မုံရွာ၊ ဇူလိုင် ၉။ ။ ရေဦး-ကလေးဝလမ်း နှင့် ချင်းတွင်းတံတား (ကလေးဝ)တို့တွင် ကျောက်မီးသွေးကားများအား သွားလာခွင့်ပိတ်ပင်ကြောင်း ကလေးဝမြို့နယ် လမ်းဦးစီးဌာနမှ ထုတ်ပြန်ခဲ့သည်။
ကျောက်မီးသွေးကားများနှင့် ကုန်တင်ယာဉ်ကြီးများအား မိုးရာသီအတွင်း သွားလာခွင့်ပိတ်ပင်ခြင်းသည် လမ်းပိုင်းအဆင့်မြှင့်တင်ရန် လိုအပ်နေသဖြင့် ယင်းသို့ပိတ်ပင်ခြင်းဖြစ်ကြောင်း သိရသည်။
ဆောက်လုပ်ရေးဝန်ကြီးဌာန၊ ပြည်ထောင်စုဝန်ကြီး၏ လမ်းညွှန်ချက်အရ ပိတ်ပင်ခြင်းဖြစ်ပြီး ရေဦး-ကလေးဝလမ်းသည် သစ်သားတံတားများရှိနေခြင်းနှင့် ကျောက်လမ်းအဆင့် အမာခံလမ်းအဖြစ် အဆင့်မြှင့်တင်ရန် လိုအပ်နေခြင်းဖြစ်ကြောင်း ကလေးဝမြို့နယ်လမ်းဦးစီးဌာနမှ သိရသည်။
အဆိုပါလမ်းပိုင်းသည် ၁၉ မိုင်ကျော် ရှည်လျားပြီး လမ်းပိုင်းပေါ်ရှိ သစ်သားတံတားများ၏ ခံနိုင်ဝန်မှာ ၂၁ တန်သာဖြစ်ကြောင်း၊ ယင်းထက် တန်ပိုသော ကားများအား မိုးရာသီအတွင်းဖြတ်သန်းခွင့်မပြုကြောင်း ထုတ်ပြန်ချက်တွင် ဖော်ပြထားသည်။
ယခုထုတ်ပြန်ချက်အား ကျောက်မီးသွေးကုမ္ပဏီများမှ အထူးလိုက်နာကြရန်ဖြစ်ပြီး မလိုက်နာပါက ကုမ္ပဏီ၏တာဝန်သာဖြစ်ကြောင်း ထုတ်ပြန်ချက်တွင်ဖြည့််စွက်ဖော်ပြထားသည်။
