ဩဂုတ် ၃၁
ဂျပန်ကုမ္ပဏီတစ်ခုက ၎င်း၏ ခေတ်ရှေ့ပြေး ကားပျံကို အများပြည်သူ မြင်ကွင်းရှေ့ လေးမိနစ်ကြာ အောင်မြင်စွာ စမ်းသပ်ပျံသန်း ပြခဲ့သည်။
ဂျပန်နိုင်ငံ တိုယိုတာစက်ရုံရှိ တိုယိုတာစမ်းသပ်ကွင်းတွင် SD-03 ကားပျံကို အောင်မြင်စွာ စမ်းသပ်ပျံသန်းနိုင်ခဲ့ခြင်း ဖြစ်ကြောင်း SkyDrive Inc ကုမ္ပဏီက ကြေညာသည်။
ပျံတက်ခြင်း၊ ဆင်းသက်ခြင်းများ လုပ်ဆောင်နိုင်သော ကမ္ဘာ့အသေးဆုံး လျှပ်စစ်ယာဉ်အဖြစ် သတ်မှတ်ကြေညာထားသည့် တစ်ယောက်စီး အဆိုပါ ကားပျံကို စမ်းသပ်ပျံသန်းခဲ့သည်မှာ လေးမိနစ်ကြာမျှ ရှိခဲ့သည်။
ယခု ကားပျံသည် မော်တော်ဆိုင်ကယ်နှင့် ဆင်တူပြီး ပျံတက်ရန်အတွက် ပန်ကာလေးလက် တပ်ဆင်ပါရှိသည်။ SD-03 ကားပျံ၏ လက်ရှိ ပျံသန်းနိုင်စွမ်းမှာ ဆယ်မိနစ်ခန့် ကြာအောင် ပျံသန်းနိုင်စွမ်း ရှိပြီး ကုမ္ပဏီအနေဖြင့် မိနစ် ၃၀ ကြာအောင် ပျံသန်းနိုင်ရေး စိုင်းပြင်းလျက် ရှိသည်။
၂၀၂၃ တွင် ယင်း ကားပျံအား လူများ စီးနင်းနိုင်သည့်အထိ အပြီးသတ် တီထွင်ထုတ်လုပ်နိုင်ရန် ရည်ရွယ်ထားသည်ဟု SkyDrive ကုမ္ပဏီက ပြောခဲ့သည်။
