ရန်ကုန်၊ ဇန်နဝါရီလ ၂၇ ။ ။ ရခိုင်ပြည်နယ်၊ မောင်တောမြို့နယ်၊ မောင်နီကျေးရွာရှိ ဟာဆောင်းဆိုသူနေအိမ်ခြံဝင်းအတွင်း ရပ်ထားသည့် ထော်လာဂျီပေါ်မှ မြေသားဖြင့် ဖုံးအုပ်ထားသော ဆာလာအိတ် ၇ အိတ်အတွင်းမှ ကျပ်သိန်းပေါင်း ၂၅၇၁၅ တန်ဖိုးရှိ WY စာတန်းပါ ဆေးပြားများ ဖမ်းဆီးရမိခဲ့ကြောင်း တပ်မတော်ကာကွယ်ရေးဦးစီးချုပ်ရုံးမှ ယနေ့ဇန် နဝါရီလ ၂၇ ရက်တွင် သတင်းထုတ်ပြန်သည်။
မောင်တောလုံခြုံရေးရဲတပ်ဖွဲ့ဝင်များက သတင်းအရ ဇန်နဝါရီလ ၂၆ ရက်၊ မွန်းလွဲ ၁ နာရီခွဲခန့်အချိန်တွင် ဟာ ဆောင်းဆိုသူ နေအိမ်သို့ သွားရောက်ရှာဖွေခဲ့ရာ နေအိမ်အတွင်း ဟာဆောင်းအား တွေ့ရှိခြင်းမရှိဘဲ ရာဘီယာ ခါတူဆိုသူနှင့် မာမတ်အီနုစ်တို့ ၂ ဦးအားတွေ့ရှိခဲ့ခြင်းဖြစ်သည်။
နေအိမ်ခြံဝင်းအတွင်း ရဲတပ်ဖွဲ့မှ ရှာဖွေခဲ့ရာ ရပ်ထားသည့် ထော်လာဂျီပေါ်မှ မြေသားများဖြင့် ဖုံးအုပ်ထားသည့် ဆာလာအိတ် ၇ အိတ်အတွင်းမှ ခန့်မှန်းတန်ဖိုး ကျပ်သိန်းပေါင်း ၂၅၇၁၅ တန်ဖိုးရှိ WY စာတန်းပါ စိတ်ကြွရူးသွပ် ဆေးပြား ၁၂၈၅၇၅ဝ ပြားအား ဖမ်းဆီးရမိခဲ့ကြောင်း သိရသည်။ လက်ရှိတွင် အဆိုပါ ဆေးပြားများနှင့်အတူ ဖမ်းဆီးရမိခဲ့သော ရာဘီယာ ခါတူဆိုသူနှင့် မာမတ်အီနုစ်တို့ ၂ ဦးကို မောင်တောမြို့မရဲစခန်းတွင် မူး/စိတ်ပုဒ်မ- ၁၅/၁၉(က)/၂၁ ဖြင့် အမှုဖွင့်စစ်ဆေးနေကြောင်း သိရသည်။
အလားတူ စစ်တွေမြို့နယ်၊ အုန်းတောကြီးကျေးရွာဘက်မှ ပင်လယ်ကမ်းစပ်ဘက်သို့ ၂၄ ရက်၊ ည ၁၁ နာရီခန့် က အမည်မသိလူ နှစ်ဦးမောင်းနှင်လာသော ဆိုင်ကယ်အား ရပ်တန့်စစ်ဆေးရာ ဆိုင်ကယ်အား မောင်းနှင်ထွက် ပြေးသွားပြီး ဆိုင်ကယ်ပေါ်မှ အနက်ရောင်ပလတ်စတစ်အိတ်တစ်လုံး ပြုတ်ကျကျန်ခဲ့သည်။ အဆိုပါ အိတ်အား လုံခြုံရေးတပ်ဖွဲ့မှ စစ်ဆေးခဲ့ရာ အိတ်အတွင်း ခန့်မှန်းတန်ဖိုး ကျပ်သိန်းပေါင်း ၁ဝဝဝ ခန့်ရှိ WY စာတန်းပါ စိတ်ကြွရူးသွပ်ဆေးပြား ၅ဝဝဝဝ ပြားအား သိမ်းဆည်းရမိခဲ့ကြောင်း သိရသည်။
