မက်ဒရစ်၊ မေ ၂၉ ။ ။ စပိန်နိုင်ငံတော်တရားရုံးက လက်ရှိအာဏာရ လက်ယာယိမ်းပါတီမှ ထိပ်သီးခေါင်းဆောင်ဟောင်း ၃ ဦးကို အကျင့်ပျက်ခြစားမှုများကြောင့် ဆယ်စုနှစ် ၃ စုကျော်ခန့် ထောင်သွင်းအကျဉ်းချရန် တနင်္လာနေ့က အမိန့်ချမှတ်ခဲ့သည်။
Popular Party (PP) ၏ ဘဏ္ဍာရေးမှူးဟောင်းဖြစ်သူ လုဇ်ဘာစီနက်စ်ကို ထောင်ဒဏ် ၃၃ နှစ်နှင့် ၄လ၊ မြို့တော်ဝန်ဟောင်းဖြစ်သူ ဂွီလာမိုအော်တီဂါကို ထောင်ဒဏ် ၃၈ နှစ်နှင့် ၃ လ၊ မက်ဒရစ်ဒေသတွင်းအစိုးရအဖွဲ့ မှ ၀န်ကြီးဟောင်းဖြစ်သူ အယ်ဘာတိုလိုပက်ဇ်ဗီဂျိုအား ထောင်ဒဏ် ၃၁ နှစ်နှင့် ၉ လ အသီးသီး ချမှတ်ခဲ့ခြင်း ဖြစ်ပြီး အလွဲသုံးစားလုပ်မှု၊ လာဘ်ထိုးမှု၊ လိမ်လည်မှု၊ လိမ်လည်အတုလုပ်မှု၊ ပြည်သူ့ဘဏ္ဍာများ အလွဲသုံးစား လုပ်မှု၊ ငွေမဲခဝါချမှု၊ အခွန်ရှောင်မှုတို့အပြင် အခြားသောပြစ်မှုများစွာဖြင့် ယခုလို ပြစ်ဒဏ်ချမှတ်ခံခဲ့ရခြင်းဖြစ် သည်။
ဂူအာတယ်လ်အမှုအခင်းဟု လက်ရှိအချိန်တွင်နာမည်ကြီးနေသည့် အစိုးရထိပ်သီးခေါင်းဆောင်ဟောင်းများ ထောင်ချခံရသည့် ယခုဖြစ်ရပ်အတွင်း၌ အခြားလူပေါင်း ၁၅ ဦးခန့်လည်း ပြစ်ဒဏ်ချမှတ်ခံခဲ့ရသလို ဘာစီနက်စ် ၏ ဇနီးဖြစ်သူ ရိုဆာလီယာအစ်ဂလီယက်စ်လည်း ထောင်ဒဏ် ၁၅ နှစ် ချမှတ်ခံခဲ့ရသည်။
တရားရုံးအနေဖြင့် အယူခံဝင်မှုများကို လက်မခံမီ လာမည့် ဗုဒ္ဓဟူးနေ့တွင် ထိုသူအားလုံးကို ထောင်ထဲသို့ ချက်ချင်းပို့ဆောင်ခြင်းပြုမပြုကို ဆုံးဖြတ်သွားမည်ဟု သိရသည်။
PP ပါတီမှ လက်ရှိစပိန်ဝန်ကြီးချုပ် မာရီယာနိုရေးဂျွိုင်းသည်လည်း ဂူအာတယ်လ်ဖြစ်ရပ်အတွင်း ငွေကြေးအရ ပါ၀င်ပက်သက်မှုများရှိပြီး ပြစ်မှုထင်ရှားသည်ဟု ကြာသာပတေးနေ့က အမိန့်ချမှတ်ခံခဲ့ရသည်။