အမေရိကန်နိုင်ငံ ဖလော်ရီဒါ ပြည်နယ်က အထက်တန်းကျောင်းတစ်ကျောင်းမှာ ဖေဖော်ဝါရီ ၁၄ ရက်က သေနတ်ပစ်ခတ်မှု ဖြစ်ပြီး လူပေါင်း ၁၇ ဦးထိ သေဆုံးသွားခဲ့ပါတယ်။ တရားခံဖြစ်သူကတော့ ယင်းကျောင်းက ကျောင်းသားဟောင်းတစ်ဦးဖြစ်ပါတယ်။

Marjory Stoneman Douglas အထက်ကျောင်းမှာ ဖြစ်သွားခဲ့တဲ့ ယင်းဖြစ်စဉ်ကြောင့် သေဆုံးသွားသူတွေကို အမှူးပြုတဲ့အနေနဲ့ အစိုးရအလံတွေကို တနင်္လာနေ့အထိ တစ်ဝက်လွှင့်ထူထားဖို့   ပြည်နယ်အုပ်ချုပ်ရေးမှူး Rick Scott က ညွှန်ကြားထားပါတယ်။

အဆိုပါ ကျောင်းကတော့ ကျောင်းသားဦးရေ သုံးထောင်ခန့် ရှိတဲ့ အစိုးရကျောင်းတစ်ကျောင်းဖြစ်ပါတယ်။

ယခုလို စိတ်မကောင်းဖွယ် ဖြစ်စဉ် ဖြစ်ပြီးနောက် ယင်းကျောင်းကို သီတင်းပတ်ကုန်အထိ ပိတ်ထားမယ်လို့ အာဏာပိုင်တွေက ပြောပါတယ်။

" ဒါက ကျွန်တော်တို့ ဆီမှာ ကြုံခဲ့ရတဲ့ အဆိုးရွားဆုံး ဖြစ်ရပ်ဆိုးတစ်ခုပါ" လို့ Broward ကောင်တီ အစိုးရကျောင်းများဆိုင်ရာ ကြီးကြပ်သူ Robert Runcie က ပြောပါတယ်။

သံသယရှိ တရားခံဖြစ်တဲ့ အသက် ၁၉ နှစ်အရွယ် Nikolas Cruz ကတော့ စည်းကမ်းပိုင်းကြောင့် ကျောင်းကနေ အထုတ်ခံထားရသူဖြစ်တယ်လို့ ၎င်းက ပြောပါတယ်။

ယခုပစ်ခတ်မှုကတော့ မျက်မှောက်ခေတ် အမေရိကန် သမိုင်းမှာ လူသေဆုံးမှုအများဆုံး ပစ်ခတ်မှုတစ်ခုလည်း ဖြစ်လာခဲ့ပါတယ်။