စက်တင်ဘာ ၁

ကိုဗစ်-၁၉ ကာကွယ်ဆေးများကို အရေးပေါ် ခွင့်ပြုချက် ထုတ်ပေးရာတွင် “အထူးတလည် အလေးအနက်ထားမှု၊ အလေးအနက် ဆင်ခြင်နှိုင်းဆမှု” တို့ဖြင့် လုပ်ဆောင်ရန် လိုအပ်ပါကြောင်း ကမ္ဘာ့ကျန်းမာရေးအဖွဲ့ (WHO) က သြဂုတ် ၃၁ ရက်တွင် ပြောကြားလိုက်သည်။ 

ယင်းမတိုင်မီ အမေရိကန်က ကိုဗစ်-၁၉ ကာကွယ်ဆေးကို စမ်းသပ်မှု အားလုံးမပြီးခင် စောလျင်စွာ အရေးပေါ် အတည်ပြုချက် ထုတ်ပေးကောင်းပေးနိုင်သည် ဆိုပြီး ထုတ်ဖော်ကြေညာခဲ့ပြီးနောက် WHO က အထက်ပါအတိုင်း ပြောဆိုလိုက်ခြင်း ဖြစ်သည်။ 

နိုင်ငံတိုင်းအနေဖြင့် ဆေးဝါးများကို အပြည့်အဝ လက်တွေ့စမ်းသပ်မှု မပြီးစီးဘဲ အတည်ပြုချက် ပေးနိုင်သည့် အခွင့်အရေး ရှိသည်ဆိုသော်ငြား “ယင်းသည် အလွန်တရာ ပေါ့ပေါ့တန်တန် လုပ်ဆောင်ရသည့် အရာမျိုး မဟုတ်” ဟု WHO ၏ သိပ္ပံပညာရှင် Soumya Swaminathan က သတင်းစာရှင်းလင်းပွဲတစ်ခုတွင် ပြောသွားခဲ့သည်။ 

ကိုဗစ်-၁၉ ကာကွယ်ဆေးတစ်မျိုး၏ အကျိုးကျေးဇူးက ဆိုးကျိုးအန္တရာယ်ထက် ပိုအလေးသာနေသည်ဟု တာဝန်ရှိသူများ ယုံကြည်နေသမျှ ကာလပတ်လုံး အဆိုပါ ကာကွယ်ဆေးကို အတည်ပြုချက်ထုတ်ပေးရန်အလို့ငှာ ပုံမှန်အတည်ပြုမှု လုပ်ငန်းစဉ်ကို ရှောင်လွဲသွားလိုကြောင်း အမေရိကန် အစားအစာနှင့် ဆေးဝါးကွပ်ကဲမှု အဖွဲ့၏ အကြီးအကဲဖြစ်သူက ပြောကြားခဲ့သည်။ 

ရုရှားနိုင်ငံသည် ယင်း၏ ကိုဗစ်-၁၉ ကာကွယ်ဆေးတစ်မျိုးကို လူဖြင့် စမ်းသပ်မှု နှစ်လနီးပါးသာ လုပ်ခဲ့ပြီးနောက် ယခုလအတွင်း ယင်းဆေးကို တရားဝင် စည်းမျဉ်းဆိုင်ရာ အတည်ပြုချက် ထုတ်ပေးခဲ့ရာ ယင်း၏ ဘေးကင်းစိတ်ချရမှု၊ အစွမ်းထက်ထိရောက်မှုနှင့်ပတ်သက်၍ အနောက်နိုင်ငံ ပညာရှင်များထံမှ မေးခွန်းထုတ်မှုများ ပေါ်ထွက်ခဲ့သည်။ 

ကာကွယ်ဆေးများ၏ အရည်အသွေးပြည့်မီမှု စစ်ဆေးအကဲဖြတ်မှု အကြိုအတွက် အသုံးပြုနိုင်မည့် ဒေတာအချက်အလက် အပြည့်အစုံ ရှိထားရေးက WHO အလိုရှိသော ချဉ်းကပ်ပုံနည်းလမ်းဖြစ်သည်ဟု Swaminathan က ပြောသည်။ ယင်းနောက်မှသာ ဆေးဝါးတစ်ခုစီတိုင်း၏ ထိရောက်မှု၊ ဘေးကင်းစိတ်ချရမှုကို ဖြစ်စဉ်တစ်ခုချင်းစီအလိုက်အခြေခံပြီး WHO က စဉ်းစားမည်ဖြစ်ကြောင်း သူမက ပြောသွားခဲ့သည်။