ဧပြီ ၁၇
မြန်မာနှစ်ဆန်း ၁ ရက်နေ့တွင် လွှတ်ပေးလေ့ရှိသော အစဉ်အလာအရ နိုင်ငံတော်သမ္မတရုံး၏ ပြစ်ဒဏ်လွတ်ငြိမ်းခွင့်အမိန့်ကို ထုတ်ပြန်လိုက်ရာ နိုင်ငံတဝန်းရှိအကျဉ်းထောင်များမှ အကျဉ်းသားပေါင်း ၂၄၈၉၆ ဦးကို ပြစ်ဒဏ်မှ ကင်းလွတ်ခွင့်ရခဲ့ကြပြီး ပြန်လည်လွတ်မြောက်လာခဲ့သည်။
သမ္မတဦးဝင်းမြင့်၏ ပြစ်ဒဏ်လွတ်ငြိမ်းခွင့်အမိန့်တွင် ပါဝ်သော ပြစ်ဒဏ်လျော့ပေါ့သည့် မူတစ်ခုဖြစ်သည့် " ထောင်ဒဏ် နှစ် ၄၀ နှင့် အောက်ခံနေရသူများကို ယင်းတို့ကျခံနေရသော ထောင်ဒဏ် ၏ လေးပုံတစ်ပုံအား လျှော့ပေါကျခံစေရန်" အချက်တစ်ခုအရ လွတ်မြောက်လာသော အကျဉ်းသားများဖြစ်သည်။ ထို့အပြင် ကန့်သတ်ဧရိယာအပြင် တရားမဝင် နယ်ကျော်ထွက်မှုဖြင့် အဖမ်းခံထားရသော ရခိုင်ပြည်နယ်မြောက်ပိုင်းမှ မူဆလင်များကိုလည်း နေရပ်ရင်းပြန်ပို့သည့်အစီအစဉ်လည်း ပါဝင်သည်။
ဓာတ်ပုံ-သူရ/မဇ္ဈိမ
မြန်မာနိုင်ငံတဝှမ်းအကျဉ်းထောင် ၄၆ ခုနှင့် ရဲဘက်စခန်း ၅၀ ရှိသည်။ အကျဉ်းထောင်များတွင် လက်ခံနိုင်သည့်အရေအတွက်မှာ ၆၆,၀၀၀ဝဖြစ်သော်လည်း ၉၂၀၀၀ အထိရှိနေခဲ့သည်ဟု နယူးယောက်အခြေစိုက် လူ့အခွင့်အရေးစောင့်ကြည့်အဖွဲ့က ပြောထားသည်။
ယနေ့လွှတ်ပေးရာတွင် အင်းစိန်ထောင်တစ်ခုတည်းမှပင် အကျဉ်းသားဦးရေ ၂၆၀၀ ကျော်ပြန်လွတ်ခဲ့သည်။ နယ်ကျော်အမှုအောက် လွှတ်ပေးခံရသူများကတော့ ၂၀၀ ကျော်ရှိသည်။
ဓာတ်ပုံ-သူရ/မဇ္ဈိမ
လွတ်မြောက်လာသည့် အကျဉ်းသား ၊ အကျဉ်းသူများကို နိုင်ငံတော်မှ ထောက်ပံ့ပေးထားသည့် ဆန်ငါးပြည်
အပါအဝင် အခြေခံစားသောက်ကုန်များကိုပါ ထောက်ပံ့ပေးခဲ့သည်။
ယနေ့ ပြစ်ဒဏ်လွတ်ငြိမ်းခွင့်အရ ထောင်တွင်းကျန်ရှိနေသူများလည်း အကျိုးခံစားခွင့်ရကြသည်။ သေဒဏ်ကျခံရသူများကို ထောင်ဒဏ်တစ်သက်ပြစ်ဒဏ်သို့ ပြောင်းလဲပေးခြင်းနှင့်
ထောင်ဒဏ် နှစ် (၄၀)အထက် ကျခံနေရသူများကို ထောင်ဒဏ် နှစ် ၄၀ သို့ လျှော့ပေါ့ကျခံစေရန် တို့ဖြစ်သည်။
