ဒီဇင်ဘာ ၃၀ ။ ။ လူ ၁၂ ဦး သေဆုံးခဲ့ရသည့် အမေရိကန်နိုင်ငံ နယူးယော့ခ်မြို့ လူနေတိုက်ခန်းတွဲတစ်ခု မီးလောင်ကျွမ်းမှု ဖြစ်စဉ်မှာ သုံးနှစ်သားအရွယ် ကလေးငယ်တစ်ဦး မီးဖိုနှင့် ဆော့ကစားရာကနေ စတင်ဖြစ်ပွားခဲ့ခြင်းဖြစ်ကြောင်း မီးသတ်ဌာန အကြီးအကဲက ထုတ်ပြန်ပြောဆိုသွားပါတယ်။
အဆိုပါ တိုက်ခန်းတွဲ မီးလောင်မှုကြောင့် ကလေးငယ် လေးဦးအပါအဝင် ၁၂ ဦး သေဆုံးပြီး ထိခိုက်ဒဏ်ရာရသူတွေလည်း ရှိခဲ့ပါတယ်။
" ဒီမီးလောင်ရခြင်းရဲ့ အကြောင်းရင်းကို စုံစမ်းလိုက်တဲ့အခါမှာတော့ မီးက အဆောက်အအုံ ပထမထပ် မီးဖိုချောင်တစ်ခုကနေ စလောင်ခဲ့တာကို သွားတွေ့ရပါတယ်၊ အဲဒီမှာ အသက် သုံးနှစ်ခွဲလောက်ပဲ ရှိသေးတဲ့ ကောင်လေးတစ်ဦး မီးဖိုမှာ ဆော့နေခဲ့တာပါ၊ အဲဒီကနေ စလောင်တာပါ" လို့ နယူးယော့ခ်မြို့ မီးသတ်ဌာန အကြီးအကဲ ဒန်နီရယ် နိုင်ဂရိုက သတင်းထောက်တွေကို ပြောပါတယ်။
" မီး စလောင်လောင်ချင်း အမေဖြစ်သူက သတိမထားမိသေးပါဘူး၊ အဲဒီမှာ လူငယ်တစ်ယောက်က အော်ပြီး ပြောမှ သူ သိခဲ့ရပါတယ်" လို့ ၎င်းက ထပ်လောင်းပြောကြားသွားပါတယ်။ ဒဏ်ရာရရှိသွားသူ လေးဦးကတော့ လက်ရှိအချိန်မှာ အခြေအနေစိုးရိမ်နေရတယ်လို့ သိရပါတယ်။
ယခုလို လူသေဆုံးစေတဲ့ အဆိုပါ မီးလောင်မှုဖြစ်စဉ်ကတော့ ယင်းမြို့ သမိုင်းမှာ ဆိုးဝါးတဲ့ မီးလောင်မှုတစ်ရပ် လည်း ဖြစ်လာခဲ့ပါတယ်။