စက်တင်ဘာ ၃၀၊ ရန်ကုန်။ ။ ၂၀၁၅ အသက် ၂၁ နှစ်အောက် မြန်မာနေရှင်နယ်လိဂ် လူငယ်အမှတ်ပေးဘောလုံးပြိုင်ပွဲတွင် အဆင့် ၂ နေရာမှ ရတနာပုံလူငယ်အသင်းမှာ ရှုံးပွဲ ကြုံတွေ့ခဲ့ပြီး နိုင်ပွဲ ပြန်လည်ရရှိခဲ့သော ရန်ကုန်အသင်းက အမှတ်ပေးဇယား အဆင့် ၁နေရာ မှ ဆက်လက်ဦးဆောင်နေသည်။
ရန်ကုန်လူငယ်အသင်းသည် ပြီးခဲ့သည့်တစ်ပတ်က ကမ္ဘောဇအသင်းကို ရှုံးနိမ့်ခဲ့သော်လည်း ပွဲစဉ် ၂၃ တွင် နေပြည်တော် အသင်းကို ၃-၀ ဂိုးဖြင့် ပြန်လည်အနိုင်ရရှိခဲ့သည်။
ရတနာပုံလူငယ်အသင်းမှာ ပွဲစဉ် ၂၃ တွင် အဆင့် ၄ နေရာမှ ရခိုင်ယူနိုက် တက်အသင်းကို ၄-၃ ဂိုးဖြင့် ရှုံးနိမ့်ခဲ့သည်။ အခြားပွဲစဉ်များတွင် MFF Youth အသင်းက မနောမြေအသင်းကို ၃-၁ ဂိုး၊ ဧရာဝတီအသင်းက မကွေးအသင်းကို ၂-၁ ဂိုး၊ ကမ္ဘောဇအသင်းက ချင်းယူနိုက်တက်အသင်းကို ၅-၁ ဂိုးနှင့် ဟံသာဝတီ အသင်းက ဇေယျာရွှေမြေအသင်းကို ၃-၂ ဂိုးတို့ဖြင့် အနိုင်ရခဲ့သည်။
ပွဲစဉ် ၂၃ အပြီး တွင် ရန်ကုန်အသင်းက စုစုပေါင်း ပွဲစဉ် ၂၁ ပွဲကစားထားပြီး ရမှတ် ၅၁ မှတ်ဖြင့် အမှတ်ပေးဇယား အဆင့် ၁ နေရာမှ ဦးဆောင်နေသည်။ အဆင့် ၂ နေရာမှ ရတနာပုံ လူငယ်အသင်းမှာ ရန်ကုန်အသင်းထက် တစ်ပွဲပို စုစုပေါင်း ပွဲစဉ် ၂၂ ပွဲကစားထားပြီး ရမှတ် ၄၈ မှတ် ရရှိထားသည်။
အသက် ၂၁ နှစ်အောက် မြန်မာနေရှင်နယ်လိဂ် လူငယ်အမှတ်ပေးဘောလုံးပြိုင်ပွဲ ပွဲစဉ် ၂၃ ပွဲပြီးဆုံးချိန်တွင် အမှတ်ပေးဇယား အဆင့် ၂ နေရာမှ ရတနာပုံအသင်းနှင့် အဆင့် ၃ နေရာမှ MFF Youth အသင်းတို့မှာ ရမှတ် ၈ မှတ်ထိ ကွာဟနေသည်။
ထို့ကြောင့် အမှတ်ပေးဘောလုံးပြိုင်ပွဲ ပွဲစဉ်ကုန်ဆုံးချိန်တွင် ချန်ပီယံဖြစ်ရန် အဆင့် ၁ နေရာမှ ရန်ကုန် အသင်းနှင့် အဆင့် ၂ မှ ရတနာပုံလူငယ်အသင်းတို့သာ ရေပန်းစားနေသည်။
သို့သော် လက်ရှိအချိန်တွင် အမှတ်ပေးဇယား ဦးဆောင်နေသော ရန်ကုန်အသင်းမှာ ရတနာပုံအသင်းထက် တစ်ပွဲလျော့၊ ရမှတ် သုံးမှတ် အသာဖြင့် ဦးဆောင်နေသော ကြောင့် ချန်ပီယံဖြစ်ရန် ရာခိုင်နှုန်း ပိုမိုများနေသည်။
လူငယ်အမှတ်ပေးဘောလုံးပြိုင်ပွဲ နောက်ဆုံးပွဲစဉ်မှာ အောက်တိုဘာ ၁၉၊ ၂၀ ရက်များတွင် ပြုလုပ်မည်ဖြစ်ပြီး ပြိုင်ပွဲပြီးဆုံးရန် ပွဲစဉ် သုံးပွဲသာ ကျန်ရှိနေသည်။
