နေပြည်တော်၊ ဇူလိုင် ၉ ရက် ။ ။ ပါတီ အမည်ပေးမှုနှင့်ပတ်သက်ပြီး အငြင်းပွားဖွယ်ရာများရှိခဲ့သည့် ရှစ်လေးလုံးပြည်သူ့ပါတီကို ပြည်သူ့ပါတီဟု အမည်ပြောင်းလဲသတ်မှတ်ရန် ဇူလိုင်လ ၈ ရက်နေ့က မန္တလေးမြို့တွင် ကျင်းပပြုလုပ်ခဲ့သည့် ပါတီအမည်၊ အလံနှင့်အမှတ်တံဆိပ်ပြောင်းလဲခြင်းကို နိုင်ငံရေးပါတီဖြစ်မြောက်ရေး ကော်မတီအစည်းအဝေး တတိယအကြိမ် စုံညီအစည်းအဝေးအပြီးတွင် ယခုကဲ့သို့ပြောင်းလဲရန် ဆုံးဖြတ်ခဲ့ကြခြင်းဖြစ်သည်။
“ကျွန်တေ်ာတို့က ကော်မရှင်ကနေပြီးတော့ ကျွန်တော်တို့ အကြောင်းကြားချက်အရ ဇူလိုင်လ ၁၃ရက်နေ့ မတိုင်ခင် တင်ရမယ်ဆိုတဲ့အတွက် ဒါ ကျွန်တေ်ာတို့ ပါတီရဲ့ မနေ့က မန္တလေး ဆုံးဖြတ်ချက်အရသာ ကျွန်တော်တို့ လာတင်တာပါ” ဟု ပြည်သူ့ပါတီ ဒုတိယခေါင်းဆောင် ဦးရဲနိုင်အောင်က ပြောသည်။
ရှစ်လေးလုံးပြည်သူ့ပါတီအနေဖြင့် ဇူလိုင်လ ၁၃ ရက်မတိုင်မီ ပါတီနာမည်၊ အလံနှင့်အမှတ်တံဆိပ်များကို ရွေးကောက်ပွဲကော်မရှင်သို့ တင်သွင်းခြင်းမရှိပါက ပါတီထူထောင်ခွင့် အလိုအလျောက် ပျက်ပြယ်သွားမည် ဖြစ်သောကြောင့် ယနေ့ ဇူလိုင်လ ၉ ရက်နေ့တွင် ပြည်သူ့ပါတီဟု ရွေးကောက်ပွဲကော်မရှင်ရုံးသို့ ပါတီအမည်၊ အလံတံဆိပ်နှင့် အမှတ်တံဆိပ်များကို လာရောက် မှတ်ပုံတင်ခြင်း ဖြစ်သည်။
“လုပ်ထုံးလုပ်နည်းအရတော့ ဒါတင်ပြီးသွားတယ်ဆိုရင် ရွေးကောက်ပွဲကော်မရှင်ကနေ ဒီရက်ပိုင်းအတွင်းကို သတင်းစာတွေကနေ ကန့်ကွက်ရန်ရှိမရှိ ပေါ့နော်။ အဲဒါ ထည့်မယ်။ အဲဒါ ထည့်ပြီးသွားရင် ပြည်ထဲရေးကို ကျွန်တေ်ာတို့ ပါတီရဲ့ အမည်အမှတ်တံဆိပ် အလံနဲ့ ပတ်သက်လို့ သူတို့ရဲ့ သဘောထားထင်မြင်ချက် တွေ တောင်းမယ် ။ အဲဒါ ပြီးသွားရင်တော့ ဒါ ကျွန်တေ်ာတို့ အကုန်လုံးကင်းရှင်းမယ်လို့ ကျွန်တေ်ာတို့ မျှော်လင့်တယ်”ဟု ဦးရဲနိုင်အောင်က ဆက်လက်ပြောသည်။
ရွေးကောက်ပွဲကော်မရှင်ထံတွင် ပြည်သူ့ပါတီဆိုသည့် အမည်ဖြင့် ခွင့်ပြုပြီး သို့မဟုတ် လျှောက်ထားဆဲ စသည့်ကိစ္စရပ်များမရှိသည့်အတွက် ယခုတစ်ကြိမ်တွင် သတ်မှတ်ထားသည့်လုပ်ထုံးလုပ်နည်းများနှင့် အညီ ယခုလပိုင်းအတွင်း ပြန်လည်ခွင့်ပြုမည်ဟု မျှော်လင့်ထားကြောင်း ၄င်းက ဆက်လက်ပြောသည်။
ယခင်က ရှစ်လေးလုံးပြည်သူ့ပါတီအမည်၊ အလံနှင့် အမှတ်တံဆိပ်တို့ဖြင့် ပါတီထူထောင်ရန် ရွေးကောက်ပွဲ ကော်မရှင်တွင် တင်ပြထားပြီး ကော်မရှင်မှ ထို အမည်၊ အလံနှင့် အမှတ်တံဆိပ်များကို ကန့်ကွက်နိုင်ကြောင်း ကြေညာပြီးနောက် လက်မှတ်ထိုးကန့်ကွက်သူ ၂၀၀ကျော်ရှိခဲ့သည်။
ထိုသို့ အမည်၊တံဆိပ်နှင့် အလံများ ပြောင်းလဲရန် ကော်မရှင်မှ ဆုံးဖြတ်ချက်များသည် ဥပဒေ၏ သတ်မှတ်ပြဌာန်းချက်များနှင့် မညီ ကြောင်း နိုင်ငံရေးပါတီဖြစ်မြောက်ရေးကော်မတီမှ ပါတီခေါင်းဆောင်များက ပြောထားသည်။
