သြဂုတ် ၁၈ ။        ။ မြန်မာနိုင်ငံတစ်ဝန်း ရေကြီးရေလျှံနှင့် သဘာဝဘေးအန္တရာယ်ကျရောက်သည့် တိုင်းနှင့်ပြည်နယ် များတွင် အမျိုးသားသဘာဝဘေးအန္တရာယ်ဆိုင်ရာ စီမံခန့်ခွဲမှုကော်မတီက လုပ်ငန်းစဉ် သုံးခု ချမှတ်ဆောင်ရွက်နေပြီး ငွေကျပ် ၃၉ ဘီလီယံကျော် သုံးစွဲခဲ့ပြီးဖြစ်သည်ဟု သိရသည်။

သဘာဝဘေးအန္တရာယ်ကာကွယ်ရေးအတွက် သီးသန့်ရံပုံငွေမှ ထုတ်ယူသုံးစွဲခဲ့ခြင်းဖြစ်ပြီး ယင်းရံပုံငွေမှ ဆက်လက်သုံးစွဲခွင့်ပြုပေးရန် အမြန်ဆုံးစီစဉ်ဆောင်ရွက်နေသည်ဟု သြဂုတ် ၁၈ ရက် နိုင်ငံပိုင် သတင်းစာ၌ ဖော်ပြသည်။

အာရှဖွံ့ဖြိုးရေးဘဏ် (ADB) က အမေရိကန်ဒေါ်လာ ၃ သန်းထောက်ပံ့ရန် မြန်မာ ဘဏ္ဏာရေး ဝန်ကြီးဌာနနှင့် သဘောတူလက်မှတ်ရေးထိုးပြီးဖြစ်သကဲ့သို့ ဂျပန်နိုင်ငံကလည်း ကန်ဒေါ်လာ ၁ ဒဿမ ၅ သန်း ထောက်ပံ့ရန် အကြောင်းကြားခဲ့သည်ဟု ဆိုသည်။

အပြည်ပြည်ဆိုင်ရာငွေကြေးရံပုံငွေအဖွဲ့ (IMF) နှင့် ကမ္ဘာ့ဘဏ် (WB) တို့မှလည်း အတိုးမဲ့ချေးငွေများ ထောက်ပံ့ပေးနိုင်ရန်ဆောင်ရွက်လျှက်ရှိနေရာ WB က ယခင်လွှတ်တော်မှ ချေးငွေများအနက် ၅ ရာခိုင်နှုန်းအား ရေဘေးကယ်ဆယ်ရေးနှင့် ပြန်လည်ထူထောင်ရေးလုပ်ငန်းများတွင်သုံးနိုင်ရန် ကန်ဒေါ်လာ ၃၅ သန်း အဆိုပြုချက်ရရှိခဲ့ပြီးဟု သတင်းကဖော်ပြသည်။

၎င်းသဘောတူညီမှုများသည် သဘာဝဘေးအန္တရာယ်ကာကွယ်ရေးအတွက် သီးသန့်ရံပုံငွေနှင့် မည်သို့ သက်ဆိုင်သည်ကိုမူ သတင်း၌ ရှင်းရှင်းလင်းလင်း မသိရပါ။

ထို့ပြင် အမေရိကန်အပါအဝင် ဥရောပနိုင်ငံများနှင့် အာရှနိုင်ငံများကလည်း ကုလသမဂ္ဂအေဂျင်စီများမှ တစ်ဆင့်သော်လည်းကောင်း၊ မြန်မာအစိုးရဝန်ကြီးဌာနမှ တစ်ဆင့်သော်လည်းကောင်း လှူဒါန်းမှု များလည်းရှိနေသည်။