နယူးယောက်၊ ဇူလိုင် ၁၁ ။ ။ ဟာဝိုင်ယီစစ်အခြေစိုက်စခန်းမှ အမေရိကန်စစ်သားတစ်ဦးသည် အိုင်အက်စ်ကိုသစ္စာခံပြီး မှတ်တမ်းမှတ်ရာများနှင့် စစ်သင်တန်းလေ့ကျင့်မှုများ ပေးပို့ရန် ကြိုးစားမှုဖြင့် ဖမ်းဆီးစစ်ဆေးလျက်ရှိကြောင်း FBI က ပြောသည်။
အသက် ၃၄ နှစ်ရှိ အီကိုင်းကာကန်းဆိုသူ အမေရိကန်စစ်သားသည် အသွင်ယူအေဂျင့်တစ်ဦး ရှေ့မှောက် အိုင်အက်စ်ခေါင်းဆောင် ဘဂ္ဂဒါဒီအား သစ္စာခံခဲ့မိပြီးနောက် ဇူလိုင် ၈ ရက်တွင် ၎င်းအား ဖမ်းဆီးခဲ့ခြင်းဖြစ်ကြောင်း သိရသည်။
"လက်ရှိအထိတော့ ကန်းဟာ တစ်ကိုယ်တော် ဖြစ်နေသေးတယ်လို့ FBI က ယူဆပါတယ်။ ဟာဝိုင်ယီကို ခြိမ်းခြောက်မယ့် အခြားသူတွေနဲ့ ချိတ်ဆက်မိထားတာ မရှိပါဘူး။"ဟု FBI မှတ်တမ်းဖိုင်က ဖော်ပြသည်။
ကန်း၏ အမူအကျင့်များကို နှစ်အတော်ကြာ သံသယဖြစ်နေခဲ့ခြင်းဖြစ်ကြောင်း သိရသည်။
"သူကို အခြားစစ်သားချင်းအပေါ် သတ်မယ်ဖြတ်မယ် ခြိမ်းခြောက်တဲ့ဖြစ်စဉ်တွေ၊ အိုင်အက်စ်ဖက်က ငြင်းခုံပြောဆိုမှုတွေကြောင့် တပ်တွင်း အပြစ်ပေးမှုတွေ ချမှတ်ခဲ့ရဖူးတယ်။"ဟု မှတ်တမ်းတွင် ဖော်ပြသည်။
ကန်းသည် လေကြောင်းထိန်းချုပ်ရေးအော်ပရေတာအဖြစ် တာဝန်အများဆုံးထမ်းဆောင်ခဲ့ရသူဖြစ်သည်။ ၎င်းသည် အီရတ်တွင် ၂၀၁၀-၁၁ တွင် တစ်နှစ်ခန့် တာဝန်ထမ်းပြီး ၂၀၁၃-၁၄ တွင် အာဖဂန်၌ ကိုးလ တာဝန်ထမ်းခဲ့ဖူးကြောင်း ပင်တဂွန်အရ သိရသည်။
လျှို့ဝှက်အသွင်ယူသတင်းပေးတစ်ဦးကို ကန်းက အော်လန်ဒိုတွင် လူ ၄၉ ဦး သေဆုံးစေသည့် သေနတ်သမား လုပ်ရပ်ကို ၎င်းက လုပ်ဖို့ရှိခဲ့ခြင်းဖြစ်ကြောင်း၊ နောက်ပိုင်း၌လည်း ကမ္ဘာတွင် အမေရိကန်ကသာ တစ်ခုတည်းသော အကြမ်းဖက်အဖွဲ့အစည်းဖြစ်သည်ဟု ပြောဆိုခဲ့ကြောင်း သိရသည်။