ဩဂုတ် ၄၊ စစ်ကိုင်း။ ။ စစ်ကိုင်းတိုင်းဒေသကြီး စစ်ကိုင်းမြို့ စစ်ကိုင်းတောင်ရိုး IBEC အပြည်ပြည်ဆိုင်ရာ ဗုဒ္ဓဘာသာပညာရေးစင်တာ ကျောင်းတိုက်တွင် ဩဂုတ်လ ၄ ရက် မနက်ပိုင်း၌ ပဉ္စမအကြိမ်မြောက် ပဲအလှူတော် ကျင်းပပြုလုပ်ခဲ့သည်။
အခမ်းအနားတွင် ကြွရောက်တော်မှုလာကြကုန်သော သံဃာတော် ဆရာတော်များအား ပဲများလှူဒါန်းခြင်း၊ ရေစက်ချအခမ်းအနားတွင် သီတဂှုဆရာတော် ဘုရားကြီးက ရေစက်သွန်းချ အမျှအတန်း ပေးဝေခြင်းများ ပြုလုပ်ခဲ့ကြောင်း သိရသည်။
" တစ်ကြိမ်လှူရင် သိန်းတစ်ထောင်နီးပါးကုန်ကျခံ လှူဒါန်းတယ် ။ အခုလို လှူတန်းတာက တစ်စုံတစ်ဦးတည်း မတည်လှူဒါန်းခြင်း မဟုတ်ဘဲ IBEC တပည့်သာဝကတွေက စုပေါင်းလှူဒါန်းခြင်းသာ ဖြစ်တယ် ။ သီတဂှု ရေအလှူ၊ ဇီဝိတဒါန ဆေးအလှူ၊ဓမ္မဒုတ ဆရာတော် ဘုရားမှ ဆီ၊ဆန်၊ဆား၊ဆေး အလှူနဲ့ မန္တလေးမှာ မလွန် ဆန်အလှူ၊ IBEC မှ ပဲအလှူပေါ့ " ဟု IBEC ဆရာတော် ဦးသောဘိတက မိန့်ကြားသည်။
စစ်ကိုင်းတောင်ရိုး၊မင်းဝံတောင်ရိုးနှင့် မင်းကွန်းဒေသအတွင်းရှိ သီတင်သုံးနေထိုင်တော်မှုကြသည့် သံဃာ အရှင်သူမြတ်များ၊သာသနနွယ်ဝင် သီလရှင်ဆရာလေးများအတွက် ဆွမ်း ဟင်းအဆင်ပြေစေဖို့ ရည်ရွယ်၍ တစ်ပါးလျှင်ပဲနှစ်ပြည်နှုန်း စုစုပေါင်း သံဃာ နှစ်သောင်းတစ်ထောင်ကျော် လှူခဲ့ကြောင်း သိရသည်။
ပဲအလှူတော်ကို စတော့ဟုမ်း ကမ္ဘာ့ငြိမ်းချမ်းရေးဆုရှင် IBEC ဆရာတော် ဦးသောဘိတ ဦးဆောင်၍ အလှူရှင်အများ စုပေါင်းလှူတာဖြစ်ပြီး ဩဂုတ်လ ၄ ရက်နေ့မှ ၈ နေ့အထိ (၄)ရက်တာ ကျင်းပသွားမည်ဖြစ်ကာ ဓမ္မသဘင်အစီအစဉ်များအဖြစ် ဒေါက်တာ နန္ဒမာလာဘိဝံသ(အပြည်ဆိုင်ရာ ထေရဝါရ သာသနာပြုတက္ကသိုလ် ပါမောက္ခချုပ်ဆရာတော်)၊မြစြင်္ကာဆရာတော်၊IBEC ပဓာန နာယကဆရာတော် ဘန္တတသောဘိတ တို့မျှ တရာဒေသနာတော်များ ဟောကြား ကျင်းပသွားမည်ဖြစ်သည်။
ယင်းသို့ ပဲအလှူတော်ကို ၂၀၁၄ ခုနှစ်မှ စတင်၍ လှူဒါန်းလာတာဖြစ်ပြီး တစ်နှစ်လျှင် သိန်းတစ်ထောင်ခန့် အကုန်ကျခံ လှူဒါန်းကာ နှစ်စဉ် နှစ်တိုင်း ဆက်လက်လှူဒါန်းသွားမည်ဖြစ်ကြောင်း သိရသည်။
