ဇွန်လ ၅ ရက်၊ ၂၀၂၀ ပြည့်နှစ်
မြန်မာနိင်ငံသား တစ်ဦးနှင့် အဆက်အသွယ်ရပြီး ထိုင်းနယ်စပ်တွင် မူးယစ်ဆေးဝါးများ ဖြန့်ဖြူး ရောင်းချနေသည်ဆိုသော အသက် ၂၂ နှစ်အရွယ် ထိုင်းနိုင်ငံသားတစ်ဦးကို ဖမ်းဆီးရမိထားကြောင်း ယမန်နေ့ထုတ် ထိုင်းဘာသာဖြင့် ရေးထားသော khaosod သတင်းဌာနတွင် ဖော်ပြထားသည်။
ဓာတ်ပုံ -- ( khaosod သတင်းဌာန )
သတင်းပေးချက်အရ ထိုင်းနိုင်ငံတောင်ပိုင်း ဟတ်ယိုင်မြို့ရှိ ၎င်း၏နေအိမ်တွင် အင်္ဂါနေ့က သွားရောက်ရှာဖွေရာ ရာဘဆေးပြား ၂၀၂၀၀၀ နှင့် အိုက်စ် ငါးကီလို ဂရမ် အပြင် တယ်လီဖုန်း ဆင်းကဒ် ၄၂ ခု တို့ကို သိမ်းဆည်းရမိခဲ့ ခြင်း ဖြစ်ကြောင်း khaosod က ဖော်ပြထားသည်။ ဖမ်းမိထားသော မူးယစ်ဆေးဝါးများ၏ တန်ဖိုးမှာ ဘတ်ငွေ ၄ သန်းခန့် ရှိကြောင်း သိရသည်။
ဓာတ်ပုံ -- ( khaosod သတင်းဌာန )
အဖမ်းခံထားရသူ ထိုင်းနိုင်ငံသား၏ စစ်ဆေး ထွက်ဆိုချက်အရ ဖမ်းဆီးခံနေရစဉ် ဖုန်းဖြင့် ဆက်သွယ်လာသူတစ်ဦးမှာ နယ်စပ်တွင် မူးယစ်ဆေးဝါး လုပ်ကိုင်နေသူ မြန်မာနိုင်ငံသား အားဖိုး ဆိုသူ ဖြစ်သည်ဟု သတင်းတွင် ပါရှိသည်။
မူးယစ်ဆေးဝါးလက္ကားပို့သူ မြန်မာနိုင်ငံသားသည် ထိုင်းနယ်စပ်တွင်နေထိုင်ပြီး ပုဂ္ဂလိက စာတိုက်ပို့ဆောင်ရေးကိုအသုံးပြုကာ မူးယစ်ဆေးဝါးများ ပို့ဆောင်ပေးနေသူ ဖြစ်သည်ဟု သိရသည်။