အောက်တိုဘာလ ၂၃ ရက်၊ ချင်းမိုင်(မဇ္ဈိမ) ။ ။ နိုင်ငံရေးပြဿနာများကို စစ်ရေးနည်းလမ်းဟောင်းများဖြင့် ဖြေရှင်းသွားမည်ဆိုလျှင် ရှမ်းပြည်တိုးတက်ရေး ပါတီ/ ရှမ်းပြည် တပ်မတော် (SSPP/SSA) သို့ တရားဝင်အကြောင်းကြားပေးရန် ညှိနှိုင်းတင်ပြစာ တစ်စောင်အား ပြည်ထောင်စု ငြိမ်းချမ်းရေးဖော်ဆောင်ရေးလုပ်ငန်းကော်မတီ (UPWC) ဥက္ကဌထံ SSPP က အကြောင်းကြားခဲ့သည်။
SSPP ကမူ နိုင်ငံရေးနည်းလမ်းဖြင့် တွေ့ဆုံဆွေးနွေးဖြေရှင်းသွားနိုင်ရန် ဆန္ဒရှိနေပြီး SSPP/SSA ဌာနချုပ်အနီးအထိ ထိုးစစ်ဆင်နေသော တပ်မတော်စစ်ကြောင်းများအား တားဆီးပေးပါရန် ပြည်ထောင်စု ငြိမ်းချမ်းရေးဖော်ဆောင်ရေးလုပ်ငန်း ကော်မတီ (UPWC) ဥက္ကဌ ဒေါက်တာစိုင်းမောက်ခမ်းထံသို့ အောက်တိုဘာ ၂၁ ရက်စွဲဖြင့် စာရေးသားခဲ့သည်။
“သူတို့ကြည့်ရတာ စစ်ရေးနဲ့ဖြေရှင်းမယ်ထင်တယ်။” ဟုSSPP/SSA ၏ ပြောရေးဆိုခွင့်ရှိသူ ဒုဗိုလ်မှူးကြီး စိုင်းလက မဇ္ဈိမကို ပြောသည်။ စာနှင့်ပတ်သက်၍လည်း UPWC ဘက်မှ အကြောင်းပြန်ကြားခြင်း မရှိသေးကြောင်းလည်း သိရသည်။
ရင်ဆိုင်တိုက်ပွဲ မရှိသော်လည်း အောက်တိုဘာလ ၂၃ ရက် နံနက် ၈ နာရီမှ ၁၂ နာရီခန့်ထိ SSPP ဝမ်ဟိုင်းဌာနချုပ်၏ တောင်ဘက် ၆ မိုင်ကျော် အကွာအဝေးရှိ နမ့်ပူးတောင်းကုန်းများသို့ ကျူမောက်ခေါင်တွင် ခြေကုတ်ယူထားသည့် အစိုးရ စစ်တပ်က လက်နက်ကြီးများဖြင့် အကြိမ်ပေါင်း ၃၀ ခန့် ပစ်ခတ်တိုက်ခိုက်ခဲ့သည်ဟု ဒုဗိုလ်မှူးကြီး စိုင်းလက ပြောသည်။
“ဒီနေ့က ကျနော်တို့ ဝမ်ဟိုင်းအနီး ခြေကုတ်ယူထားသည့် တပ်စခန်းကနေ ၈ နာရီမှာ မနေ့က တိုက်ပွဲဖြစ်တဲ့ တောင်ကုန်း တွေကို လက်နက်ကြီးနဲ့ အလုံး ၃၀ လောက် ပစ်ခတ်ခဲ့တယ်။” ဟု ၎င်းက မဇ္ဈိမကို ပြောသည်။
လက်ရှိ SSPP/SSA ဌာနချုပ်အနီးထိ ထိုးစစ်ဆင်ကို တပ်မတော်ကာကွယ်ရေးဦးစီးချုပ်ရုံး (ကြည်း) မှ ဒုဗိုလ်ချုပ်ကြီး ရာပြည့် ကိုယ်တိုင် ရှေ့တန်းရုံးထိုင်ပြီး ဦးစီးကွပ်ကဲသောကြောင့် နိုင်ငံရေးပြဿနာကို စစ်ရေးနည်းလမ်းဟောင်းဖြင့် ဖြေရှင်းရန် ပြန်လည်ဦးတည်နေသည်ဟု မှတ်ယူကြောင်း ၎င်းတို့ပေးပို့သော စာတွင် ဖော်ပြထားသည်။
အောက်တိုဘာလ ၆ ရက်မှစတင်၍ အစိုးရ တပ်မတော်ဘက်မှ ထိုးစစ်ဆင်တိုက်ခဲ့ခဲ့သဖြင့် တိုက်ပွဲစတင်ဖြစ်ပွားခဲ့ရာမှ အောက်တိုဘာလ ၁၅ ရက်တွင်မူ SSPP/SSA က 'နှစ်ပေါင်းဆယ်ချီကြာ အခြေပြုလာသည့်' တာဆမ်းပူး ကူးတို့ဆိပ်ဂွင်နှင့် စိုးမိုးတောင်ကုန်းများမှ သဘောထားကြီးစွာ ဆုတ်ခွာပေးခဲ့ပြီးဖြစ်သည်ဟုဆိုသည်။
တိုက်ပွဲများ ဆက်လက် ဖြစ်ပွားနေသဖြင့် ဒေသခံ စစ်ပြေးဒုက္ခသည် ၃၀၀၀ ကျော် ရှိလာသည့်ပြင် တပ်မတာ်ဘက်မှ စစ်ရှိန်ပိုမြှင့်လာသဖြင့် စစ်ပြေးဒုက္ခသည်များ ခိုလှုံနေသော ဝမ်ဆော့ဒုက္ခသည်စခန်းနှင့် ဟိုင်းပါဒုက္ခသည်စခန်းများလည်း ဆက်လက်ရှောင်တိမ်းရမည့် အခြေအနေတွင် ရှိနေသည်ဟု ပြောသည်။
