ဧပြီ ၂၅

စင်ကာပူနိုင်ငံ၏ အချမ်းသာဆုံးပုဂ္ဂိုလ်သည် ကိုရိုနာဗိုင်းရပ်စ်ကပ်ဘေးအတွင်း ၎င်း၏ ဆေးဖက်ဆိုင်ရာပစ္စည်း ထုတ်လုပ်ရေးကုမ္ပဏီ ရှယ်ယာဈေး ၅၀ ရာခိုင်နှုန်းနီးပါး ထိုးတက်ခြင်းကြောင့် ယခုနှစ်၌ တစ်လလျှင် အမေရိကန်ဒေါ်လာ ၁ ဘီလီယံကျော် ဝင်ငွေဖြောင့်ကာ ပို၍ ချမ်းသာလာသည်။

Shenzhen Mindray Bio –Medical Electronics ကုမ္ပဏီအား ပူးတွဲတည်ထောင်သူနှင့် ဥက္ကဌဖြစ်သူ Li Xiting ၏ ကြွယ်ဝချမ်းသာမှုသည် ယခုနှစ်တွင် အမေရိကန်ဒေါ်လာ ၄ ဒသမ ၃ ဘီလီယံ မြင့်တက်ပြီး ဒေါ်လာ ၁၃ ဒသမ ၅ ဘီလီယံအထိ ရှိလာခဲ့ကြောင်း Bloomberg ၏ အချက်အလက်အရ သိရပြီး ယင်းသည် ၂၄ နာရီတိုင်း ပျမ်းမျှ ဒေါ်လာ ၃၇ ဒသမ ၇ သန်း ဝင်ငွေဖြောင့်နေခြင်း ဖြစ်သည်။ ထိုအတွက်ကြောင့် တရုတ်နိုင်ငံ အန်ဟွေးပြည်နယ်တွင် မွေးဖွားသော Li အား ၂၀၁၈  ခုနှစ်မှစတင်ကာ နိုင်ငံသားဖြစ်လာသည့် စင်ကာပူနိုင်ငံ၌ အချမ်းသာဆုံးသူဌေးကြီး ဖြစ်လာစေခဲ့သည်။

တရုတ်အလယ်ပိုင်းတွင် စတင်ဖြစ်ပွားပေါ်ပေါက်ပြီး တစ်ကမ္ဘာလုံး ပျံ့နှံ့ကာ လူပေါင်း နှစ်သန်းကျော် ကူးစက်ခံရသည့် ကိုရိုနာဗိုင်းရပ်စ်ကပ်ဘေး ဖြစ်ပွားချိန်မှစပြီး Li ၏ Mindray ကုမ္ပဏီ ရှယ်ယာများ ဈေးခုန်တက်လာခဲ့ခြင်း ဖြစ်သည်။ ရှန်ကျန်ရှိ ChiNext ရှယ်ယာဈေးကွက်တွင် ကြာသပတေးနေ့ အရောင်းအဝယ်၌ Mindray ၏ ရှယ်ယာဈေးသည် စံချိန်တင်မြင့်တက်ပြီး ယန်းငွေ ၂၇၀ ဒသမ ၅၂ ယန်းရှိရာ ကုမ္ပဏီ၏ ဈေးကွက်တန်ဖိုးသည် ယန်း ၃၂၉ ဘီလီယံ(အမေရိကန်ဒေါ်လာ ၄၆ ဒသမ ၅ ဘီလီယံ)အထိ ရှိခဲ့သည်။

“မတ်လအတွင်းမှာ ကျွန်တော်တို့ရဲ့ ထုတ်ကုန်တွေကို အဝယ်အမှာစာတွေ သိသိသာသာ တိုးမြင့်လာခဲ့တာ ဖြစ်တယ်။ ရောဂါကပ်ဘေးကို တိုက်ဖျက်ဖို့ ကျွန်တော်တို့ရဲ့ ဆေးဖက်ဆိုင်ရာပစ္စည်းကိရိယာတွေအတွက် နိုင်ငံပေါင်း ၁၀၀ ကျော်လောက်က အဝယ်အမှာစာတွေ လက်ခံရရှိခဲ့တယ်။”ဟု South China Morning Post ၏ မေးမြန်းချက်ကို Mindray ကုမ္ပဏီက အီးမေးလ်မှတစ်ဆင့် ပြန်လည် ဖြေကြားခဲ့သည်။

အီတလီတစ်နိုင်ငံတည်းကပင် အသက်ရှူစက်၊ ပုံရိပ်ဖမ်းစက်နှင့် လူနာစောင့်ကြည့်ရေးစက်အပါအဝင် ဆေးဖက်ဆိုင်ရာစက်ပစ္စည်းကိရိယာ အစုံပေါင်း တစ်သောင်းနီးပါးကို မှာယူခဲ့ကြောင်း ပုံရိပ်ဖမ်းစက်နှင့် လူနာစောင့်ကြည့်ရေးစက်များအပါအဝင် ဆေးဖက်ဆိုင်ရာကိရိယာများ ထုတ်လုပ်သော ယင်းကုမ္ပဏီက ပြောပြီး မည်သည့်ဈေးဖြင့် ရောင်းချခဲ့သည်ကို ထုတ်ဖော်ပြောရန် ငြင်းဆိုခဲ့သည်။