ရန်ကုန် ဇွန် ၁၅။ ။ ။ ရှမ်းတိုင်းရင်းသားများ စာပေနှင့်ယဉ်ကျေးမှုကော်မတီ တက္ကသိုလ်များ-မန္တလေးက ရှမ်းရိုးရာယဉ်ကျေးမှုသင်တန်းတစ်ခုကို မန္တလေးမြို့ ၃၅ လမ်း၊ ၆၆ × ၆၇ ကြားတွင် ရှိသည့် ရှမ်းတိုင်းရင်းသားများ သာရေးနာရေးအသင်းဝင်းကြီးတွင် ဖွင့်လှစ်သင်ကြားသွားမည် ဖြစ်ကြောင်းသိရသည်။
“လာမယ့် ဇွန်လ ၂၁ ရက်နေ့မှ ၂၅ ရက်နေ့အထိ ၂၀၁၇ ပညာသင်နှစ် ရှမ်းရိုးရာယဉ်ကျေးမှုသင်တန်း အပတ်စဉ်(၁)ကို ဖွင့်လှစ်သွားပါမယ်။ ရှမ်းရိုးရာအခြေခံကကွက် ၊ အိုးစည်ဗုံမောင်းတီးခတ်ခြင်း၊ တိုးနယားအက နဲ့ ကိန္နရီ၊ ကိန္နရာအကအလှ တို့ကို တောင်ကြီးမြို့မှ ရှမ်းလူငယ်အသင်း(Shan Youth Oaganization – SYO) က လာရောက်သင်ကြား ပေးသွားမှာဖြစ်ပါတယ်’’ ဟု မန္တလာကျောင်း ကိုယ်စားလှယ် နန်းယိင်းဆောဝ်က မဇ္ဈိမသို့ ပြောသည်။
ထို့အတူ ရှမ်းတိုင်းရင်းသားများ စာပေနှင့်ယဉ်ကျေးမှုကော်မတီ တက္ကသိုလ်များ-မန္တလေး၏ ၂၀၁၇-၂၀၁၈ ပညာသင်နှစ် မောင်မယ်သစ်လွင်ကြိုဆိုပွဲနှင့် နောက်ဆုံးနှစ် ကျောင်းသား/ သူများအား နှုတ် ဆက်ပွဲကို ဇူလိုင် ၁ရက်နေ့တွင် ရှမ်းပြည်တောင်ပိုင်း အင်းလေးခေါင်တိုင်တွင် ကျင်းပသွားမည် ဖြစ် ကြောင်း ၎င်းက ဆက်ပြောသည်။
အသင်းဖွဲ့စည်းပုံအရ မန္တလေးရှိ တက္ကသိုလ်/ကောလိပ် အသီးသီးတွင် တက်ရောက်နေသော ရှမ်းလူ ငယ်များသည် ရှမ်းတိုင်းရင်းသားများ စာပေနှင့် ယဉ်ကျေးမှုကော်မတီ တက္ကသိုလ်များ မန္တလေး၏ အဖွဲ့ဝင်အဖြစ် အလိုအလျောက်ဖြစ်ကြောင်း သိရသည်။
ရှမ်းတိုင်းရင်းသားများ စာပေနှင့်ယဉ်ကျေးမှု ကော်မတီ တက္ကသိုလ်များ-မန္တလေးသည် မန္တလေး အတွင်းရှိ ကျောင်းအားလုံးမှ ရှမ်းမိသားစုများနှင့် ဖွဲ့စည်းထားပြီး စာပေနှင့်ယဉ်ကျေးမှု လုပ်ငန်းများကို စဉ်ဆက်မပြတ် လုပ်ဆောင်လာသော အဖွဲ့အစည်းတစ်ခု ဖြစ်ပါသည်။
