ဇူလိုင် ၃၀ ။ ။ ဂရိနိုင်ငံ အေသင်မြို့မှာ တောမီးလောင်ကျွမ်းမှုကြောင့် သေဆုံးသူ ၉၁ ယောက်ရှိပြီလို့ မီးသတ်ဌာနက ဒီကနေ့မှာပဲ ထုတ်ပြန်ကြေညာလိုက်ပါတယ်။
ပြီးခဲ့တဲ့အပတ် တနင်္လာနေ့က လောင်ကျွမ်းခဲ့တဲ့ မီးဟာ ၁၉၀၀ ခုနှစ်နောက်ပိုင်း ဥရောပမှာ ကြောက်စရာအကောင်းဆုံးတောမီးလောင်ကျွမ်းမှုဖြစ်တယ်လို့ သိရပါတယ်။
မာတီကမ်းစပ်မြို့နားမှာ သေဆုံးနေသူ ၈၇ ယောက်ရှိပြီး ကျန် ၄ ယောက်က ဆေးရုံမှာ သေဆုံးသွားကြတာဖြစ်ပါတယ်။
“သေဆုံးသူ ၅၉ ယောက်ကိုပဲ စုံစမ်းဖော်ထုတ်နိုင်ခဲ့ပြီး ၂၅ ယောက်ပျောက်ဆုံးနေပါသေးတယ်။ ဆေးရုံတက်နေတဲ့လူနာလည်း ၄၅ ယောက်ရှိပါတယ်။”လို့ မီးသတ်ဌာနက ပြီးခဲ့တဲ့တနင်္ဂနွေနေ့မှာ ထုတ်ပြန်ထားပါတယ်။
မီးသတ်သမား၊ ရဲတပ်ဖွဲ့ဝင်တွေဟာ မီးဘေးသင့်ဒေသတစ်ဝိုက်မှာ သေဆုံးဒဏ်ရာရသူရှိမရှိ ဆက်လက်ရှာဖွေလျက်ရှိပါတယ်။
