ဒီဇင်ဘာ ၁ ။ ။ မကွေးတိုင်းဒေသကြီး ၊ တောင်တွင်းကြီးမြို့၊ ချောင်းနက်အရှေ့စုကျေးရွာနေ အသက် ၉၁ နှစ်အရွယ် တောင်သူ ဦးစံသိန်းသည် ၎င်းပိုင် မြေယာများကို သီးစားလုပ်ကိုင်နေသူများထံသို့ မြေပိုင်ဆိုင်ခွင့်ချထားပေးခြင်းအပေါ် ကျေနပ်ခြင်းမရှိသည့်အတွက် နိုဝင်ဘာလ ၃၀ ရက်က တတိယအကြိမ်အဖြစ် တစ်ကိုယ်တော်ဆန္ဒထုတ်ဖော်ခဲ့ကြောင်း သိရသည်။
တောင်တွင်း-မကွေးကားလမ်း၊ဘူတာပတ်လမ်း ထိပ်မြို့နယ်လျှပ်စစ်ရုံးအနီးမှစတင်၍ ကားလမ်း အတိုင်း ဆန္ဒထုတ်ဖော်လမ်းလျှောက်လာခဲ့ပြီး မြို့နယ်လယ်ယာမြေစီမံခန့်ခွဲရေးနှင့် စာရင်းအင်းဦးစီးဌာနရုံးရှေ့တွင် ရပ်တန့်၍ ဟောပြောခဲ့ကြောင်း၊ ယင်းနောက် ပုဏ္ဍဝတီလမ်းတစ်လျှောက် လက်ကမ်းစာစောင်များ ဖြန့်ဝေခဲ့ပြီး မြို့နယ်တရားရုံးရှေ့တွင် ထပ်မံဟောပြောခဲ့ကြောင်း၊ နံနက် ၁၀ နာရီခွဲခန့်တွင် ဆန္ဒထုတ်ဖော်ခြင်း ပြီးဆုံးခဲ့ကြောင်း သိရသည်။
ဆန္ဒထုတ်ဖော်ရာတွင် ဘိုးဘွားပိုင်မြေသည် သားသမီးများသာ ပိုင်ဆိုင်ခွင့်ရှိသည်ဆိုသည့် စာတမ်းကို ရင်ဘတ်တွင်ချိတ်ဆွဲ၍ လည်းကောင်း၊ သီးစားသမားများသည် လုပ်ပိုင်ခွင့်သာရှိသည်၊ ပိုင်ဆိုင်ခွင့်မဖြစ်နိုင်ဆိုသည့် စာတမ်းကို နောက်ကျောဘက် တွင်ချိတ်ဆွဲ၍လည်းကောင်း လှည့်လည်ဆန္ဒထုတ်ဖော်ခဲ့ခြင်းဖြစ်ကြောင်းသိရသည်။
" ဘိုးဘွားပိုင်မြေများသည် သားသမီးများသာ ပိုင်ဆိုင်ခွင့် ရှိတယ်။ သီးစားသမားကို မြေပိုင်ရှင်သဘောထားပြီး ပိုင်ဆိုင်ခွင့်ပေးနေတာကတော့ လုံးဝမဖြစ်နိုင်တဲ့အပြင် မဖြစ်သင့်ပါဘူး။ နေ့ဆန္ဒထုတ်ဖော်ရတာကလည်း ကျွန်တော်ပိုင်ဆိုင်တဲ့ ဘိုးဘွားပိုင်ယာမြေတွေကို သီီးစားလုပ်ကိုင်နေသူများ အတွက် ပိုင်ဆိုင်ခွင့်ထားပေးခဲ့ခြင်းအပေါ် ကျေနပ်ခြင်းမရှိတဲ့အတွက် ဆန္ဒထုတ်ဖော်တာပါ” ဟု တောင်သူ ဦးစံသိန်းက ပြောသည်။
ထိုသို့ တစ်ကိုယ်တော်လမ်းလျှောက်ဆန္ဒပြမှုမှာ တတိယအကြိမ်ဖြစ်ပြီး ၂၀၁၇ ခုနှစ် သြဂုတ်လ ၁၄ ရက်က တစ်ကြိမ်၊၂၀၁၈ခုနှစ် ဧပြီလ ၉ရက်နေ့ကတစ်ကြိမ်တစ်ကိုယ်တော်လမ်းလျှောက် ဆန္ဒပြခဲ့ကြောင်း သိရသည်။
၂၀၁၂ ခုနှစ် လယ်ယာမြေဥပဒေပါ အချို့အချက်များသည် တရားမျှတ မှုမရှိဟု ထင်မြင်မိကြောင်း၊ ဒီမိုကရေစီစနစ်ကို လျှောက်လှမ်းနေစဉ်တွင် မြေပိုင်ရှင်က လယ်ယာမဲ့ဖြစ်နေသည်ကို ထည့်သွင်းစဉ်းစားသင့်ကြောင်း၊ လယ်ယာမြေဥပဒေကို ကမ္ဘာ့ဒီမိုကရေစီစနစ်နှင့်သွားမည်လား၊ မြန်မာ့ဒီမိုကရေစီစနစ်နှင့် သွားမည်လားဆိုသည်ကို အထူးထည့်သွင်းစဉ်းစားပေးစေလိုကြောင်း ဒုတိယအကြိမ်ဆန္ဒထုတ်ဖော်စဉ်ကတောင်သူ ဦးစံသိန်းက ပြောသည်။
ယခုတတိယအကြိမ်ဆန္ဒထုတ်ဖော်ခြင်းတွင်ကမ်းဝေခဲ့သောလက်ကမ်းစာစောင်များတွင် သီးစားသမားသည် လုပ်ပိုင်ခွင့်သာရှိပြီးပုံစံ(၇)မပြနိုင်သည့်အတွက်ပိုင်ဆိုင်သူမဖြစ်နိုင်ကြောင်း၊ဦးနေဝင်းပြောသွားသည့်လယ်ယာမြေဥပဒေသည် ကောက်ရိုးမီးသဖွယ်ဖြစ်ကြောင်း၊ဦးသိန်းစိန်ရေးဆွဲခဲ့သောလယ်ယာမြေဥပဒေသည် လျှပ်စစ်မီးကဲ့သို့တငွေ့ငွေ့လောင်ကျွမ်းနေပြီး ၎င်းဥပဒေမှာစစ်အစိုးရအုပ်ချုပ်ချိန် ရေးဆွဲသောဥပဒေဖြစ်ကြောင်းပါရှိသည်။
၎င်းအပြင် လယ်ယာမြေဥပဒေသည် ပြည်သူများနစ်နာမှူ မရှိစေရေးဆိုသည့်စကားရပ်နှင့်ကိုက်ညီမှူ မရှိကြောင်း၊ မြေပိုင်ရှင်များ ငတ်ပြတ်နေသလောက် သီးစားသမားများ ကြွယ်ဝချမ်းသာနေကြသဖြင့် လယ်ယာမြေဥပဒေကို လက်ရှိဒီမိုကရေစီအစိုးရက ပြင်ဆင်ပေးရန် တောင်းဆိုခြင်းဖြစ်သည်ဟု ပါရှိသည်။
