စက်တင်ဘာ ၆  ။                ။ နိုင်ငံတော်၏အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်အား တူရကီသမ္မတတေယစ် အာဒိုဂန်က စက်တင်ဘာလ ၅ ရက် မွန်းလွဲပိုင်းတွင် တယ်လီဖုန်းခေါ်ဆိုခဲ့ပြီး ရခိုင်ပြည်နယ်မြောက်ပိုင်း ဖြစ်စဉ်များနှင့် စပ်လျဉ်း၍ အပြန်အလှန် ဆွေးနွေးခဲ့ကြကြောင်း နိုင်ငံတော်အတိုင်ပင်ခံရုံးမှ ထုတ်ပြန်သည်။

ရခိုင်အရေးကိစ္စအပေါ် တူရကီနှင့် နှစ်နိုင်ငံဆက်ဆံရေးအပါအဝင် ၊ တူရကီ ဒုဝန်ကြီးချုပ်၏ သတင်းမှားယွင်းဖော်ပြခြင်း အခြေအနေများပါ ဆွေးနွေးပြောဆိုခဲ့ကြသည်။

တူရကီသမ္မတ မစ္စတာအာဒိုဂန်က လူ့အခွင့်အရေး အပြောင်းအလဲများ ဆောင်ရွက်ခဲ့သော ခေါင်းဆောင်တစ်ဦးအနေဖြင့် ရခိုင်အရေးကိစ္စကိုအမြော်အမြင်ဖြင့် ချဉ်းကပ် ဆောင်ရွက်မည် ဟုယုံကြည်ကြောင်း ပြောကြားခဲ့သည်။

ထို့ပြင် ကမ္ဘာတစ်ဝှမ်းတွင် လူသားချင်းစာနာထောက်ထားရေး ဆိုင်ရာ စိုးရိမ်ပူပန်မှုများ ဖြစ်ပေါ်လျက်ရှိကြောင်း ပြောခဲ့ပြီး မကြာသေးခင်က ဖြစ်ရပ်များနှင့်ပတ်သက်၍ စဉ်းစားသုံးသပ် ဆောင်ရွက်မည်ကို သံသယမရှိပါကြောင်း ပြောခဲ့သည်။

ဒေါ်အောင်ဆန်းစုကြည်က " မိမိတို့အနေဖြင့် လူ့အခွင့်အရေးနှင့်ဒီမိုကရေစီအကာအကွယ်များပိတ်ပင်ခံရခြင်း၏ ဆိုလိုရင်းကိုကောင်းစွာ သိရှိနားလည်ကြောင်း၊ ထို့ကြောင့် မြန်မာနိုင်ငံအတွင်းရှိ   ပြည်သူအားလုံး၏ အခွင့်အရေးကိုကာကွယ်စောင့်ရှောက်နိုင်ရန် ကြိုးပမ်းဆောင်ရွက်လျက် ရှိကြောင်း၊ နိုင်ငံရေးဆိုင်ရာအခွင့်အရေးသာမကလူမှုရေးနှင့် လူသားချင်းစာနာထောက်ထားမှုဆိုင်ရာ အခွင့်အရေးများကိုလည်း မြှင့်တင်လျက် ရှိပါကြောင်း" ပြောကြားသည်။

ဆက်လက်ပြီး " ရခိုင်ပြည်နယ်ရှိ ပြည်သူအားလုံးအတွက် အဖြစ်နိုင်ဆုံးနည်းလမ်းဖြင့် ကာကွယ်မှုပေးနိုင်ရန် စတင်ဆောင်ရွက်ထားပြီး ဖြစ်ကြောင်း၊ လူသားချင်းစာနာထောက်ထားမှုဆိုင်ရာ အကူအညီသာမက ငြိမ်းချမ်းတည်ငြိမ်ရေးအတွက် ရေရှည်မျှော်မှန်းကာဘက်စုံဖွံ့ဖြိုးရေးအစီအစဉ်များအကောင်အထည်ဖော် ဆောင်ရွက်သွားမည် ဖြစ်ကြောင်း၊ သတင်းအချက်အလက်အမှားများ ဖန်တီးခြင်းကြောင့်မိမိတို့နှစ်နိုင်ငံအကြားကာလရှည်ကြာရင်းနှီးချစ်ကြည်သောမိတ်ဆွေကောင်းဆက်ဆံရေးထိခိုက်လာမည်ကိုစိုးရိမ်ကြောင်း၊ နှစ်နိုင်ငံအကြားဆက်ဆံရေးကောင်းကိုအမြဲထိန်းသိမ်းထားလိုသောမြန်မာနိုင်ငံ၏ သဘောထားကို မြန်မာနိုင်ငံဆိုင်ရာတူရကီသံအမတ်ကြီးကတင်ပြပြီး ဖြစ်မည် ဟုယူဆပါကြောင်း" ပြောခဲ့သည်။

တူရကီဒုတိယဝန်ကြီးချုပ်အနေဖြင့် မြန်မာနိုင်ငံတွင် ဖြစ်ပွားခဲ့ခြင်းမဟုတ်ဘဲ အခြားနိုင်ငံများမှ သတင်းဓာတ်ပုံအမှားများကို ဖြန့်ဝေခဲ့သည့်အဖြစ်သည် သတင်းအမှားများထုနှင့်ထည်နှင့် ပြန့်နှံ့နေခြင်း အတွက် ကြီးမားသောပြဿနာ၏မြင်သာသော (The Tip of a huge Iceberg of Misinformation) အစိတ်အပိုင်းတစ်ခုသာ ဖြစ်ကြောင်း နိုင်ငံတော်အတိုင်ပင်ခံပုဂ္ဂိုလ်က ပြောခဲ့သည်။

ထိုကဲ့သို့ သတင်းဓာတ်ပုံအမှားများကိုမတူညီသောအသိုင်းအဝိုင်းများအကြား ပြဿနာအများအပြား ဖြစ်ပွားစေရန်နှင့် အကြမ်းဖက်သမားများအကျိုးဖြစ်ထွန်းစေရန် ရည်ရွယ်ချက်ဖြင့် ဖန်တီးနေကြသည်ကို မှန်းဆကြည့်နိုင်ကြောင်း၊ တူရကီနိုင်ငံအနေဖြင့် ပီကေကေ (the Kurdistan Workers' Partyor PKK -Kurdish: PartiyaKarkerên Kurdistan) ကို နှိမ်နင်းခဲ့ရခြင်းကြောင့် အကြမ်းဖက်ဝါဒ၏ စိန်ခေါ်မှုများကိုကောင်းစွာနားလည်မည်ဟုယုံကြည်ပါကြောင်း၊ ပြောခဲ့သည်။

မြန်မာနိုင်ငံအနေဖြင့် အကြမ်းဖက်ဝါဒပိုမိုကျယ်ပြန့်မလာစေရန်နှင့် ရခိုင်ပြည်နယ်တစ်ပြည်နယ်လုံးသို့ ပြန့်နှံ့မသွားနိုင်စေရန် အကောင်းဆုံးကြိုးပမ်းဆောင်ရွက်လျက် ရှိကြောင်းနှင့်   ဒေါ်အောင်ဆန်းစုကြည်က ပြောခဲ့သည်။

ရခိုင်ပြည်နယ်ဆိုင်ရာအကြံပေးကော်မရှင်၏ အစီရင်ခံစာပါ အကြံပြုချက်များကိုအကောင်အထည်ဖော် ဆောင်ရွက်မည့် အကောင်အထည်ဖော်ရေးကော်မတီကို အမြန်ဆုံးဖွဲ့စည်းဆောင်ရွက်သွားမည်   ဖြစ်ကြောင်းဖြင့်ပြောကြားသည်။

တူရကီနိုင်ငံမှလည်း မြန်မာနိုင်ငံအတွက် ကူညီရန် အဆင်သင့်ရှိပါကြောင်း ပြောခဲ့သည်။