အောက်တိုဘာ ၆ ၊ ၂၀၂၀
ညမထွက်ရအမိန့်ထုတ်ပြန်ထားသော ရခိုင်ပြည်နယ် မင်းပြားမြို့တွင် လုံခြုံရေးတပ်ဖွဲ့ဝင်များက ‘ခြောက်လှန့်ပစ်ခတ်’ ၍ လူသုံးဦးသေဆုံးပြီး ရခိုင့်တပ်အေအေနှင့်ဆက်သွယ်သည်ဟူသော သံသယဖြင့် လူသုံးဦးကို ဖမ်းဆီးထားကြောင်း တပ်မတော်က အင်္ဂါနေ့က ထုတ်ပြန်သည်။
အောက်တိုဘာ ၅ ရက်ည ၁၀ နာရီ ၄၅ မိနစ်ခန့်တွင် ဖြစ်ပွားခဲ့သည်ဆိုသော ပစ်ခတ်မှုတွင် " စမ္ဘလေချောင်းကူး ဦးစိုးတင့်တံတားသို့ရောက်ရှိစဉ် ချောင်းအတိုင်း မြောက်မှတောင်သို့ စက်လှေ နှစ်စီး ဖြတ်သန်းမောင်း နှင်သွား သည်ကိုတွေ့ရှိရသဖြင့် ရပ်တန့်ရန်အော်ဟစ်ပြောဆိုသော်လည်း ရပ်တန့်မှုမရှိဘဲ ဆက်လက်မောင်းနှင်ထွက်ပြေးရာ" လုံခြုံရေးတပ်ဖွဲ့က သေနတ်သုံးချက်မိုးပေါ်သို့ပစ်ဖောက်ကာ ရပ်တန့်ခိုင်းခဲ့သည်ဟုဆိုသည်။
သို့သော် " ဆက်လက်မောင်းနှင်ထွက်ပြေးသွားသဖြင့် တံတားနှင့်မီတာ ၅၀ ခန့်အကွာသို့အရောက် ခြောက်လှန့်ပစ်ခတ်ဖမ်းဆီးခဲ့ရသည်။" ဟု ပါရှိသည်။
မင်းပြားမြို့နယ်အပါအဝင် ရခိုင်ပြည်နယ်မြောက်ပိုင်းမှ မြို့နယ်များတွင် ရခိုင့်တပ်အေအေနှင့် တပ်မတော်တို့၏ တိုက်ပွဲများ စတင် ပြင်းထန်လာချိန်တည်းက ည ၉ နာရီမှ နံနက် ၄ နာရီအတွင်း ညမထွက်ရအမိန့်ကို အစိုးရက ထုတ်ပြန်ထားသည်။
သေဆုံးသွားသူများမှာ အရှေ့မှမောင်းနှင်လာသော စက်လှေပေါ်မှဖြစ်ပြီး ရခိုင်မြောက်ပိုင်း မွတ်ဆလင်များကို အာဏာပိုင်များက ရည်ညွှန်းလေ့ရှိသည့် " ဘင်္ဂါလီအမျိုးသား" များဖြစ်သည်ဟု တပ်မတော်ထုတ်ပြန်ချက်တွင် ပါရှိသည်။ သို့သော် ၎င်းတို့၏နေရပ်စိစစ်ဆဲဟုပါရှိသည်။
အနောက်မှလိုက်ပါလာသော စက်လှေပေါ်မှ လူသုံးဦးကို ဖမ်းဆီးထားရာ မင်းပြားမြို့ ဦးစိုးတင့်ရပ်ကွက်နေ မောင်ကြီး(၃၀) နှစ် ၊ ကျော်မင်းစိုး(၂၃) နှစ်၊ မောင်မောင်ဦး(၄၃) နှစ် တို့ဖြစ်သည်ဟု ဆိုသည်။
စက်လှေနှစ်စီးလုံးပေါ်မှ သိမ်းဆည်းရမိသော ပစ္စည်းများတွင် လက်နက်ဟူ၍ အရိုးအသွား ၁၀ လက်မခန့်ရှိ ဓါးတစ်ချောင်းနှင့် အရိုးအသွား သုံးပေခန့်ရှိ ဓါးရှည် နှစ်ချောင်းနှင့် လေးခွနှစ်လက်သာဖြစ်သည်။
" ဖမ်းဆီးရမိသူများ၏ တယ်လီဖုန်းများအား အကြမ်းဖက်သောင်းကျန်းသူများနှင့် ဆက်သွယ်မှုရှိ/မရှိ စိစစ်ဆောင်ရွက်လျက်ရှိပြီး" ဟုလည်း ထုတ်ပြန်ချက်တွင် ပါရှိသည်။
သို့သော် ဖမ်းဆီးထားသူများမှာ ဖားသတ်ရန်သွားသူများဖြစ်ပြီး သေဆုံးသွားသူများနှင့် သက်ဆိုင်မှုမရှိဟု ဖမ်းဆီးခံခဲ့ရသူ မောင်ကျော်မင်းစိုး၏ ဇနီးဖြစ်သူ မမချေက မဇ္ဈိမသို့ ပြောသည်။
“ဖားသတ်ဖို့သွားကြတာပါ။ ၆ နာရီလောက်က ထွက်သွားကြတယ်။ ၁၀ နာရီကျော်လောက်မှာ အဖမ်းခံရတာ။ နေ့တိုင်းသွားနေကြတာ။ သုံးယောက်လုံးအတူတူသွားကြတာ။ နေ့တိုင်းကတော့ တခြားတစ်ဖက်ကို သွားနေ ကြတာ။ အဲဒီနေ့ကတော့ ရွာနောက်ဖက်ချောင်းက မင်းပြားချောင်းလေးထဲကို ဝင်သွားကြတာ။ မူဆလင်တွေနဲ့တော့ မဆိုင်ဘူး။ ကိုယ့်ဟာနဲ့ကိုယ်သွားကြတာပါ။”
ရဲဘက်ကလည်း ထုတ်ဖော်ပြောဆိုရန် ငြင်းဆန်သဖြင့် မည်သည့်နေရာတွင် ဖမ်းဆီးချုပ်နှောင်ထားသည်ကိုလည်း မိသားစုအနေဖြင့် မသိရဘဲ ဖြစ်နေသည်။
