တောင်ကုတ်၊ ဇူလိုင်လ ၁၃ ရက်။ ။ ရခိုင်ပြည်နယ် တောင်ကုတ်မြို့နယ် ကင်းတောင်ကျေးရွာတွင် သောင်းနှင့် ချီသည့် စစ်ကျန်ခဲယမ်းများကို ဇူလိုင်လ ၁၂ ရက်နေ့ နံနက်ပိုင်းက တွေ့ရှိခဲ့ကြောင်း သတင်းရရှိသည်။
တောင်ကုတ်မြို့နယ် ကင်းတောင်ကျေးရွာ မူလတန်းစာသင်ကျောင်းနှင့် ကိုက် ၁၀၀ ခန့် ဝေးကွာသော စမ်းချောင်းတွင် လယ်သမားတစ်ဦး ခရုကောက်နေစဉ် ၎င်းကျည်ဟောင်းများကို တွေ့ရှိခဲ့ခြင်းဖြစ်ကြောင်းနှင့် ကျည်ဟောင်းများမှာ ရိုင်ဖယ် သေနတ်ကျည်ဆန်များဖြစ်ကြောင်း တောင်ကုတ်မြို့မရဲစခန်းမှ တပ်ဖွဲ့ဝင်တစ်ဦး က RiA သို့ပြောသည်။
“ တွေ့တာက ကင်းတောင်မှာပါ။ အဲ့ဒီကျည်းဟောင်းတွေကိုက စစ်အကြွင်းကျန်တွေ ထင်ပါတယ်။ ကျည်တွေက ကျိုးပဲ့ ကုန်ပြီ။ ရိုင်ဖယ်ကျည်ဆန်တွေပါ။” ဟု တောင်ကုတ်မြို့မစခန်းမှ ရဲတပ်ဖွဲ့ဝင် တစ်ဦးကပြောသည်။
၎င်းတွေ့ရှိရသည် ကျည်ဆန်ဟောင်းများသည် အင်္ဂလိပ်ခောတ်က ကျန်ရစ်ခဲ့သော ကျည်များဖြစ်နိုင်ချေရှိပြီး၊ တောင်ကုတ်မြို မိုင်းရှာဖွေရေးတပ်မှ လာရောက်သိမ်းဆည်းသွားကြောင်းလည်း ၎င်းက ဖြေဆိုသည်။
“ အဲ့ဒါတွေက အင်္ဂလိပ်ခေတ်တုန်းက ကျန်ခဲ့တာ ထင်တယ်။ ခုတော့ မိုင်းရှာဖွေရေးတပ်က သိမ်းဆည်း သွားပါပြီ။ ကျွန်တော်တို့ရုံးကို ကြေးနန်းလည်း မရောက်သေးပါဘူး။ အဲ့ဒါကြောင့် စုံစုံလင်လင် မသိရသေးပါဘူး။” ဆက်လက်၍ ဖြေဆိုသည်။
ယခုကဲ့သို့ ဆွေးမြေ့ကျည်ဟောင်းများ၊ လက်ပစ်ဗုံးများနှင့် စစ်ကျန်ခဲယမ်းမိးကျောက်များကို ရခိုင်ပြည်နယ်အတွင်းရှိ ကျောက်တော်၊ မြေပုံ စသည့် ဒေသများတွင်လည်း လွန်ခဲ့သော လအနည်းငယ်က တွေ့ရှိရခဲ့ကြောင်းသိရသည်။