မန္တလေး၊ဇူလိုင် ၂၂ ။ ။ မန္တလေးဗဟိုအကျဉ်းထောင်(အိုးဘို)မှ ၂၀၁၇ခုနှစ်တွင် တက္ကသိုလ်ဝင်တန်းအောင်မြင်ခဲ့သည့် ကျောင်းသား၊ကျောင်းသူ ရ ဦးကို မန္တလေးမြို့၊ရတနာပုံတက္ကသိုလ်၌ အဝေးသင် တက်ရောက်သင်ကြားခွင့်ရရှိရန် စီစဉ်ဆောင်ရွက်နေသည်ဟု မန္တလေးဗဟိုအကျဉ်းထောင်(အိုးဘို)မှ ညွှန်ကြားရေးမှူး ဦးချိုဝင်းထွန်းက ပြောသည်။
ဇူလိုင်လ ၂၂ ရက်၊နံနက်ပိုင်းက ပြုလုပ်သည့် စာမေးပွဲအောင်မြင်သည့် ကျောင်းသား၊ ကျောင်းသူများ နှင့် ဆရာ၊ဆရာမများ ဂုဏ်ပြုပွဲအပြီးတွင် မီဒီယာများနှင့်တွေ့ဆုံ၍ ပြောလိုက်ခြင်းဖြစ်သည်။
"ရတနာပုံတက္ကသိုလ်က ဆရာတွေနဲ့တွေ့ဆုံညှိုနှိုင်းမှုတွေလုပ်နေပါတယ်။သူတို့ကလည်း လိုအပ်ရင် ဒီကိုလာသင်ပေးမယ်လို့ပြောပါတယ်။အဝေးသင်မှာရှိတဲ့ မေဂျာတွေပဲ တက်ခွင့်ရမှာပါ။ အဝေးသင်မှာ မရှိတဲ့မေဂျာတွေတော့ တက်ခွင့်ပြုမှာ မဟုတ်ပါဘူး။ သူတို့အတွက် လုံခြံုရေးလည်း ရှိပါတယ်။" ဟု ညွှန်ကြားရေးမှူး ဦးချိုဝင်းထွန်းက ပြောသည်။
မန္တလေးဗဟိုအကျဉ်းထောင်(အိုးဘို)မှ ၃ ဘာသာဂုဏ်ထူးဖြင့် အောင်မြင်သူ တစ်ဦး၊၁ ဘာသာဂုဏ်ထူးဖြင့် အောင်မြင်သူ ၄ ဦးနှင့် ရိုးရိုးဖြင့်အောင်သူ ၂ ဦးရှိခဲ့ပြီး ၎င်းတို့ကို ရတနာပုံတက္ကသိုလ်၌ အဝေးသင် တက်ရောက်ခွင့် ခွင့်ပြုပေးသွားမည်ဖြစ်သည်။
၃ဘာသာဂုဏ်ထူးရှင် မရွှန်းလဲ့ဝေကျော်မှာ စီးပွားရေးတက္ကသိုလ်သို့တက်ရောက်သင်ကြားလိုသည့် ဆန္ဒရှိနေကြောင်း သိရသည်။
၃ဘာသာဂုဏ်ထူးရှင် မရွှန်းလဲ့ဝေကျော်က "သမီးတက်ချင်တာတော့ စီးပွားရေးတက္ကသိုလ်ပါ။အဘ ညွှန်မှူးကတော့ ကြိုးစားပေးမယ်ပြောပါတယ်။တက်ခွင့်ရမယ်လို့ ယုံကြည်ပါတယ်။"ဟု ပြောသည်။
မန္တလေးဗဟိုအကျဉ်းထောင်(အိုးဘို)တွင် ယခုနှစ်တွင်လည်း တက္ကသိုလ်ဝင်တန်းဖြေဆိုရန် စာသင်ကြားနေသူ ၅၂ ဦးရှိနေသည်ဟု ညွှန်ကြားရေးမှူး ဦးချိုဝင်းထွန်းကဆိုသည်။
