စက်တင်ဘာ ၃ 

Novavax ကုမ္ပဏီမှထုတ်လုပ်သည့်  COVID-19 ကာကွယ်ဆေးသည် အစောပိုင်းအဆင့်လက်တွေ့စမ်းသပ်မှုရလဒ်များအရ ဘေးကင်းစိတ်ချရပြီး ကိုယ်ခံအားစနစ်တုံ့ပြန်မှုကို ဖြစ်စေသည်ဟု နယူးအင်္ဂလန်ဆေးပညာဂျာနယ်တွင် ဗုဒ္ဓဟူးနေ့( စက်တင်ဘာ ၃ ) က ဖော်ပြသည်။  အဆိုပါရလဒ်များကို သြဂုတ်လအစောပိုင်းတွင် ကုမ္ပဏီကကြေညာခဲ့ပြီးဖြစ်သည်။  

သိပ္ပံပညာရှင်များသည် မေလက ကျန်းမာရေးကောင်းပြီး အရွယ်ရောက်သူ ၁၃၁ ဦးကို ဆားကဲ့သို့သော အစွမ်းအာနိသင်မရှိသည့် ဆေး သို့မဟုတ် ကာကွယ်ဆေးများ  ထိုးခဲ့သည်။  ၈၃ ဦးကို ကိုယ်ခံအားတိုးမြှင့်ပစ္စည်း (adjuvant)  နှင့်တွဲလျက် ကာကွယ်ဆေးထိုးခဲ့သည်။ နောက် ၂၅ ယောက်ကို adjuvant မပါဘဲ ကာကွယ်ဆေးချည်းထိုးကာ ကျန် ၂၃ ယောက်ကို အာနိသင်မဲ့ဆေး အသုံးပြုစေခဲ့သည်။ ကာကွယ်ဆေးစမ်းသပ်ခံသူများသည် ၂၁ ရက်အကြာတွင် ဒုတိအကြိမ်အဖြစ် ကာကွယ်ဆေး ထပ်မံထိုးခဲ့ကြသည်။  

စေတနာ့ဝန်ထမ်းများအားလုံးသည် ဩစတြေးလျနိုင်ငံ ဒေသနှစ်ခုမှဖြစ်ပြီး အသက် ၆၀ အောက်များဖြစ်ကာ ကိုဗစ်-၁၉ ကူးစက်ခံရသူ သို့မဟုတ် နာလန်ထများကို စမ်းသပ်မှုတွင် ထည့်သွင်းမထားပေ။  

အဆင့်တစ် စမ်းသပ်မှုတွင် ကာကွယ်ဆေး ဘေးအန္တရာယ် ကင်း/ မကင်း ဆရာဝန်များက အများအားဖြင့် စောင့်ကြည့်သော်လည်း ကိုယ်ခံအားစနစ် တုံ့ပြန်မှုကိုလည်း စစ်ဆေးရသည်။  

 ၃၅ ရက်အတောအတွင်းတွင် အလားအလာရှိသော လက္ခဏာ သို့မဟုတ် နာကျင်မှု ကို မှတ်တမ်းတင်ရန် ပါဝင်စမ်းသပ်ခံသူများအား မှာကြားထားသည်။ လက္ခဏာပြသူများရှိပါက တို့ဖတ်နမူနာယူထားပြီး ပထမအကြိမ် ဆေးထိုးပြီး ၃၅ ရက်အကြာတွင်လည်း ရောဂါစမ်းသပ်မှုပြုလုပ်သည်။  

စမ်းသပ်ခံလူနာများသည် ၃၅ ရက်မြောက်တွင် ပြင်းထန်သော သို့မဟုတ် ပုံမှန်မဟုတ်သော လက္ခဏာများ မပြသခဲ့ကြပေ။ တစ်ဦးမှာ ဒုတိယအကြိမ် ကာကွယ်ဆေးထိုးပြီးနောက် တစ်ရက်ခန့် အနည်းငယ်ဖျားခဲ့သည်။ အများစုမှာ တုံ့ပြန်မှု တစ်စုံတစ်ရာမရှိဘဲ ရှိပါက အပျော့စားလက္ခဏာသာဖြစ်သည်။ ကာကွယ်ဆေးသုံးသည့် အုပ်စုနှစ်စုမှ လူနှစ်ယောက်သည် ခေါင်းကိုက်ခြင်း၊ မောပန်းနွမ်းနယ်ခြင်းနှင့် မအီမသာဖြစ်ခြင်းများကို နှစ်ရက်ခန့် ခံစားခဲ့ရသည်။  

ဒုတိယအကြိမ်ကာကွယ်ဆေးထိုးပြီးနောက် လူအများစုသည် ပြဿနာတစ်စုံတစ်ရာမရှိခြင်း သို့မဟုတ် အပျော့စားလက္ခဏာများကိုသာ ခံစားရသည်။ တစ်ဦးမှာ ကိုယ်လက်မအီမသာဖြစ်ခြင်းနှင့် ရှစ်ဦးမှာ အဆစ်နာကျင်ခြင်းများနှင့် ပင်ပန်းနွမ်းနယ်မှုတို့ကို ခံစားခဲ့ရသည်။  

ကာကွယ်ဆေးသည် ကိုယ်ခံအားစနစ်ကို ထုတ်ပေးဟန်ရှိပြီး ကာကွယ်ဆေးထိုးခဲ့သူအားလုံးသည် ဒုတိယအကြိမ် ကာကွယ်ဆေးထိုးပြီးနာက်ပိုင်းတွင် အာနိသင်ပျက်ပြယ်စေသော ပဋိပစ္စည်းများထုတ်ပေးကြသည်။  

adjuvant နှင့်တွဲ၍ ကာကွယ်ဆေးနှစ်ကြိမ်ထိုးထားသူများသည် ၃၅ ရက်မြောက်တွင် ကိုဗစ်-၁၉ ရောဂါပျောက်ကင်းသွားသူများထုတ်သည့် ပဋိပစ္စည်း ပျမ်းမျှအရေအတွက်ထက် လေးဆမှ ခြောက်ဆခန့် အာနိသင်ပျက်ပြယ်စေသော ပဋိပစ္စည်းများကို ထုတ်ပေးသည်။ ပဋိပစ္စည်းများသည် ကူးစက်ရောဂါ သို့မဟုတ် အဆိပ်အတောက်ကို တိုက်ထုတ်ရန် ခန္ဓာကိုယ်က သဘာဝအလျောက်ထုတ်လုပ်ပေးသော ပရိုတင်းများဖြစ်သည်။  

ကျပန်းရွေးချယ်ပြီးစမ်းသပ်ခဲ့သော စေတနာ့ဝန်ထမ်း ၁၆ ယောက်တွင် ခန္ဓာကိုယ်ကို ရောဂါကူးစက်ခြင်းမှ ကာကွယ်ပေး သော ကိုယ်ခံအားဆဲလ်အမျိုးအစားဖြစ်သည့် T-cells များကိုလည်းထုတ်လုပ်ပေးဟန်ရှိသည်။  

တုံ့ပြန်ခဲ့သော ကိုယ်ခံအားစနစ်များကို အခြေခံတွက်ချက်ခြင်းဖြင့် adjuvant နှင့်တွဲသုံးခဲ့သော ကာကွယ်ဆေး၏အကျိုးကျေးဇူးမှာ သိသာထင်ရှားကြောင်း လေ့လာတွေ့ရှိခဲ့သည်။ ၂၁ ရက်မြောက်တွင် ဒုတိယအကြိမ် ကာကွယ်ဆေးထိုးခဲ့မှု၏ အာနိသင်ကိုလည်း ပြသခဲ့သည်။  

“အဆင့်တစ် ရလဒ်ကောင်းတွေပေါ်အခြေခံပြီး အဆင့်နှစ် လက်တွေ့စမ်းသပ်မှုတွေ အများကြီး စတင်ခဲ့ပါတယ်။ အဲဒီကနေ ပဏာမထိရောက်မှုတွေကို သိရဖို့ မျှော်လင့်ပါတယ်” ဟု Novavax ကုမ္ပဏီမှ သုတေသနှင့်ဖွံ့ဖြိုးမှုဆိုင်ရာ ဥက္ကဋ္ဌ Dr. Gregory Glenn ကပြောသည်။ အမေရိကန်ရော ကမ္ဘာတွင်ပါ ကာကွယ်ဆေးကို ယုံကြည်စွာ အသုံးပြုနိုင်စေရန် အထောက်အပံ့ဖြစ်စေမည့်  ဘေးကင်းမှု၊ ကိုယ်ခံစွမ်းအား လှုံ့ဆော်ပေးသည့်စွမ်းရည်၊ ထိရောက်မှုဆိုင်ရာအချက်အလက်များနှင့် ၎င်းတို့ညီလာခံက ထုတ်ပြန်ခဲ့သော အားအလာရှိသော ကာကွယ်ဆေးဖြစ်နိုင်သည်ဆိုသော အချက်အလက်များ ဖြစ်လာစေရန် Novavax က ကတိကဝတ်ပြုထားသည်။  

ဤစမ်းသပ်မှုသည် ကာကွယ်ဆေးနှင့် ပတ်သက်၍ ဆုံးဖြတ်ရန် အကန့်အသတ်များလည်းရှိသည်။ စမ်းသပ်မှုတွင် လူအနည်းငယ်သာရှိပြီး လူမည်းနှင့်လက်တင်နိုင်ငံသားများ အနည်းငယ်သာ ပါဝင်သည်။ လူနာများမှာလည်း ကျန်းမာရေးကောင်းမွန်သူများဖြစ်သည်။  

ကနဦးအဆင့်တွင် ရလဒ်များကောင်းမွန်ကြောင်း ဖီလာဒဲလ်ဖီးယား ကလေးဆေးရုံမှ ကလေးအထူးကု ပါမောက္ခနှင့် ကာကွယ်ဆေးပညာပေးစင်တာ ဒါရိုက်တာဖြစ်သူ Dr. Paul Offit က ပြောသည်။  

“ဒီကာကွယ်ဆေးက အလားအလာရှိတယ်ဆိုတာ သက်သေပြနိုင်မယ်ဆိုရင် သူတို့တွေရဲ့ တုံ့ပြန်မှုတင်မဟုတ်ပဲ လူထောင်ပေါင်းများစွာနဲ့ စမ်းသပ်ဖို့ လိုအပ်ပါတယ်။  ဖြစ်လာမလားဆိုတာကိုတော့ စောင့်ကြည့်ရမယ်” ဟု Offit က ဆိုသည်။  

ဤကာကွယ်ဆေးသည် ရေယုန်ကာကွယ်ဆေးကဲ့သို့သော တခြားကာကွယ်ဆေး စမ်းသပ်အောင်မြင်ခဲ့သည့်နည်းလမ်းကို အသုံးပြုထားသောကြောင့် ယခုအချိန်တွင် အဆင့်အမျိုးမျိုး၌စမ်းသပ်နေသော ကိုဗစ်-၁၉ ကာကွယ် ဆေး ၃၃ မျိုးနှင့်နှိုင်းယှဉ်ပါက အလားအလာရှိသည်ဟု Offit က ဆိုသည်။  

“ဒါက ရလဒ်ကောင်းမွန်တဲ့ ကာကွယ်ဆေးနည်းဗျူဟာတစ်ခုဖြစ်တယ်လို့ ကျွန်တော်ထင်ပါတယ်။ ဒါပေမယ့် ထိရောက်မှု ရှိ/ မရှိ သက်သေပြနိုင်လားဆိုတာ စောင့်ကြည့်ရမှာပါ” ဟု Offit  က ပြောသည်။  

အမေရိကန်တွင် ကိုဗစ်ကာကွယ်ဆေး ငါးမျိုးနှင့် ကမ္ဘာတစ်ဝန်းလုံးတွင် ၃၃ မျိုး လက်တွေ့စမ်းသပ်မှုလုပ်ဆောင်နေကြောင်း ကမ္ဘာ့ကျန်းမာရေးအဖွဲ့ (WHO) ၏ထုတ်ပြန်ချက်အရ သိရသည်။