အောက်တိုဘာ ၂၀ ၊ ၂၀၂၀
ရှမ်းပြည်နယ် မြောက်ပိုင်း၊ ကျောက်မဲမြို့နယ် တောင်ပိုင်းဒေသရှိ ရှမ်းပြည်ပြန်လည် ထူထောင်ရေးကောင်စီ (RCSS/SSA) တပ်စခန်းများကို တပ်မတော်က တိုက်ခိုက်ရာတွင် လက်နက်ကြီးများဖြင့် ရမ်းသမ်းပစ်ခတ်ခြင်း၊ ဒေသခံများအပေါ် လူ့အခွင့်အရေးချိုးဖောက်ခြင်းများ ရှိသည်ဟု ရှမ်းလူ့အခွင့်အရေးမဏ္ဍိုင်က အောက်တိုဘာလ ၁၉ ရက်တွင် သတင်းထုတ်ပြန်ထားသည်။
ကျောက်မဲအခြေစိုက် စစ်ဆင်ရေး ကွပ်ကဲမှုဌာနချုပ် - ၁ (စကခ - ၁) နှင့် အခြား ပူးပေါင်းအင်အား ၁၀၀၀ ကျော်တို့ နယ်မြေရှင်းလင်းရေး အပြင် ရဟတ်ယာဉ်အသုံးပြု စစ်ကူပေးမှုကြောင့် ဒေသခံ ၄၅၂၉ ဦး နေအိမ်များမှ စွန့်ခွာရကြောင်း စာမျက်နှာ ၁၇ မျက်နှာပါ “ရှမ်းလူ့အခွင့်အရေးမဏ္ဍိုင်မှ နောက်ဆုံးရ လူ့အခွင့်အရေး ချိုးဖောက်မှု သတင်းထုတ်ပြန်ချက်” တွင် အသေးစိတ် မှတ်တမ်းတင်ထားသည်ကို တွေ့ရသည်။
ယင်းသတင်း ထုတ်ပြန်ချက်တွင် စက်တင်ဘာလ ၃၀ မှ အောက်တိုဘာလ ၁၀ ရက်နေ့အထိ တိုက်ပွဲ၊ တပ်ချထားမှု၊ ဒဏ်ရာရရှိမှု၊ စစ်ဘေးရှောင်ဦးရေ၊ လူ့အခွင့်အရေး ချိုးဖောက်မှုများကို ဖော်ပြထားသည်။
လူ့အခွင့်အရေး ချိုးဖောက်ခံရမှုအနေဖြင့် ခန့်ခဲကျေးရွာတွင် ပစ်ခတ်မှုကြောင့် အသက် ၄၅ နှစ်အရွယ် ရွာသားတစ်ဦး အပြင်းအထန် ဒဏ်ရာရမှု၊ ခန့်ခဲကျေးရွာနှင့် နမ့်မတ်ဟင်ကျေးရွာတွင် ပစ္စည်းလုယက်ခံရမှု၊ နမ့်မတ်ဟင် ကျေးရွာတွင် ရွာသားနှစ်ဦး အဖမ်းခံရမှု၊ နားပုံကျေးရွာမှ အသက် ၁၉ နှစ်အရွယ် ရွာသားတစ်ဦး နှိပ်စက်ခံရပြီး ပျောက်ဆုံးနေမှုတို့ ပါဝင်သည်။
RCSS/SSA က CNA စာချုပ် သဘောတူညီချက်အရ သတ်မှတ်နယ်မြေကို ကျော်လွန် လှုပ်ရှားသောကြောင့် တိုက်ပွဲဖြစ်ရသည်ဟု တပ်မတော်ဘက်က ပြောပြီး RCSS/SSA ဘက်ကလည်း CNA စာချုပ်တွင် သဘောတူထား သည့် သတ်မှတ်နယ်မြေ မရှိဟု တုံ့ပြန်ထားသည်။
ရွာသူရွာသားများ အိမ်ပြန်နိုင်ရေး ကျောက်မဲတောင်ပိုင်းဒေသမှ အစိုးရတပ်များ အားလုံး ချက်ချင်း ရုတ်သိမ်းပေးရန်၊ စစ်ဆင်ရေးများ အဆုံးသတ်ရေးနှင့် လူ့အခွင့်အရေး ချိုးဖောက်မှုများ ရပ်တန့်ရေး နိုင်ငံတကာ အသိုင်း အဝိုင်းကလည်း ဖိအားပေးရန် ရှမ်းလူ့အခွင့်အရေးမဏ္ဍိုင်အဖွဲ့က တောင်းဆိုတိုက်တွန်းထားသည်။
