စက်တင်ဘာလ ၄ ။ ။ “ မာနများလည်း တစစီကွဲရှ ကိုယ့်ရဲ့ အသည်းကွဲ ညနေခင်းများ…”သီချင်းကို အသက်သွင်းခဲ့သူ၊ ၁၉၉၃ ခုနှစ်က “အလင်းတန်းများ”တေးစီးရီးဖြင့် စတင်အောင်မြင်ခဲ့သူ အဆိုတော် တာရာ(ခ) နန္ဒာထွန်း ဟာ စက်တင်ဘာ ၂ရက်နေ့ မနက်အစောပိုင်း ၅ နာရီခွဲအချိန်မှာ အသည်းကင်ဆာရောဂါနဲ့ ကွယ်လွန်ခဲ့ပြီး ဒီကနေ့ စက်တင်ဘာလ ၄ ရက် ၊ ညနေ ၄ နာရီမှာတော့ အဆိုတော်တာရာကို ရေဝေး သုသာန်မှာ ရှိတဲ့ အဆိုတော်ခိုင်ထူးရဲ့အုတ်ဂူနံဘေးမှာ ဂူသွင်းသဂြိုလ်တော့မှာပါ။
မကြာသေးခင်ရက်ပိုင်းအတွင်းမှာပဲ အဆိုတော်ခိုင်ထူးကွယ်လွန်ခဲ့ပြီးနောက် အနုပညာ ကြယ်တစ်ပွင့် နောက်ထပ်ကြွေလွင့်တဲ့အပေါ် ဂီတ အသိုင်းဝိုင်းနဲ့ ပရိသတ်အများက စိတ်မကောင်းဖြစ်ကြရပါတယ်။
ကိုယ်ပိုင်သံစဉ် သီချင်းချိုချိုလေးတွေတခေတ်မှာ သူ့ရဲ့ အောင်မြင်ကျော်ကြားခဲ့တဲ့ သီချင်းတွေဖြစ်တဲ့အစဉ်အမြဲ ၊ အသဲကွဲညနေခင်းများ ၊ မျက်စိမှိတ်ထားတယ်(စုံတွဲအဆို ထူးအိမ်သင်)၊ ပုလဲသီတကွဲစီ စတဲ့ကိုယ်ပိုင်သံစဉ် တေးသီးချင်းများဟာ ဂီတ ချစ်သူတွေအတွက် ထာဝရ ရှင်သန်နေဦးမှာပါ။
အဆိုတော် တာရာဟာ အဆိုတော် ထူးအိမ်သင်ရဲ့ တပည့်အရင်း တစ်ယောက်ဖြစ်သလို ဆရာ့ခြေရာကို အနီးစပ်ဆုံး နင်းနိုင်အောင် ကြိုးစားအောင်မြင်ခဲ့ သူတစ်ယောက်လည်း ဖြစ်ပါတယ် ။
၁၉၉၃ ခုနှစ်ကနေ တကိုယ်တော်စီးရီးတွေဖြစ်တဲ့ အလင်းတန်းများ၊ ပုလဲသီတကွဲစီ၊ အချစ်နဲ့သိမ်းပိုက်ခြင်း၊ ချစ်ခြင်းရဲ့မျက်နှာများ ၊ စုစုပေါင်း ၄ ခွေကို ပရိသတ်အတွက် အမှတ်တရထားလို့အသက် ၄၉နှစ်အရွယ်မှာ နှုတ်မဆက်ဘဲ ထွက်ခွာသွားပြီဖြစ်ပါတယ် ။လာမယ့် စက်တင်ဘာလ ၁၄ ရက်နေ့ဟာ သူ့ရဲ ့မွေးနေ့ဖြစ်ပြီး စိတ်မကောင်း ကြီးစွာဖြစ်ရကြောင်း မိသားစုဝင်တစ်ဦးထံက သိရပါတယ်။ ဂီတကြယ်ပွင့်တွေ တဖြုတ်ဖြုတ် ကြွေလွင့်နေရတဲ့ အပေါ် နိုင်ငံအတွက် ဆုံးရှုံးမှုများစွာဖြစ်ရသလို ဂီတချစ်မြတ်နိုးသူတွေအတွက်လည်း များစွာ ကြေကွဲဝမ်းနည်းစရာပါပဲ။
