ဇွန် ၁၂
လောင်းကစားပွဲတွင်ပါဝင်သည့် မြည်းတစ်ကောင် အဖမ်းခံရ
ပါကစ္စတန်ရဲများသည် တရားမဝင် လောင်းကစားမှုနှင့်ပတ်သက်သောအပြေးပြိုင်ပွဲတစ်ခုတွင် မြည်းတစ်ကောင်အား ဖမ်းဆီးလိုက်ကြောင်းသိရသည်။ ပါကစ္စတန်အရှေ့ပိုင်း၊ ပန်ဂျပ်ပြည်နယ် ရာဟင်ယာခန်မြို့မှ တာဝန်ရှိ သူများသည် အများပြည်သူရှေ့မှောက်၌ လောင်းကစားကျူးလွန်သည်ဟု သံသယရှိသော လူရှစ်ယောက်နှင့်အတူ မြည်းတစ်ကောင်ကိုဖမ်းဆီးခဲ့ခြင်းဖြစ်သည်။ ပါကစ္စတန်တွင် ထိုသို့လောင်းကစားလုပ်ခြင်းကို ရာဇဝတ်မှု အဖြစ်သတ်မှတ်ထားသည်။
ငွေစက္ကူအတုသုံးသည့် ၈ နှစ်အရွယ်ယောက်ျားလေး ရဲမှတ်တမ်းတင်ခံရ
ဆွစ်ဇာလန်နိုင်ငံရှိ ကျေးရွာတစ်ရွာက ဆိုင်တွင် အသက်ရှစ်နှစ်အရွယ်ယောက်ျားလေးတစ်ဦးသည် ကစားစရာငွေစက္ကူကို သုံး၍ ရ/မရ မေးမြန်းခဲ့မှုကြောင့် ရဲများက စုံစမ်းထောက်လှမ်းခဲ့ကြသည်။ ရဲများက အဆိုပါကလေး ၏ မိဘများကိုဆက်သွယ်ကာ အိမ်သို့သွားရောက်ပြီး သုံးနာရီကြာမျှ စစ်ဆေးမေးမြန်းခဲ့ကြသည်။ အမည်မဖော်ပြထားသော အဆိုပါကလေးကို ပြစ်မှုကျူးလွန်မှုဖြင့် တရားမစွဲဆိုသော်လည်း ၎င်းအမည်သည် ၂၀၃၂ ခုနှစ် မေလတိုင်အောင် ရဲမှတ်တမ်းတွင်ရှိနေမည်ဖြစ်သည်။
OnlyFans အဖွဲ့ထဲဝင်ရောက်ခဲ့သည့် ဘွားဘွား
အသက် ၅၉ နှစ်အရွယ်ရှိ အဘွားဖြစ်သူတစ်ဦးသည် အွန်လိုင်း၌ ၎င်း၏ အညှီအဟောက်ဆန်သောဓာတ်ပုံများရောင်းရန် လက်ရှိအလုပ်ကိုထွက်ခဲ့ကြောင်းသိရသည်။ လူကြီးဖျော်ဖြေရေးဝက်ဆိုဒ်တစ်ခုဖြစ်သည့် OnlyFans တွင် ဓာတ်ပုံတင်ခြင်းဖြင့် တစ်လလျှင် ယူရို ၁ ၅၀၀ (ပေါင် ၁၃၀၀) ရရှိပြီး ယခင် အချိန်ပိုင်းအလုပ်ထက် ဝင်ငွေသုံးဆခန့်ပိုရသည်ဟု Sandra Maria Brook က ဆိုသည်။ အဘွားအရွယ် Sandra ၏ အညှီအဟောက်မ ကင်းသော ဓာတ်ပုံများကို သဘောကျ၍ ၎င်း၏ Instagram အကောင့်ကို Follow လုပ်ထားသူ ၁၁ ၀၀၀ ကျော်ရှိသည်ဟု သိရသည်။
