ဇွန် ၁၇

လာမည့် ၂၀၂၀ ပါတီစုံ အထွေထွေရွေးကောက်ပွဲတွင် ရွေးကောက်ပွဲကော်မရှင်ဘက်က ပြင်ဆင်ထားမှုအခြေအနေနှင့်  နိုင်ငံရေးပါတီများဘက်ကလည်း ရွေးကောက်ပွဲလုပ်ငန်းစဉ်များကို အချိန်မီဆောက်ရွက်နိုင်ရေးကိစ္စရပ်များဆောင်ရွက်နိုင်ရန် နိုင်ငံရေးပါတီ (၃၀) က ရွေးကောက်ပွဲကော်မရှင်နှင့် တွေ့ဆုံခွင့် တောင်းခံစာပို့ထားကြောင်း သိရသည်။

ရွေးကောက်ပွဲကော်မရှင်နှင့် တွေ့ဆုံခွင့် တောင်းခံစာကို ဇွန်လ ၁၇ ရက်နေ့တွင် ပြည်ထောင်စုရွေးကောက်ပွဲ ကော်မရှင်အပြင် နိုင်ငံတော်သမ္မတရုံးနှင့် တပ်မတော်ကာကွယ်ရေး စစ်ဦးချုပ်ရုံးတို့ကိုပါ ပေးပို့ခဲ့ခြင်းဖြစ်ကြောင်း သိရသည်။

လွတ်လပ်ပြီးတရားမျှတသည့် ရွေးကောက်ပွဲဖြစ်စေရန်အတွက် ရွေးကောက်ပွဲကော်မရှင်နှင့် တွေ့ဆုံရန် တင်ပြတောင်းဆိုခြင်းဖြစ်ကြောင်း ပြည်ထောင်စု ကြံ့ခိုင်ရေးနှင့် ဖွံ့ဖြိုးရေးပါတီ၏ ပြောရေးဆိုခွင့်ရှိသူ ဦးသိန်းထွန်းဦးက ပြောသည်။   

ဦးသိန်းထွန်းဦးက “ရွေးကောက်ပွဲကော်မရှင်နဲ့ နိုင်ငံရေးပါတီဆိုတာ ကိုင်းကျွန်းမှီ၊ ကျွန်းကိုင်းမှီ၊ တစ်ဖွဲ့နဲ့တစ်ဖွဲ့ အပြေအလည် ဆွေးနွေးလို့ရှိရင် ရလာဒ်ကောင်းတွေအများကြီးရမယ်။ ပိုပြီးတော့ လွတ်လပ်တဲ့ တရားမျှတတဲ့ ရွေးကောက်ပွဲ ဖြစ်နိုင်တယ်။” ဟု ပြောသည်။

လက်ရှိရွေးကောက်ပွဲကော်မရှင်အနေဖြင့် နိုင်ငံရေးပါတီများနှင့် တွေ့ဆုံရန် အင်မတန် အားနည်းနေသေး ကြောင်းလည်း ဦးသိန်းထွန်းဦးက ပြောသည်။

လာမည့် ၂၀၂၀ ရွေးကောက်ပွဲကို နိုဝင်ဘာလတွင် ကျင်းပမည်ဖြစ်ကြောင်း ဇွန်လ (၄) ရက်နေ့က ပြုလုပ်သည့် သတင်းစာရှင်းလင်းပွဲတွင် ပြည်ထောင်စုရွေးကောက်ပွဲကော်မရှင်ဘက်က ပြောဆိုထားသည်။

ယင်းကြောင့်ရွေးကောက်ပွဲကျင်းပရန် အချိန် ငါးလခန့်သာ လိုတော့သည့်အတွက် ရွေးကောက်ပွဲကော်မရှင် အနေဖြင့် နိုင်ငံရေးပါတီများနှင့် အလျှင်အမြန်တွေ့ဆုံရန် လိုအပ်ကြောင်း နိုင်ငံရေးပါတီများဘက်က ပြောဆို သည်။

ပြည်ထောင်စုရွေးကောက်ပွဲကော်မရှင်နှင့် နိုင်ငံရေးပါတီများ၏ တွေ့ဆုံဆွေးနွေးပွဲတွင် မဲဆန္ဒရှင်များ၏ စာရင်းကောက်ယူမှု၊ ရွှေ့ပြောင်းမဲဆန္ဒရှင်များ စာရင်းကောက်ယူမှု၊ မဲပေးပုံစနစ်များနှင့် ကိုယ်စားလှယ် လောင်းများ အမည်စာရင်းပေးသွင်းမှုအပါအဝင် စုစုပေါင်း ၁၂ ချက်ကို ဆွေးနွေးသွားရန်ရှိနေကြောင်း သိရသည်။