ဆိုးလ်၊ ဧပြီ ၁၁
COVID-19 ရောဂါပျောက်ကင်းသွားသည့် လူနာ ၉၁ ဦးတွင် ကိုရိုနာဗိုင်းရပ်စ်ကူးစက်မှု ထပ်မံတွေ့ရှိခဲ့ရကြောင်း တောင်ကိုရီးယားအာဏာပိုင်များက သောကြာနေ့တွင် ပြောသည်။
ကိုရီးယားရောဂါထိန်းချုပ်ကာကွယ်ရေးစင်တာ (KCDC) မှ ဒါရိုက်တာ Jeong Eun-kyeong က လူနာများသည် ပြန်လည်ကူးစက်ခံရခြင်းထက် ဗိုင်းရပ်စ်က ပြန်လည်ရှင်သန်လာခြင်းဖြစ်နိုင်သည်ဟု ဆိုသည်။
ထိုဖြစ်စဉ်နှင့်ပတ်သက်၍ ကျန်းမာရေးအာဏာပိုင်များက ကူးစက်ရောဂါပြန့်ပွားရေးဆိုင်ရာ စုံစမ်းစစ်ဆေးမှုများ ပြုလုပ်လျက်ရှိသည်။
ကိုရီးယားနိုင်ငံတွင် COVID-19 ရောဂါဖြစ်ပွားမှုမှ ပြန်လည်သက်သာလာသူ ၇ ၀၀၀ နီးပါးရှိသည်။
“၉၁ ယောက်မှာ ကိုရိုနာဗိုင်းရပ်စ်ပြန်တွေ့ရတယ်ဆိုတာ အခုမှ အစပဲရှိပါသေးတယ် ၊ အရေအတွက် ပိုတိုးလာနိုင်တယ်၊ ရောဂါဟောင်းပြန်ထလာတာဖြစ်နိုင်တယ် ” ဟု Korea University Guro Hospital မှ ကူးစက်ရောဂါ ဆိုင်ရာ ပါမောက္ခ Kim Woo-joo ကပြောသည်။
စမ်းသပ်မှုမှားယွင်းခြင်း သို့မဟုတ် လူနာတွင် ဗိုင်းရပ်စ်အကြွင်းအကျန်များ ရှိနေခြင်းကြောင့်လည်း ဖြစ်နိုင်သည်ဟု တခြားပညာရှင်များကဆိုသည်။
တောင်ကိုရီးယားတွင် သောကြာနေ့က ကိုရိုနာဗိုင်းရပ်စ်ကူးစက်သူ ၂၇ ဦး ထပ်မံတွေ့ရှိခဲ့သည်။ ဖေဖော်ဝါရီလနှောင်းပိုင်းစ၍ ကူးစက်မှုမြင့်တက်ခဲ့ပြီး တစ်နေ့တာကူးစက်မှုနှုန်း ၉၀၀ အထိပင်ရှိခဲ့ကာ ယခုအခြေအနေသည် အနည်းဆုံးဟု ဆိုရပေမည်။
ဗိုင်းရပ်စ်သည် Daegu မြို့မှစတင်ကာ ကူးစက်ပျံ့နှံ့ခဲ့ခြင်းဖြစ်ပြီး ၎င်းမြို့၌ ကူးစက်ခံရသူ ၆ ၈၀၇ ဦးရှိကာ တစ်နိုင်ငံလုံးကူးစက်ခံရသူဦးရေ၏ ထက်ဝက်ကျော်ခန့်ရှိသည်။
ယနေ့အချိန်အထိ ကိုရီးယားတွင် ကိုရိုနာဗိုင်းရပ်စ်ကူးစက်ခံရသူ ၁၀ ၄၅၀ ဦးရှိပြီး ၂၁၁ ဦး သေဆုံးထားသည်ဟု KCDC က ထုတ်ပြန်ထားသည်။
