မေ ၁၃
ဟောင်ကောင်သည် လာမည့်သီတင်းပတ်၌ အပြည်ပြည်ဆိုင်ရာလေဆိပ်တွင် လေယာဉ်ခရီးစဉ်အပြောင်းအလဲ Transit ဝန်ဆောင်မှုအချို့ကို ပြန်လည်စတင်တော့မည်ဟု အုပ်ချုပ်ရေးမှူး ကာရီလမ်က မေ ၂၆ ရက်တွင် ပြောကြားလိုက်သည်။
ဟောင်ကောင်လေဆိပ်သည် ကမ္ဘာပေါ်တွင် အစည်ကားဆုံးလေဆိပ်များအနက်တစ်ခုဖြစ်ပြီး ကမ္ဘာလုံးဆိုင်ရာ ကပ်ရောဂါပေါ်ပေါက်လာမှုကြောင့် ဆိုက်ရောက်မှုများနှင့်လေယာဉ်ခရီးစဉ်ပြေးဆွဲမှုများ ရပ်နားခဲ့ရသည်။
"မတ်လ ၂၅ ရက်နေ့ကတည်းက ဆိုင်းငံ့ထားခဲ့တဲ့ Transit ဝန်ဆောင်မှုတွေကို ဇွန် ၁ ရက်မှာ တစ်စိတ်တစ်ပိုင်း ပြန်လည်ဖွင့်လှစ်သွားမှာပါ" ဟု ကာရီလမ် က သတင်းထောက်များကို ပြောကြားခဲ့သည်။ လေယာဉ်ခရီးစဉ်ပြောင်းပေးမှု ပိတ်ပင်ထားခြင်းအပေါ် ရုပ်သိမ်းမှုအသေးစိတ်ကို မွန်းလွဲပိုင်း သတင်းစာရှင်းလင်းပွဲတွင် ကျန်းမာရေးတာဝန်ရှိသူများက ထုတ်ပြန်မည်ဟု မျှော်လင့်ရသည်။
ဟောင်ကောင်သည် တရုတ်ပြည်မကြီးပြင်ပ ကိုဗစ်-၁၉ ရောဂါဖြစ်ပွားရာ ဦးဆုံးနိုင်ငံများအနက် တစ်နိုင်ငံဖြစ်သည်။ လူဦးရေ ၇.၅ သန်းရှိသည့်ဟောင်ကောင်တွင် ကိုရိုနာဗိုင်းရပ်စ်ကူးစက်ခံရသူ ၁၀၀၀ ကျော်ရှိပြီး သေဆုံးသူ လေးဦးသာရှိသည်။
အင်္ဂါနေ့အထိဆိုလျှင် ၁၁ ရက် ဆက်တိုက် ဒေသတွင်းဗိုင်းရပ်စ်ကူးစက်မှုဖြစ်စဉ်အသစ်မတွေ့ရှိတော့ပေ။ လေဆိပ်ရောက်ရှိလာသူများကို ဗိုင်းရပ်စ် ရှိ/ မရှိ စစ်ဆေးပြီးမှ မြို့တွင်းသို့ဝင်ခွင့်ပေးကာ ပိုးတွေ့ရှိသူကို ချက်ချင်း ကန့်သတ်စောင့်ကြည့်မှု ပြုလုပ်သည်။
ကာရာအိုကေခန်းမများ၊ နိုက်ကလပ်များ၊ ချွေးထုတ်ခန်းများနှင့် ပါတီခန်းမများကို သောကြာနေ့တွင် ပြန်လည်ဖွင့်လှစ်ပေးသွားမည်ဟု ကာရီလမ်က ဆိုသည်။
အပြည်ပြည်ဆိုင်ရာလေဆိပ်ကောင်စီ၏ ထုတ်ပြန်ချက်အရ ဟောင်ကောင်လေဆိပ်သည် ၂၀၁၉ ခုနှစ်၌ အကြီးမားဆုံးလေကြောင်းကုန်စည်ပို့ဆောင်ရေးအချက်အချာနှင့် စတုတ္ထမြောက် ခရီးသည်အဝင်အထွက်အများဆုံး လေဆိပ်ဖြစ်ခဲ့ပြီး ကုန်စည် မက်ထရစ်တန်ချိန် ၄.၈ သန်းပို့ဆောင်ပေးခဲ့ရကာ နိုင်ငံတကာခရီးသည် ၇၁ သန်းကို ဝန်ဆောင်မှုပေးနိုင်ခဲ့သည်။
ပြီးခဲ့သည့်နှစ်က လပေါင်းများစွာ အစိုးရဆန့်ကျင်ဆန္ဒပြမှုများပေါက်ပေါက်ခဲ့သောကြောင့် လေယာဉ်ခရီးစဉ်နှင့် ဆိုက်ရောက်မှုများ ကျဆင်းသွားခဲ့သည်။
