ်ပေါင်း ပြည်ထောင်စုလွှတ်တော်တွင် NLD က ၈၀ ရာခိုင်နှုန်းဖြင့် အမတ်နေရာ ၃၈၉ ဦးအနိုင်ရခဲ့ခြင်းဖြစ်ကာ ဖွဲ့စည်းပုံအရ အစိုးရသစ်တစ်ရပ်အား လွတ်လွတ်ကျွတ်ကျွတ် ဖွဲ့နိုင်ပြီဖြစ်သည်။

ဖွဲ့စည်းပုံအရမူ သားနှစ်ဦး နိုင်ငံခြားသားများဖြစ်နေခြင်းအတွက် အနိုင်ရပါတီ ဥက္ကဌဖြစ်ပေမယ့် ဒေါ်အောင်ဆန်းစုကြည်အနေဖြင့် သမ္မတဖြစ်ပိုင်ခွင့်မရှိပေ။

အစိုးရသစ်ဖွဲ့စည်းနိုင်၍ သမ္မတင်မြှောက်ခွင့်ရရှိထားပြီဖြစ်သော်လည်း NLD က လက်ရှိအထိ ရွေးချယ်ထားသည့် သမ္မတအား ထုတ်ဖော်ပြောကြားခြင်းမရှိသေးပေ။

Ref: Xinhua