MIC အနေဖြင့် လုပ်ငန်းပါမစ်ချရာ၌ အချိန်ကြာမြင့်မှုကို လျှော့ချသွားနိုင်ရန် ပြင်ဆင်နေ

MIC အနေဖြင့် လုပ်ငန်းပါမစ်ချရာ၌ အချိန်ကြာမြင့်မှုကို လျှော့ချသွားနိုင်ရန် ပြင်ဆင်နေ
ဓာတ်ပုံ-MOI

ဇွန် ၂၄ ။         ။ မြန်မာနိုင်ငံရင်းနှီးမြှုပ်နှံမှုကော်မရှင် (MIC) အနေဖြင့် လုပ်ငန်းပါမစ်ချပေးရာ၌ အချိန်ကြာမြင့်မှုကို လျှော့ချ သွားနိုင်ရန် ပြင်ဆင်နေကြောင်း မြန်မာနိုင်ငံရင်းနှီးမြှုပ်နှံမှုကော်မရှင် ဥက္ကဋ္ဌ ဦးသောင်းထွန်းက ပြောကြားသည်။

ဇွန်လ ၂၂ ရက်က American Chamber of Commerce (AMCHAM)၊ Australian Chamber of Commerce (AustCham)၊ British Chamber of Commerce in Myanmar၊ European Chambers of Commerce (EUROCHAM) တို့မှ ကိုယ်စားလှယ်များနှင့် ရန်ကုန်မြို့ရှိ Melia ဟိုတယ်၌ တွေ့ဆုံခဲ့ပြီးနောက် ပြောကြားခဲ့ ခြင်း ဖြစ်သည်။

“ အရင်က MIC ရဲ့ ပါမစ်ချပေးရေး လုပ်ငန်းစဉ်ဟာ ခြောက်လကနေ ဒီထက်ပို အချိန်ကြာမြင့်တယ်လို့ တိုင်ကြားမှုတွေ ရှိနေပါတယ်။ MIC ပါမစ်ရော၊ MIC ထောက်ခံချက်ရေး လျှောက်ထားရေး လုပ်ငန်းစဉ်မှာ တင်းကြပ်တဲ့ အချိန်အကန့်အသတ်တွေကြောင့် ဖြစ်ပေါ်ရနေတဲ့ ဒီအခြေအနေကို ပြောင်းလဲဖို့ ခု ကျွန်တော်တို့ ကြိုးစားတော့မှာပါ။ လက်ရှိမှာ ဒီအတွက် ရက် ၆၀ လောက် အချိန်ပေးနေရတာကို ကျွန်တော် နားလည် ပါတယ်။ ဒါကို လျှော့ချသွားနိုင်ရေး ပြင်ဆင်နေပါပြီ” ဟု မြန်မာနိုင်ငံရင်းနှီးမြှုပ်နှံမှုကော်မရှင် ဥက္ကဋ္ဌ ဦးသောင်းထွန်းက ဆိုသည်။

မြန်မာ့ရင်းနှီးမြုပ်နှံမှုဥပဒေ ၂၀၁၆ နဲ့ မြန်မာရင်းနှီးမြုပ်နှံမှုနည်းဥပဒေ ၂၀၁၇ အရ အပြောင်းအလဲများ ဖြစ်ပေါ်နေပြီး နိုင်ငံခြားရင်းနှီးမြှုပ်နှံသူများအတွက် ကာလရှည် မြေငှားရမ်းခွင့် ပိုမိုလွယ်ကူစေမည်ဖြစ်ကြောင်း ထည့်သွင်း ပြောဆိုခဲ့သည်။

၂၀၁၇ ဒီဇင်ဘာ ၆ ရက်က လွွှတ်တော်တွင် အတည်ပြုခဲသော မြန်မာကုမ္ပဏီဥပဒေအရ နိုင်ငံခြားသားများအား ပြည်တွင်းကုမ္ပဏီများ၌ ရှယ်ယာ ၃၅ ရာခိုင်နှုန်း အထိ ပိုင်ဆိုင်ခွင့် ပြုထားကာ အဆိုပါကုမ္ပဏီများကို ပြည်တွင်း ကုမ္ပဏီများအဖြစ် သတ်မှတ်သွားမည် ဖြစ်သည်။

အဆိုပါ ဆွေးနွေးပွဲသို့ ကော်မရှင် ဒုတိယဥက္ကဋ္ဌ ပြည်ထောင်စုဝန်ကြီး ဒေါက်တာသန်းမြင့် အပါအဝင် ကော်မရှင် အဖွဲ့ဝင်များ တက်ရောက်ခဲ့ပြီး မြန်မာနိုင်ငံ၏ ရင်းနှီးမြှုပ်နှံမှု အခွင့်အလမ်းများနှင့် စိန်ခေါ်မှုများအပေါ် ဆွေးနွေးခဲ့ကြကြောင်း သိရသည်။

၂၀၁၇-၁၈ ဘဏ္ဍာနှစ် မတ်လအထိ မြန်မာနိုင်ငံရင်းနှီးမြှုပ်နှံမှုကော်မရှင်အနေဖြင့် ၄ ဒသမ ရ ဘီလီယံ တန်ဖိုးရှိ နိုင်ငံခြားရင်းနှီးမြှုပ်နှံမှုလုပ်ငန်း ၂၂၂ ခု စိစစ်ခွင့်ပြုခဲ့ပြီး ရင်းနှီးမြှုပ်နှံမှုတိုးမြှင့်ခြင်းအပါအဝင် စုစုပေါင်း ရင်းနှီးမြှုပ်နှံမှု ပမာဏမှာ အမေရိကန်ဒေါ်လာ ၅ ဒသမ ရ၁၇ ဘီလီယံဖြစ်ကြောင်း သိရသည်။

ယင်းအပြင် အထူးစီးပွားရေးဇုန်ဥပဒေအရ သီလဝါ အထူးစီးပွားရေးဇုန်တွင် ရင်းနှီးမြှုပ်နှံမှုပမာဏ အမေရိကန် ဒေါ်လာ ၃၉၈ သန်းကျော်ခွင့်ပြုခဲ့သဖြင့် စုစုပေါင်း ရင်းနှီးမြှုပ်နှံမှုပမာဏမှာ အမေရိကန်ဒေါ်လာ ၆ ဒသမ ၁၁ ဘီလီယံ ဖြစ် ကြောင်း ထုတ်ပြန်ထားသည်။

Mizzima Weekly

Tags