မေ ၁၁ ။ ။ ကွန်ဂို ဒီမိုကရက်တစ်သမ္မတနိုင်ငံမှာ အီဘိုလာ ရောဂါ ကူးစက်မှုဖြစ်စဉ်များ ထပ်မံပေါ်ပေါက်လာခဲ့ပြီးနောက် ယင်းနိုင်ငံ၏ အဆိုးရွားဆုံး အခြေအနေအတွက် ပြင်ဆင်မှုများ လုပ်ဆောင်နေလျက်ရှိကြောင်း ကမ္ဘာ့ကျန်းမာရေးအဖွဲ့ကြီး WHO က မေလ ၁၁ ရက်မှာ ထုတ်ပြန်ပြောကြားလိုက်သည်။
" ကွန်ဂိုက အခြေအနေတွေအတွက် များစွာ စိုးရိမ်ပူပန်နေရပါတယ်၊ ဖြစ်လာနိုင်မယ့် အခြေအနေအားလုံးအတွက် စီစဉ်နေပါတယ်၊ အဆိုးဆုံးအခြေအနေအတွက်လည်း ပြင်ဆင်ထားပါတယ်" ဆိုပြီး WHO ၏ အရေးပေါ် အခြေအနေ တုန့်ပြန်ဆောင်ရွက်မှု ဌာနအကြီးအကဲ ပီတာ ဆာလာမာက ပြောသည်။
အဆိုပါ ဗဟိုအာဖရိကနိုင်ငံ၏ အနောက်မြောက်ပိုင်း ဘီကိုရိုဧရိယာတွင် အီဘိုလာ ရောဂါ ကူးစက်သည်ဟု သံသယရှိသည့် ဖြစ်စဉ်များ သို့မဟုတ် အတည်ပြုပြီး ဖြစ်စဉ်အရေအတွက်မှာ ၃၂ ခုအထိ ရှိနေပြီး ဧပြီလ ၄ ရက်နှင့် မေလ ၉ ရက်အကြား သေဆုံးသူ ဦးရေ ၁၈ ဦးထိ ရှိလာပြီဖြစ်ကြောင်း WHO ကထုတ်ပြန်သည်။
အီဘိုလာရောဂါသည် သေစေလောက်သည့် အဖျားရောဂါတမျိုးဖြစ်ပြီး ရောဂါဖြစ်ပွားသူ ၅၀ ရာခိုင်နှုန်းကနေ ၉၀ ရာခိုင်နှုန်းအထိ သေဆုံးမှုရှိတာကို တွေ့ရှိထားခဲ့ရသည်။
ယခုတစ်ကြိမ် အီဘိုလာ ဖြစ်ပွားမှုသည် ယင်းနိုင်ငံတွင် ၁၉၇၆ ခုနှစ် နောက်ပိုင်း ကိုးကြိမ်မြောက် ဖြစ်ပွားမှုလည်း ဖြစ်သည်။