မကွေး၊ သြဂုတ် ၂၄ ။ ။ စေတုတ္တရာမြို့နယ်နှင့် ချင်းပြည်နယ်ကန်ပက်လက်မြို့နယ် အကြားတွင် အလားအလာကောင်းသော သတ္တုသိုက်တွေ့ရှိခြင်းအကြောင်း အပါအဝင် မကွေးတိုင်းဝန်ကြီးချုပ် ဒေါက်တာအောင်မိုးညို သည် နိုင်ငံတော်၏ အတိုင်ပင်ခံပုဂ္ဂိုလ်နှင့် အင်တာနက်အွန်လိုင်း ဗီဒီယိုမှတဆင့် စကားပြောတင်ပြခြင်းတို့ကို သြဂုတ်လ ၂၃ရက်နေ့ နံနက်ပိုင်းက မကွေးအခြေစိုက် သတင်းမီဒီယာများနှင့်တွေ့ဆုံကာ ပြန်လည် ရှင်းလင်းပြောဆိုခဲ့သည်။
“ နိုင်ငံတော်၏ အတိုင်ပင်ခံပုဂ္ဂိုလ်ထံကို မကွေးတိုင်းရဲ့ကျန်းမာရေး ပညာရေး စီးပွားရေး စွမ်းအင် ဒေသဖွံ ့ဖြိုးရေး၊ ရေနံလက်ယက်တွင်းရန်ပုံငွေ၊ လယ်ယာမြေကိစ္စ မူလပိုင်ရှင်ထံ ပြန်လည်ပေးအပ်ရန် ကိစ္စများ ၊အလားအလာကောင်းသော သတ္တုသိုက် ကိစ္စများကို အွန်လိုင်းဗီဒီယိုမှ စကားပြော ရှင်းလင်းတင်ပြခဲ့ပါတယ်” ဟု မကွေးတိုင်းဒေသကြီးဝန်ကြီးချုပ် ဒေါက်တာအောင်မိုးညိုကပြောသည်။
မကွေးတိုင်းဒေသကြီး စေတုတ္တရာမြို့နယ်နှင့် ချင်းပြည်နယ် ကန်ပက်လက်မြို့နယ် အကြားတွင် အလာအလာအလွန်ကောင်းသည့် သတ္ထုရတနာသိုက်တစ်ခုကို တွေရှိခဲ့ပြီး မကွေးတိုင်းဒေသကြီးအတွင်း မင်းဘူးမြို့ မန်းရေနံမြေနှင့် ထောက်ရှာပင် ကမ်းနီရေနံမြေတစ်လျောက် အလျားမိုင်၂၀ ခန့်နဲ့ အနံ ၃ မိုင်ခန့် ရေနံမြေတစ်ခု တွေ့ရှိထားသည်။
အဆိုပါတွေ့ရှိချက်များအပေါ် မကွေးတိုင်းဒေသကြီးအစိုးရအဖွဲ့က မြေပြင်အနေအထားအား ကွင်းဆင်းစစ်ဆေးလေ့လာကာ အမြန်ဆုံးဆောင်ရွက်နိုင်ရေး၊ တိုင်းဒေသကြီးအတွင်းရှိ သိမ်းဆည်းခံ လယ်ယာမြေများအား သက်ဆိုင်ရာများက ပြန်လည်စွန့်လွှတ်ရန် ကြန့်ကြာမှုများရှိနေသည့်အပေါ် အမြန်ဆုံးဆောင်ရွက်ပေးရေး၊ မြို့ပြနှင့်အလှမ်းဝေးသည့် ကျေးလက်တောရွာများအနီး၌ တောင်သူ အသုံးပြုယာဉ်များအတွက် အသေးစားပန့်သုံး ဓာတ်ဆီဆိုင်များ ထားရှိ ဖွင့်လှစ်ခွင့်ပြုနိုင်ရေးတို့အပေါ် ပြည်ထောင်စုအစိုးရမှ လိုအပ််သလို စိစစ်၍ သုတေသန ပြုနိုင်ရေးနှင့် ယခင် တိုင်းဒေသကြီး ဝန်ကြီးချုပ်ဟောင်း ဦးဖုန်းမော်ရွှေထံက ပြန်ရခဲ့သော ဖွံ့ဖြိုးရေးရန်ပုံငွေထဲမှ ကျပ် သန်းပေါင်း(၃၂၇၀) ကို သုံးစွဲရန် လျာထားချက်များအား တင်ပြဆွေးနွေးခဲ့ကြောင်း သိရသည်။
“ဒီကျပ်သန်းပေါင်း(၃၂၇၀)နဲ့ ပတ်သက်ပြီး ဘာတွေသုံးမလဲဆိုတာ ပြည်ထောင်စုအစိုးရကို တင်ပြထားတာရှိတယ်။ စိစစ်ပြီးတော့ ခွင့်ပြုဖို့ပြောထားပါတယ်” ဟု ဝန်ကြီးချုပ် က ပြောသည်။
သြဂုတ်လ ၂၂ ရက်က ရန်ကုန်၊ ပဲခူး၊ ဧရာဝတီတိုင်းတွေက အစိုးရအဖွဲ့နဲ့ နိုင်ငံတော်၏ အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်တို့ အွန်လိုင်း ဗီဒီယိုကနေ အမေးအဖြေ ပြုလုပ်ခဲ့ကြပြီး သြဂုတ်လ ၂၃ရက်က မကွေး၊ မန္တလေးနဲ့ စစ်ကိုင်းတိုင်းတွေက အစိုးရအဖွဲ့တွေနဲ့ ပြုလုပ်တာဖြစ်ပါတယ်ဟု ဝန်ကြီးချုပ်က ဆက်လက်ပြောကြားသည်။