စက်တင်ဘာ ၂ ။ ။ ဘယ်လ်ဂျီယံနိုင်ငံ ဘရပ်ဆဲလ်မြို့၌ လေးရက်ကြာကျင်းပမည့် ဆွေးနွေးပွဲသို့ စရိတ်ငြိမ်း တက်ရောက် နိုင်ရန် ၂၀၁၅ ခု သတင်းစာဆရာပြိုင်ပွဲ ကျင်းပမည်ဟု သိရသည်။
အာရှနိုင်ငံများမှ သတင်းစာဆရာများနှင့် ဘရပ်ဆဲလ်မြို့၌ တွေ့ဆုံနိုင်မည့် နိုဝင်ဘာ ၁၆ ရက်မှ ၁၉ ရက်ထိ ဆွေးနွေးပွဲ၌ မြန်မာနိုင်ငံမှ သတင်းစာဆရာနှစ်ဦးကိုရွေးချယ်မည် ဟု မြန်မာနိုင်ငံဆိုင်ရာ ဥရောပကိုယ်စားလှယ်အဖွဲ့က စက်တင်ဘာ ၁ ရက်တွင် ထုတ်ပြန်သည်။
ဥရောပသမဂ္ဂနှင့်ပတ်သက်၍ ပိုမိုနားလည်ပြီး၊ မြန်မာနိုင်ငံနှင့် ဥရောပသမဂ္ဂအကြား ဆက်ဆံရေး အဓိကအချက်များ၊ ပြည်တွင်းနှင့်ကမ္ဘာလုံးဆိုင်ရာ ကိစ္စများ ဆွေးနွေးကြမည်ဖြစ်သည်။
လျှောက်ထားသူသည် နိုင်ငံတကာဆက်ဆံရေးနှင့် ဥရောပသမဂ္ဂအကြောင်း စိတ်ဝင်စားရမည်ဖြစ်ပြီး မြန်မာနိုင်ငံကူးလက်မှတ်ကိုင်ဆောင်သူ၊ အင်္ဂလိပ်စာကျွမ်းကျင်ရမည်ဖြစ်သည်။
ကိုယ်ရေးမှတ်တမ်းနှင့်အတူ ဥရောပသမဂ္ဂနှင့် မြန်မာနိုင်ငံ ဆက်ဆံရေး၊ ဥရောပသမဂ္ဂ အကြောင်းများကို စာတစ်စောင် ရေးသား၍ ၂၀၁၅ ခု၊ စက်တင်ဘာ ၁၁ တွင် [email protected] သို့ ပေးပို့ရမည်ဖြစ်သည်။
Ref; Myanma Alinn