ရေနံချောင်း၊ဇူလိုင် ၆ ။ ။ မကွေးတိုင်းဒေသကြီး ၊ရေနံချောင်းမြို့၊သစ်တစ်ပွေရပ်၊ရွှေဘုံသာအရှေ့ပိုင်းတွင် ကျောက်တူးရာမှ ကျောက်တုံးပိ၍ အမျိုးသားတစ်ဦး သေဆုံးခဲ့မှု ဇူလိုင် ၆ ရက်က ရေနံချောင်းမြို့တွင် ဖြစ်ပွားခဲ့သည်။
ဖြစ်စဉ်မှာ သေဆုံးသူအမျိုးသားသည် ဘေးမဲ့ရပ်၊လေသာကုန်ရပ်ကွက်နေ မိုးမင်း(ခ)ငကြွက်(၂၆)နှစ်ဖြစ်ပြီး ၎င်းမှာ အစ်ကိုဖြစ်သူက နေ့လယ်ထမင်းစားချိန် အိမ်အပြန်တွင် ညီဖြစ်သူ ကျောက်တူးရာနေရာသို့ သွားရောက်ခဲ့ရာ ညီဖြစ်သူမှာ ကျောက်တုံးပိ သေဆုံးနေသည်ကို တွေ့ရှိခဲ့သည်။
သေဆုံးသူသည် ကျောက်တူးရောင်းသူဖြစ်ပြီး ကျောက်တုံးကြီးများကို ခွဲစိတ်၍ ကျောက်တုံးငယ်များ ပြုလုပ်ရောင်းချသူဖြစ်ကြောင်း သစ်တစ်ပွေရပ်ကွက်အုပ်ချုပ်ရေးမှူး ဦးချစ်ကိုကိုက ပြောသည်။
" ဒီကျောက်တုံးကြီးတွေကို ခွဲစိတ်ဖို့အတွက် ကျောက်တုံးကြီးအောက်မှာ ကျင်းတူးပြီး မီးပေးရတယ်။ မီးပေးပြီးမှ ခွဲရတာဖြစ်တယ်၊ ဒီနေ့ဖြစ်စဉ်ကတော့ ၁၀ တန်ကျော်ရှိတဲ့ ကျောက်တုံးကြီးအောက် ကျင်းတူးနေတဲ့အချိန် မြေသားအိပြီး လူပေါ်ပိသေဆုံးတယ်လို့ သိရပါတယ်" ဟု ဦးချစ်ကိုကိုက ပြောသည်။
" သေဆုံးသူကို ရဲဆေးစာနဲ့ရေနံချောင်းမြို့နယ်ပြည်သူ့ဆေးရုံကြီးကို ညနေ ၄ နာရီခွဲအချိန်မှာပေးပို့ထားရှိပြီး ဖြစ်ပါတယ်၊ဖြစ်စဉ်နဲ့ပတ်သက်ပြီး ဓမ္မတာအတိုင်း သေဆုံးခြင်း ဟုတ်၊ မဟုတ်စစ်ဆေးနိုင်ဖို့အတွက် အမှုရေးဖွင့်ဆောင်ရွက်ထားပါတယ်" ဟု ၎င်းက ဆိုသည်။
လက်ရှိတွင် ရေနံချောင်းမြို့မရဲစခန်းမှ မိုးမင်း(ခ)ငကြွက်ကျောက်တုံးပိ သေဆုံးခဲ့ခြင်းနှင့်ပတ်သက်ပြီး သေမှုသေခင်းအမှတ်စဉ် ၅/၂၀၁၉ ဖြင့် အမှုရေးဖွင့်ထားပြီး ရေနံချောင်းမြို့မစခန်းမှူး ဒုရဲမှူး အောင်လွင်ဦးက အမှုကို စစ်ဆေးဆောင်ရွက်လျှက်ရှိကြောင်း သိရသည်။