နိုဝင်ဘာ ၂၈ ။ ။ မကွေးတိုင်းအတွင်းရှိ ကျောက်တစ်လုံးမှော် ကျောက်မီးသွေးတွင်းတွင် နိုဝင်ဘာ ၂၇ ရက်နေ့ မွန်းလွဲပိုင်း ၂ နာရီ ကျော်ခန့်အချိန်က ကျောက်မီးသွေးတွင်း အတွင်းသို့ ပို့လွှတ်သည့် လေပိုက်ပေါက်မှု ဖြစ်ပွားခဲ့ပြီး လူ နှစ်ဦး သေဆုံးကာ ရ ဦး ပိတ်မိနေကြောင်း သိရသည်။
မကွေးတိုင်းဒေသကြီး မင်းဘူး/စကုမြို့နယ် မန်းရွှေစက်တော် နှင့် ငဖဲသွားလမ်း မန်းရွှေစက်တော်နှင့် ၂ မိုင်ခန့် အကွာရှိ ဟန်ထက်ကျောက်မီးသွေးတူးဖော်ရေးကုမ္ပဏီမှ တူးဖော်လုပ်ကိုင်နေသော ကျောက်မီးသွေးတွင်း ဖြစ်ပြီး အဆိုပါ ထိခိုက်မှုတွင် တရုတ်နိုင်ငံသား ၂ ဦး ပါ၀င်ကြောင်း သိရသည်။
ဟန်ထက်ကုမ္မဏီမှ တူးဖော်လုပ်ကိုင်နေသည့် အနက်ပေ ၂၀၀မှ၂၅၀ အကြားရှိ ကျောက်မီးသွေးတွင်း အတွင်း ပို့ လွှတ်သည့် လေပိုက်ပေါက်မှုကြောင့် တရုတ်နိုင်ငံသား ချန်သောက်လွင်(အသက်-၄၃)နှစ်၊ ကျိန်ခွန်ရှိန် (အသက်-၅၉နှစ်)၊ မင်းဘူးမြို့နယ် တောကျာင်းကုန်းကျေးရွာနေ ကျောက်မီးသွေးတွင်းလုပ်သား ကိုမျိုး (အသက်-၂၄နှစ်)၊ မမီမီဇင်(အသက်-၂၂နှစ်)တို့ လေးဦးအား ငဖဲမြို့နယ်ပြည်သူ့ဆေးရုံသို့ ပို့ဆောင်ကာ ဆေးကုသမှု ခံယူနေရသည်။
လက်ရှိတွင် ယင်းဒဏ်ရာရသူများအနက် နှစ်ဦးသေဆုံးသွားပြီဖြစ်ပြီး သေဆုံးသူမှာ မြန်မာ ၂ ဦး ဖြစ်ကြောင်း မကွေးမီးသတ်ဦးစီးဌာနမှ သိရသည်။
“ ဒီနေ့မနက်တော့ မင်းဘူးခရိုင်အုပ်ချုပ်ရေးမှူးနဲ့ တာဝန်ရှိသူတွေ ရောက်နေပြီး ပိတ်မိသူတွေကို ကယ်ဆယ်ဖို့ ဆောင်ရွက်နေကြပါတယ်။ အသက်ရှင်ဖို့တော့ သိပ်မျှော်လင့်လို့မရပါဘူး” ဟု အခင်းဖြစ်ပွားရာသို့ ရောက်ရှိနေ သည့် ဘုရားကျေးရွာနေ ဦးသန်းထွန်းက ပြောသည်။
ကျောက်မီးသွေးတွင်းအတွင်း ပိတ်မိနေသည့် တွင်းလုပ်သား ခုနှစ်ဦးကို လတ်တလော အခြေအနေထိ ကယ်တင်ရန် ကြိုးစားနေဆဲဖြစ်ပြီး မီးသတ်ဦးစီးဌာန၊ရဲတပ်ဖွဲ့ဝင်များ ဒေသခံများ ဝိုင်းဝန်း ကူညီဆောင်ရွက် နေကြောင်း သိရသည်။
အခင်းဖြစ်နေရာသို့ မကွေးတိုင်းဒေသကြီးအစိုးရအဖွဲ့ အလုပ်သမား၊ လူဝင်မှုကြီးကြပ်ရေးနှင့် ပြည်သူ့အင်အား ဝန်ကြီးဌာန ၀န်ကြီး ဦးနေမျိုးကျော်နှင့် မကွေးတိုင်းဒေသကြီးရဲတပ်ဖွဲ့မှူးနှင့်ရဲတပ်ဖွဲ့ဝင်များ၊ ကြက်ခြေနီတပ် ဖွဲ့ဝင်များ၊ တိုင်း ခရိုင် မြို့နယ် မီးသတ်တပ်ဖွဲ့ဝင်များ၊ဌာနဆိုင်ရာအကြီးအကဲများ၊မင်းဘူး မြို့နယ်အုပ်ချူပ် ရေးမှူး။ငဖဲမြို့နယ်အုပ်ချူပ်ရေးမှူးတို့နှင့် မင်းဘူးမြို့လူမှုရေးအဖွဲ့အစည်းများ စုစုပေါင်းအင်အား (၂၀၀) ခန့်လာရောက် ကူညီပံ့ပိုးမှုများ လုပ်ဆောင်နေကြောင်း သိရှိရသည်။
အဆိုပါ ကျောက်မီးသွေးတွင်းသည် ဂလိုဏ်ဖောက်ကာ မြေသားနံရံ အထိန်းများတပ်ဆင်၍ အပိတ်တူးရသော ကျောက်မီးသွေးတွင်း ဖြစ်သည်။