စျေးကွက် ပြိုင်ဆိုင်မှုမှ စားသုံးသူအခွင့်အရေးသို့

စျေးကွက် ပြိုင်ဆိုင်မှုမှ စားသုံးသူအခွင့်အရေးသို့

 ဘောဂဗေဒသဘောတရားအရ စျေးကွက်ပြိုင်ဆိုင်မှုများလေလေ စားသုံးသူအတွက် အခွင့်အရေးပိုများလေလေ ဖြစ်သည်။

စျေးကွက်အတွင်း ရောင်းကုန်တစ်ခုကို ထုတ်လုပ်ရောင်းချသူ အရေအတွက်များလာလေလေ ကိုယ့်ထုတ်ကုန် ရောင်းချနိုင်ရေးအရည်အသွေးကို စားသုံးသူများစိတ်ကြိုက် ထုတ်လုပ်ရောင်းချရန် လိုအပ်ပြီးရွေးချယ်ခွင့် ပိုများလေလေ စားသုံးသူအခွင့်အရေး ပိုများလေလေ ဖြစ်သည်။ ထိုအချက်ကို ဘောဂဗေဒသဘောတရားအရ စျေးကွက်ပြိုင်ဆိုင်မှုဟုလည်း ဆိုနိုင်သည်။

စျေးကွက်ပြိုင်ဆိုင်မှုဟုဆိုလျင် စျေးကွက် လက်ဝါးကြီးအုပ်မှုသည် ဆန့်ကျင်ဘက်အနေဖြင့် တွဲပါလာတတ်ပါသည်။ စျေးကွက် လက်ဝါးကြီးအုပ်မှု ဆိုသည့် စကားလုံးကို အဓိပ္ပါယ် ဖော်ရလျှင် ထုတ်ကုန် သို့မဟုတ် ဝန်ဆောင်မှု တစ်ခုခုကိုတစ်ဦးတည်းက လုပ်ကိုင်ခွင့်ရရှိပြီး စျေးကွက်အတွင်း ထိုသူက ချယ်လှယ်နေခြင်းဖြစ်သည်။ ဝန်ဆောင်မှု ကောင်းကောင်း၊ မကောင်းကောင်း စျေးကွက်အတွင်း ထိုသူ၏ ဝန်ဆောင်မှု တစ်မျိုးတည်းသာ ရရှိခြင်းကြောင့် စားသုံးသူတို့အတွက် ရွေးချယ်ခွင့်မရသည့် အခြေအနေဖြစ်သည်။

မြန်မာနိုင်ငံတွင် စျေးကွက်လက်ဝါးကြီးအုပ်မှုသည် အတိတ်ကာလတစ်ခုတွင် လွန်စွာကြီးမားခဲ့သည့် အခြေအနေမျိုး ရှိခဲ့သည်ကို ဥပမာ မပေးသော်ငြား သိနိုင်ပါသည်။ ထို့အတူ စားသုံးသူအခွင့်အရေးသည်လည်း စျေးကွက် လက်ဝါးကြီးအုပ်မှုက ဖုံးလွှမ်းသွားပြီး စားသုံးသူအခွင့်အရေး ဘာရှိသည်ကိုပင် မသိရသည့် အခြေအနေများရှိခဲ့သည်။

စျေးကွက်အတွင်း ပြိုင်ဘက်မရှိဘဲ လိုတရ အခြေအနေများ ပေါ်ပေါက်ခဲ့ခြင်းကြောင့် အခကြေးငွေဖြင့် မိမိဝန်ဆောင်မှု သို့မဟုတ် ထုတ်ကုန်ကို ရယူသုံးစွဲသူတို့အပေါ် အလေးမထား၊ ထိုက်တန်သည့် ဝန်ဆောင်မှုမပေး၊ လျစ်လျူရှု စသည့် အခြေအနေများ အတိတ်သမိုင်းတွင် ရှိခဲ့ပြီးဖြစ်သည်။

ဥပမာအားဖြင့် ၂၀၁၀ မတိုင်မီကာလတွင် မြန်မာနိုင်ငံအတွင်း ဆက်သွယ်ရေးဝန်ဆောင်မှုသည် အလွန်ဆိုးရွားလွန်းသည့် အခြေအနေနှင့် ကြံုခဲ့ပြီး ဒေသတွင်းနိုင်ငံများနှင့် နှိုင်းယှဉ်ပါက လက်ကိုင်ဖုန်းတစ်လုံးကိုင်နိုင်ရေးသည် မြန်မာနိုင်ငံသားတို့အတွက် အိမ်မက်တစ်ခုပင်ဖြစ်ခဲ့သည်ကို အငြင်းပွားဖွယ်ရာ မရှိခဲ့ပါ။

ထိုစဉ်က ဖုန်းကဒ်တစ်ခုအတွက် တန်ဖိုးအားဖြင့်ရာနှင့်ချီသော ဒေါ်လာငွေဖြင့် ပေးဝယ်ရသည့် အခြေအနေတွင် ဖုန်းကဒ် တစ်ခုကို ၁၅၀၀ ဖြင့် ရောင်းချပေးမည့်အကြောင်း ၂၀၁၀ ခုနှစ်တွင် တက်လာသည့် အစိုးရကကြေငြာလိုက်ချင်တွင် ပြည်သူတို့အတွက် အိမ်မက်တခုဖြစ်ခဲ့ရသည်။ ဤသည်က စျေးကွက်ပြိုင်ဆိုင်မှု မရှိခြင်း၊ စျေးကွက် လက်ဝါးကြီးအုပ်ခြင်းတို့၏ အကျိုးဆက်ပင်ဖြစ်သည်။

ယခုမူ မြန်မာ့ ဆက်သွယ်ရေးအခန်းကဏ္ဍသည် တစ်ဆစ်ချိုးပြောင်းလဲလာခဲ့ပြီဖြစ်သည်။ ဆက်သွယ်ရေးအော်ပရေတာ သုံးခုရှိလာပြီဖြစ်သကဲ့သို့ စျေးကွက်အတွင်း ပြိုင်ဆိုင်မှုပြင်းထန်လာပြီး ဝန်ဆောင်မှု ရယူသူများ အနေဖြင့်လည်း အခွင့်အရေး ပိုမိုများပြားလာပြီဖြစ်သည်။ စျေးကွက် ဗျူဟာအရ ဆက်သွယ်ရေးအော်ပရေတာများသည် ပုံစံအမျိုးမျိုးဖြင့် စျေးလျော့ပေးလာသကဲ့သို့ အပိုဆောင်းဝန်ဆောင်မှုကဲ့သို့သော ဝန်ဆောင်မှုပေးကာ စားသုံးသူကိုဆွဲခေါ်လာကြပြီဖြစ်သည်။

ဥပမာအားဖြင့် အူရီဒူးကုမ္ပဏီသည် ပေါင်းကူးဟု အမည်ပေးထားသည့် ဝန်ဆောင်မှုတစ်မျိုးကို မိတ်ဆက်ပေးထားပြီး ပေါင်းကူးဒေတာ 3.5GB ကို ၄၉၉၉ ကျပ်ဖြင့် ရယူသုံးစွဲပါက အပိုဆောင်းဝန်ဆောင်မှု ၅၀ ရာခိုင်နှုန်း ရရှိမည်ဖြစ်သည်။

အဆိုပါ အူရီဒူး၏ ပေါင်းကူးဒေတာဝန်ဆောင်မှုသည် စျေးအသက်သာဆုံးနှင့် မြန်နှုန်းမြင့် အင်တာနက်ကို ရရှိနိုင်သောကြောင့် အသုံးဝင်မည့် မည်သည့် App မျိုးကို မဆိုအလွယ်တကူ   ဒေါင်းလုတ်ရယူနိုင်မည်ဖြစ်သည်။

ဤဥပမာသည် စျေးကွက်ပြိုင်ဆိုင်မှု၏ ကောင်းကျိုးတစ်ခုအဖြစ် ရှုမြင်နိုင်ပြီး စားသုံးသူအခွင့်အရေး တူတူတန်တန် မရှိခဲ့သော မြန်မာနိုင်ငံအတွက် စားသုံးသူအခွင့်အရေးရရှိရန် ပထမခြေလှမ်းဟုလည်း သုံးသပ်ရမည်ဖြစ်သည်။

Mizzima Weekly