စက်တင်ဘာ ၂၈၊ ၂၀၂၀

ထိုင်းနိုင်ငံ၊ တာ့ခ်ခရိုင်၊ မဲဆောက်တွင် မြန်မာနိုင်ငံသို့ တရားမဝင် ပို့ဆောင်မည့် တရုတ်နိုင်ငံလုပ် နှာခေါင်းစည်း အထုပ် ၇၀၀၀၀ ကို ထိုင်းအာဏာပိုင်များက သိမ်းဆည်းရမိခဲ့သည်။

မှောင်ခိုကူးကြောင်း သံသယဖြစ်ဖွယ် လုပ်ဆောင်မှုများရှိနေကြောင်း နယ်မြေထောက်လှမ်းရေး၏ သတင်းပေးချက်အရ မယ့်ကူ မြို့နယ်ခွဲတွင် ခရိုင်အုပ်ချုပ်ရေးနှင့် ထိုင်းစစ်တပ် ပူးပေါင်းအဖွဲ့က စက်တင်ဘာလ ၂၇ ရက်နေ့ ည ၁၀ နာရီခွဲအချိန်၌ နေအိမ်တစ်အိမ်ကို စီးနင်းရှာဖွေခဲ့ခြင်းဖြစ်သည်ဟု သည် နေးရှင်း သတင်းက ဖော်ပြသည်။

ယင်းနေအိမ်တွင် ပုံး ၂၈ ပုံးအတွင်း ထည့်ထားသည့် နှာခေါင်းစည်း အထုပ် ၇၀၀၀၀ ကို ရှာဖွေတွေ့ရှိခဲ့သော်လည်း တရားမဝင် မှောင်ခို ခိုးသွင်းလာသူများကိုမှု ဖမ်းဆီးရမိခဲ့ခြင်း မရှိပေ။

သိမ်းဆည်းရမိသည့် နှာခေါင်းစည်း အထုပ်များသည် အကောက်ခွန်၏ ခွင့်ပြုချက် ရှိပုံမရသဖြင့် ဆက်လက် စုံစမ်းစစ်ဆေးမှုများ လုပ်နေကြောင်း သိရသည်။

တကျော့ပြန် ကိုဗစ်ရောဂါလှိုင်းကြောင့် ကူးစက်မှု မြင့်တက်နေသည့် မြန်မာနိုင်ငံတွင် နှာခေါင်းစည်းများ ဝယ်လိုအား မြင့်တက်နေသည်။

မြန်မာနိုင်ငံတွင် စက်တင်ဘာလ ၂၇ ရက် ည ၈ နာရီအထိ ကိုဗစ်ရောဂါ ကူးစက်လူနာ ၁၀၇၃၄ ဦး၊ ကိုဗစ်ရောဂါကြောင့် သေဆုံးသူ ၂၂၆ ဦး ရှိကြောင်း ကျန်းမာရေးနှင့် အားကစား ဝန်ကြီးဌာနက သတင်းထုတ်ပြန်ထားသည်။