ရန်ကုန်တိုင်းရှိ ရင်းနှီးမြှုပ်နှံမှုအခွင့်အလမ်းများအား Yangon Investment Forum တွင် အသိပေးသွားမည်

ရန်ကုန်တိုင်းရှိ ရင်းနှီးမြှုပ်နှံမှုအခွင့်အလမ်းများအား Yangon Investment Forum တွင် အသိပေးသွားမည်

 

Yangon Investment Forum 2018 ကို ရန်ကုန်တိုင်းဒေသကြီးအတွင်းရှိ ရင်းနှီးမြှုပ်နှံမှုအခွင့်အလမ်းများအား ရင်းနှီးမြှုပ်နှံသူများ သိရှိစေရန် ရည်ရွယ်ကာ လာမည့်မေလ ၉ ရက် Novotel Hotel တွင် ကျင်းပ ပြုလုပ် သွားမည်ဖြစ်ကြောင်း သိရသည်။

အဆိုပါဖိုရပ်ကို ရန်ကုန်တိုင်းဒေသကြီး ရင်းနှီးမြှုပ်နှံမှုကော်မတီက ဦးဆောင်ကာ  ရင်းနှီးမြှုပ်နှံမှုနှင့် ကုမ္ပဏီများ ညွှန်ကြားမှုဦးစီးဌာန၊ ကုန်သည်စက်မှုအသင်းချုပ်၊ German Cooperation Implemented Through GIZ နှင့် မြန်မာနိုင်ငံရင်းနှီးမြှုပ်နှံသူများ ဖွံ့ဖြိုးတိုးတက်ရေး (MIDA) တို့၏ ပူးပေါင်းပံ့ပိုးမှုဖြင့် ပြုလုပ်ခြင်းဖြစ်သည်။

ယင်းတို့အပြင် PwC Myanmar တို့ ပူးပေါင်းကာ  Pavilion (၄)ခုတို့ဖြင့် Investment Application Guide Book၊  Doing Business in Yangon နှင့်  Taxation Guide Book တို့ အပါအဝင် တက်ရောက်လာမည့် ရင်းနှီးမြှုပ်နှံသူလုပ်ငန်းရှင်များ အ တွက် လိုအပ်သော သတင်းအချက်အလက်များနှင့် လုပ်ထုံးလုပ်နည်းဆိုင်ရာ များကို ပြသသွားမည်ဖြစ်သည်။

" ရန်ကုန်မြို့ရဲ့ရင်းနှီးမြုပ်နှံမှုတွေကို လာရောက်ရင်းနှီးမြုပ်နှံသူတွေကို ရှင်းပြဖို့အစီအစဉ်အနေနဲ့က မြေရှားပါးမှု ကိစ္စလို အခြေအနေမျိုး၊ အခွန်အကောက်လိုအခြေအနေမျိုးတွေကို ရှင်းရှင်းလင်းလင်းနားလည် လွယ်ကူနို်င်ဖို့ အတွက်၊ လာရောက်ရင်းနှီးမြှုပ်နှံမယ်ဆိုရင် ကုမ္ပဏီမှတ်ပုံတင်လုပ်မယ်။ နိုင်ငံခြားရင်းနှီးမြှုပ်နှံမှုကို တင်ပြမယ် ဆိုရင် ဘယ်လိုပုံစံမျိုးတင်ပြရမယ်။ ဘယ်လိုအခွင့်အရေးတွေ ရနိုင်တယ်ဆိုတဲ့ အခြေအနေတွေကို ရှင်းလင်း ပြောပြခြင်းဖြင့် ကျွန်တော်တို့တိုင်းပြည်ကို လာရောက်ရင်းနှီးမြှုပ်နှံခြင်းဟာ ခက်ခဲမှုအနည်းဆုံးနဲ့ လွယ်ကူ ချောမွေ့စေဖို့အတွက် ဘယ်လိုဆောင်ရွက်ပေးမယ်ဆိုတာ နိုင်ငံတကာရင်းနှီးမြှုပ်နှံသူတွေကို ဖိတ်ခေါ်ဖို့ဖြစ်ပါ တယ် " ဟု ရန်ကုန်တိုင်းဒေသကြီး ရင်းနှီးမြှုပ်နှံမှုကော်မတီဥက္ကဋ္ဌ၊ ရန်ကုန်တိုင်းဒေသကြီး ၀န်ကြီးချုပ် ဦးဖြိုးမင်းသိန်းက  ဧပြီလ ၂၀ ရက်က ကုန်သည်စက်မှုအသင်းချုပ်တွင် ပြုလုပ်သည့် သတင်းစာရှင်းလင်းပွဲတွင် ပြောကြားခဲ့သည်။

ရန်ကုန်တိုင်းဒေသကြီး ရင်းနှီးမြှုပ်နှံမှုကော်မတီက ဖိုရပ်၏ နံနက်ပိုင်းတွင် New Investment Application Procedure နှင့် မွန်းလွဲပိုင်းတွင် Investment Opportunities in the Yangon Region ကို ဆွေးနွေးကာ ပြည်တွင်း၊ ပြည်ပလုပ်ငန်းရှင်များ ဆက်သွယ်မှုများ ရရှိစေရန် ညပိုင်းတွင် MIDA က Networking Dinner အား ပြုလုပ်သွားမည်ဖြစ်သည်။

ယင်းဖိုရပ်အတွင်း မြန်မာနိုင်ငံရင်းနှီးမြှုပ်နှံမှုဥပဒေ၊ နည်းဥပဒေနှင့် ရင်းနှီးမြှုပ်နှံမှုနှင့် ဆက်စပ်သော တည်ဆဲ ဥပဒေ၊ နည်းဥပဒေ လုပ်ထုံးလုပ်နည်းများ၊ ရန်ကုန်တိုင်းဒေသကြီး ရင်းနှီးမြှုပ်နှံမှုဆိုင်ရာ အချက်အလက်များ၊ အခွင့်အလမ်းများ၊ အကောင် အထည်ဖော်ဆောင်ရွက်မည့် စီမံကိန်းများ၊ ဒေသကြီးအတွင်း ရင်းနှီးမြှုပ်နှံမှု လုပ်ငန်းများ ဆောင်ရွက် ရာတွင် ထိရောက်သော လုပ်ထုံးလုပ်နည်းများဖြင့် ဆောင်ရွက်ပေးမှုများ၊ စီးပွားရေး လုပ်ငန်းများ ဆောင်ရွက် နေမှုနှင့် စီးပွားရေးပတ်ဝန်းကျင်ကောင်းများ၊ လက်ရှိဆောင်ရွက်နေသည့် ပုဂ္ဂလိက ရင်းနှီးမြှုပ်နှံမှုလုပ်ငန်းများ၊ သီလဝါအထူးစီးပွားရေးဇုန်၏ ရင်းနှီးမြှုပ်နှံမှုများ၊ ရင်းနှီးမြှုပ်နှံမှုနှင့် ပတ်သက်ပြီး မေးမြန်းချက်များကို ရန်ကုန်တိုင်းဒေသကြီးအစိုးရနှင့် သက်ဆိုင်ရာဌာနများမှ တာဝန်ရှိသူများ ရှင်းလင်း ပြောကြားသွားမည် ဖြစ်သည်။

Yangon Investment Forum 2018 တက်ရောက်လိုသူများအနေဖြင့် www.yangoninestmentforum.com တွင် ၀င်ရောက်စာရင်းပေးသွင်းနိုင်ကြောင်း ရန်ကုန်တိုင်းဒေသကြီး ရင်းနှီးမြှုပ်နှံမှုကော်မတီမှ ထုတ်ပြန်ထားသည်။

Mizzima Weekly