စက်တင်ဘာလ ၁၅ ။ ။ နိုင်ငံတော်အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်ထံ ၈၈ မျိုးဆက်မှ နိုင်ငံရေးလှုပ်ရှားသူတစ်ချို့က အိတ်ဖွင့်ပေးစာတစ်စောင် ပေးပို့ခဲ့ပါတယ်။
ဒေါ်အောင်ဆန်းစုကြည်
အမှတ် ၅၄၊ တက္ကသိုလ် ရိပ်သာလမ်း
ရန်ကုန်၊ မြန်မာ
( စက်တင်ဘာ ၁၄၊ ၂၀၁၇)
ဒေါ်အောင်ဆန်းစုကြည်ထံသို့ အိတ်ဖွင့်ပေးစာ
ခင်မင်ရပါသော ဒေါ်အောင်ဆန်းစုကြည်
အကြပ်အတည်းတွေနဲ့ လုံးပန်းခဲ့ရတဲ့ ကျွန်တော်တို့ရဲ့ မွေးရပ်ဇာတိ မြန်မာပြည်ကြီးမှာ ကျွန်တော်တို့တွေဟာ တစ်အူတုံဆင်း သွေးသားရင်းချာလို နေထိုင်ခဲ့ကြတဲ့ တိုင်းရင်းသားမောင်နှမတွေ ဖြစ်ကြပါတယ်။ ဒါပေမယ့် ခုချိန်မှာ နိုင်ငံခေါင်းဆောင်အဖြစ် ဆက်ခံ တာဝန်ယူလုပ်ကိုင်နေမှု အပါအဝင် ပြည်သူတွေခံစားနေရတဲ့ အတိဒုက္ခတွေ၊ မြန်မာနိုင်ငံရဲ့ အနာဂတ် နဲ့ပတ်သက်လို့ ခုချိန်မှာ ကျွန်တော်တို့ ဝမ်းနည်း၊ စိုးရိမ်နေရပြီဆိုတာ သိအောင်ပြောဖို့ ခုလို စာရေးလိုက်ရတာဖြစ်ပါတယ်။
ကျွန်တော်တို့ရဲ့ မိသားစုဝင်တွေနဲ့ မိဘတွေထဲက တစ်ချို့ဟာဆိုရင်လည်း တိုင်းပြည်အတွက် အသက်ပေးကျဆုံးသွားခဲ့တဲ့ ဗိုလ်ချုပ်အောင်ဆန်းနဲ့ ခေတ်ပြိုင်တွေ၊ လုပ်ဖော်ကိုင်ဘက်တွေ ဖြစ်ခဲ့ကြပါတယ်။ သူတို့တွေဟာလည်း ဗိုလ်ချုပ်လိုပဲ နိုင်ငံအကျိုးအတွက် တစ်ထောင့်တစ်နေရာကနေ ပါဝင်လုပ်ဆောင် ခဲ့ကြသူတွေ ဖြစ်ပါတယ်။
" အဖေ့ရဲ့ သမီးဖြစ်တဲ့ ကျွန်မအနေနဲ့ ပြည်သူတွေ ဆယ်စုနှစ်တွေအများကြီး ဖိနှိပ်ချုပ်ချယ်ခံနေရချိန်တွေမှာ ကျွန်မ ဘယ်တော့မှ နှုတ်ဆိတ်ငြိမ်သက်နေနိုင်မှာ မဟုတ်ပါဘူး" ဆိုပြီး ၁၉၈၈ ခုနှစ်မှာ ပထမဆုံး မိန့်ခွန်းပြောတုန်းကဆိုရင် ကျွန်တော်တို့ဟာ ဒေါ်အောင်ဆန်းစုကြည်ရဲ့ စိတ်ဓာတ်နဲ့ သတ္တိတို့အပေါ် များစွာ အားရကျေနပ်ဝမ်းမြောက်မိခဲ့ပါတယ်။
ဗိုလ်ချုပ်အောင်ဆန်းကို ကျွန်တော်တို့ရဲ့ မိဘတွေနဲ့ မြန်မာပြည်သူတစ်ရပ်လုံးက ချစ်ခင်လေးစားမြတ်နိုး ခဲ့သလိုပဲ ပြည်သူသန်းပေါင်းများစွာနဲ့အတူ ဒေါ်အောင်ဆန်းစုကြည်အပေါ်မှာ ချစ်ခင်လေးစား ယုံကြည် ပေးထားခဲ့ကြပါတယ်။
နှစ်တွေအကြာကြီး ယုံကြည်ချက် အကျဉ်းသားအဖြစ် ရှိနေခဲ့တုန်းကလည်း ကျွန်တော်တို့က ဒေါ်အောင်ဆန်းစုကြည်နှင့်အတူ ရပ်တည်ခဲ့ကြပြီး ဒေါ်အောင်ဆန်းစုကြည် လွတ်မြောက်ဖို့အရေး၊ တိုင်းပြည်ကို ဦးဆောင်နိုင်ဖို့အတွက် နိုင်ငံတကာလှုပ်ရှားမှုတစ်ခုကိုပါ တည်ဆောက်နိုင်ရေးတို့အတွက် ကျွန်တော်တို့အနေနဲ့ တစ်ဦးတစ်ယောက်ချင်းစီသော်လည်းကောင်း၊ စုပေါင်းပြီးတော့သော်လည်းကောင်း ကျွန်တော်တို့ တတ်စွမ်းသမျှ လုပ်ပေးခဲ့ကြပါတယ်။
ဒေါ်အောင်ဆန်းစုကြည်ရဲ့ ကျော်ကြားတဲ့ ပြောစကားဖြစ်တဲ့ " “Use your liberty to promote ours " ဆိုတဲ့အတိုင်း ကျွန်တော်တို့လည်း တကယ့်ကို တုန့်ပြန်လုပ်ဆောင်ခဲ့ကြပါတယ်။ ရိုဟင်ဂျာ၊ တစ်ခြား မွတ်ဆလင်၊ ဟိန္ဒူ၊ ခရစ်ယာန် တို့အပါအဝင် လူမျိုး မတူညီမှု၊ ကိုးကွယ်တဲ့ ဘာသာမတူမှုတွေ ရှိနေခဲ့ပေမယ့် ကျွန်တော်တို့တွေအားလုံးဟာ တပ်မတော်ဆိုတဲ့ လူနည်းစုတစ်ခုက လူအများစုအပေါ် ဖိနှိပ်အုပ်ချုပ်မှုကို အဆုံးသတ်နိုင်ဖို့အတွက် တစ်စုတစ်စည်းတည်းနဲ့ ဒေါ်အောင်ဆန်းစုကြည်ကို ဝန်းရံပေးခဲ့ကြပါတယ်။
ဒေါ်အောင်ဆန်းစုကြည် နေအိမ်အကျယ်ချုပ်က လွတ်မြောက်လာတော့လည်း ကျွန်တော်တို့ ဝမ်းသာခဲ့ကြပြီး ဘုံစကားလုံးဖြစ်တဲ့ ဒီမိုကရေစီ ဆိုတဲ့ပန်းတိုင်ကို ကျွန်တော်တို့ တိုင်းပြည်ကို ဘယ်လိုမျိုး ဦးဆောင်ချီတက်မလဲ ဆိုတာကို ကျွန်တော်တို့ စောင့်မျှော်ခဲ့ကြရတယ်။ ဒါပေမယ့်လည်း ဒေါ်အောင်ဆန်းစုကြည် ကို ထောက်ခံခဲ့သူတွေ၊ ဒေါ်အောင်ဆန်းစုကြည်နဲ့အတူ အရင်စစ်အစိုးရကို ဆန့်ကျင်ခဲ့သူတွေ၊ ပြည်ဝင်ခွင့်ပိတ်ခံရသူတွေ၊ ထောင်ချခဲ့ဖူးသူတွေအားလုံးကို အသိအမှတ်ပြုခဲ့ခြင်းမရှိပါဘူး။ အားလုံးနဲ့လည်း တိုင်ပင်ဆွေးနွေးမှု မရှိသလောက်ပါပဲ။ နယ်ပယ်အများအပြားမှာ အဖိုးမဖြတ်နိုင်လောက်တဲ့ ကမ္ဘာလုံးဆိုင်ရာ အတွေ့အကြုံတွေနဲ့အတူ အများစုကတော့ နည်းလမ်းစုံကနေ ကူညီပေးဖို့ ရှိနေခဲ့ကြပေမယ့် ဒေါ်အောင်ဆန်းစုကြည်ကတော့ ဘယ်လို အတတ်ပညာပိုင်း၊ကျွမ်းကျင်မှုပိုင်း အကူအညီတွေကို တောင်းခံဖို့ စိတ်မဝင်စားခဲ့ပါဘူး။
ပိုဆိုးတာက နိုင်ငံရေးသမားတစ်ယောက်ဖြစ်တယ်၊ အဓိပ္ပါယ်က နိုင်ငံရေးဆိုင်ရာ လုပ်ကိုင်မှုကပဲ ဆုံးဖြတ်ချက်ချမှတ်မှုကို လမ်းညွှန်ကောင်းလမ်းညွှန်နိုင်တယ် ဆိုတဲ့ ဒေါ်အောင်ဆန်းစုကြည်ရဲ့ ထုတ်ပြန်ချက်ကြောင့် ကျွန်တော်တို့ တုန်လှုပ်ခဲ့ရတယ်။ ကမ္ဘာ့လူ့အခွင့်အရေးနဲ့ နိုင်ငံရေး နှစ်ခုထဲက တစ်ခုကို ရွေးရင် တစ်ခုကို ပယ်ရတော့မလားဆိုပြီး ကျွန်တော်တို့ တုန်လှုပ်နေရပြီဖြစ်ပါတယ်။
ဒါ့အပြင် အစိုးရရဲ့ ဖွဲ့စည်းပုံကြောင့်လည်း ကျွန်တော်တို့ စိုးရိမ်ပူပန်မိခဲ့ရပါတယ်။ အများလေးစားပြီး အတွေ့အကြုံအများကြီးရှိတဲ့ ဝါရင့် NLD ခေါင်ေးဆာင် ဘယ်တစ်ဦးတစ်ယောက်မှ အစိုးရအဖွဲ့မှာ ပါမလာခဲ့ဘူး။ ထူးချွန်ပြီး အတွေ့အကြုံရှိသူ တစ်ဦးမှ အဖွဲ့မှာ ဆွဲမသွင်းခဲ့ဘူး။ အဖွဲ့မှာ ပါသူ အများစုက အတွေ့အကြုံသိပ်မရှိတဲ့ NLD မျက်နှာသစ်တွေ ဖြစ်နေကြတယ်။ ဒေါ်အောင်ဆန်းစုကြည်ဆီမှာ ပါတဲ့ တကယ်လုပ်နိုင်စွမ်းရှိပြီး အတွေ့အကြုံရှိသူ တွေကျတော့လည်း တပ်ထွက်ပုဂ္ဂိုလ်တွေ၊ အကျဉ်းချခဲ့တဲ့ ၊ ကျွန်တော်တို့တိုင်းပြည်ကို နှစ်ပေါင်း ၅၀ ကြာ ဖိနှိပ်ခဲ့တဲ့ အဖွဲ့ကြီးက လူတွေ ဖြစ်နေတယ်။
ဒါဆို ကျွန်တော်တို့ ဘယ်နေရာကို ဦးတည်နေပြီလဲ? နိုင်ငံမှာ လုပ်နေတယ်ဆိုတဲ့ ဒီမိုကရေစီ အသွင်ကူးပြောင်းရေးကရော ဒုံးရင်းနေရာကို ပြန်ရောက်သွားပြီလား? ဒီမိုကရေစီနည်းကျ ရွေးကောက်ခံထားတယ်ဆိုပေမယ့် သက်ဦးဆံပိုင်အုပ်ချုပ်တဲ့ အစိုးရတစ်ရပ်အောက် ကျွန်တော်တို့ ပြန်ရောက်သွားပြီလား? ဒေါ်အောင်ဆန်းစုကြည်အနေနဲ့ မီဒီယာလွတ်လပ်ခွင့်ကို အားပေးရမယ်၊ ဘယ်လို ရာထူးပဲဖြစ်ဖြစ် အစိုးရကို ဆန့်ကျင်သူတွေကို ခွင့်ပြုပေးရမယ်၊ မူဝါဒ ကွဲလွဲမှုတွေအပေါ် အခြေအတင် ဆွေးနွေးခွင့်ပြုရမယ်၊ နောက်ပြီး ဘယ်လိုနောက်ခံ တိုင်းရင်းသားလူမျိုး ဘာသာထဲကနေပဲ ဖြစ်ဖြစ် နောက်မျိုးဆက်သစ် ခေါင်းဆောင်တွေ ပေါ်ထွက်ဖို့ တည်ဆောက်ပေးရမယ်။ နောက်ပြီး စစ်ဗိုလ်ချုပ်တွေနဲ့ အကြားလည်း ယုံကြည်မှု တည်ဆောက်ရမယ်။ ဒါ မလွယ်မှန်း ကျွန်တော်တို့ သိပါတယ်။ ဒါပေမယ့် ဘယ်လို ပြုပြင်မှု အစီအစဉ်အတွက်ပဲဖြစ်ဖြစ် ဒါတွေဟာ အခြေခံတွေဖြစ်တယ်။ ဒါကို ဒေါ်အောင်ဆန်းစုကြည် တစ်ယောက်တည်း လုပ်ရမယ်လို့ ကျွန်တော်တို့ မဆိုလိုပါဘူး။ ဒါပေမယ့် ဒါကို အားကောင်းတဲ့ အဖွဲ့အစည်းတစ်ခုနဲ့ ပြီးမြောက်အောင်လုပ်နိုင်ပါတယ်။
ဖခင်ကို သတိရအောက်မေ့တာရော၊ ခုချိန်မှာ နိုင်ငံရဲ့ ဦးဆောင်သူ ခေါင်းဆောင်နေရာကို ရယူထားနိုင်တာကို ထောက်ထားသောအားဖြင့် ဒေါ်အောင်ဆန်းစုကြည်အနေနဲ့ ဒီမိုကရေစီ စံနှုန်းစည်းမျဉ်းတွေနဲ့ လူသားချင်း ထောက်ထားကြင်နာမှုတို့အပေါ် အခြေပြုတဲ့ မျဉ်းတစ်ကြောင်း ရေးဆွဲဖို့ ကျွန်တော်တို့ တောင်းဆိုချင်ပါတယ်။ မြန်မာလူ့အဖွဲ့အစည်းဟာ ခုဆိုရင် လူမျိုးရေးမုန်းတီးမှုနဲ့ ဘာသာရေး အယူသည်းမှု ဆိုတဲ့ ချောက်နက်ကြီးထဲ တိတ်တဆိတ် လှမ်းနေပါပြီ။ ရိုဟင်ဂျာ တွေအပေါ် အကြမ်းဖက်မှုကို ရပ်တန့်ရပါမယ်။ အကြမ်းဖက်သမားတွေရဲ့ တိုက်ခိုက်ကျူးလွန်မှုတွေ ရှိခဲ့တယ်ဆိုတိုင်းလည်း အပြစ်မဲ့ ရွာသားတွေ၊ ရခိုင် ကချင်နဲ့ ရှမ်း အထူးသဖြင့် ရှမ်းပြည်နယ်က ယောကျာ်းမိန်းမ ကလေးတွေ ကို သတ်တာက မှားယွင်းပါလိမ့်မယ်။
ခုချိန်မှာ ဘာတွေတကယ်ဖြစ်နေလဲ ဆိုတာကို သိရှိစေဖို့ ကုလနဲ့ လူ့အခွင့်အရေးအဖွဲ့အစည်း တွေကိုလည်း အပြည့်အ၀ အကဲဖြတ်လေ့လာခွင့် ပြုဖို့ ဒေါ်အောင်ဆန်းစုကြည်ကို တိုက်တွန်းချင်ပါတယ်။ မြန်မာနိုင်ငံသားပဲဖြစ်ဖြစ် ၊ နိုင်ငံသား မဟုတ်ဘူးပဲဖြစ်ဖြစ် တကယ်လိုအပ်နေသူတွေဆီ လူသားချင်းစာနာမှုအကူအညီတွေ ရောက်ရှိသွားအောင် ခွင့်ပြုလုပ်ဆောင်ပေးသင့်ပါတယ်။
ကျွန်တော်တို့ဟာ ဒါကို ဝမ်းနည်းစွာနဲ့ပဲ ထုတ်ပြန်လိုက်ရတာဖြစ်ပါတယ်။ ဒါပေမယ့် ရခိုင်မြောက်ပိုင်းမှာ ရုတ်တရက်ကပ်ဘေးသဖွယ် ပြောင်းလဲဖြစ်ပေါ်နေတဲ့ ဖြစ်စဉ်တွေနဲ့ပတ်သက်လို့ ယုံကြည်ရတဲ့ သတင်းတွေကြောင့်လည်း ကျွန်တော်တို့ ခုလို မဖြစ်မနေ ဒေါ်အောင်ဆန်းစုကြည်ဆီ စာရေးလိုက်တာဖြစ်ပါတယ်။ ဒေါ်အောင်ဆန်းစုကြည်ဘက်က ခုအချိန်ထိ ဒီဒဏ်ရာတွေကို ကုစားပေးနိုင်ပါသေးတယ်။ ရင်ကြားစေ့ရေးလုပ်ငန်းစဉ်ကို ဦးဆောင်နိုင်ပါသေးတယ်။ မြန်မာနိုင်ငံရဲ့ ရွေးကောက်ခံ ခေါင်းဆောင်တစ်ဦးအနေနဲ့ ဒေါ်အောင်ဆန်းစုကြည်ကို ဦးဆောင်စေချင်ပါတယ်။ ဖခင်ဆီက ရထားတဲ့ အမွေနဲ့အတူ မှန်ကန်တဲ့ အရာတွေကို လုပ်ဖို့ အချိန်မနှောင်းသေးပါဘူး။
ဒေါ်အောင်ဆန်းစုကြည် အဆင်ပြေဖို့ ကျွန်တော်တို့ မျှော်လင့်ပါတယ်။ အေးအေးချမ်းချမ်း လျှောက်လှမ်းသွားနိုင်ပါစေ။
1.
2. ကိုအောင် (ယူကေ)
3. ထွန်းအောင် (ယူအက်စ်အေ)
4. ခင်အုန်း (သြစတြေးလျ)
5. ဘီလယ် ရက်စ်ချိုင်း ( ယူအက်စ်အေ)
6. ဦးကျော်ဝင်း (ယူအက်စ်အေ)
7. ဟန်ညောင်ေ၀ (ကနေဒါ)
8. မောင်ဇာနည် (ယူကေ)
9. မိုးသီးဇွန် (ယူအက်စ်အေ)
