ရန်ကုန်၊ ဇွန်လ ၁၃ ။ ။ ရခိုင်ပြည်နယ်၊ မြောက်ဦးမြို့နယ်ရှိ ကျေးရွာများတွင် မုန်တိုင်းငယ်အရှိန်ကြောင့် ဇွန်လ ၁၂ ရက်၊ နံနက် ၉ နာရီက လေပြင်းတိုက်ခိုက်ခဲ့သဖြင့် နေအိမ်တချို့ ပျက်စီးသွားကြောင်း ပြန်ကြားဌာနမှ ဇွန်လ ၁၃ ရက်တွင် သတင်းထုတ်ပြန်သည်။
အဆိုပါ လေပြင်းမှာ မြောက်ဦးမြို့နယ် သံချောင်းကျေးရွာနှင့် ပီပင်ရင်းကျေးရွာများတွင် တိုက်ခိုက်ခဲ့ခြင်းဖြစ်ပြီး ဓနိမိုး၊ ထရံကာ နေအိမ်နှစ်လုံးမှာ လုံးဝပျက်စီးသွားပြီး သွပ်မိုး၊ ထရံကာ နေအိမ်တစ်လုံးနှင့် ဓနိမိုး၊ ထရံကာ နေအိမ်သုံးလုံး အနည်းငယ်ပျက်စီးသွားကြောင်း သိရသည်။
လေပြင်းတိုက်ခိုက်မှုကြောင့် ပျက်စီးသွားသောနေအိမ် ၆ လုံးတွင် နေထိုင်သူ အမျိုးသား ၁၈ ဦး၊ အမျိုးသမီး ၁၃ ဦး စုစုပေါင်း ၃၁ ဦးရှိပြီး ကျေးရွာအုပ်ချုပ်ရေးမှူးနှင့်အဖွဲ့မှ ပြိုကျသွားသော နေအိမ်များအား ရွှေ့ပြောင်းရေး လုပ်ငန်းများဆောင်ရွက်ပေးခဲ့သည်။
မြောက်ဦးခရိုင် ကယ်ဆယ်ရေးနှင့် ပြန်လည်နေရာချထားရေး ဦးစီးဌာနမှလည်း လေဘေးသင့် ပြည်သူ ၃၁ ဦးအတွက် အသုံးအဆောင်ပစ္စည်းများ ထောက်ပံ့ပေးခဲ့ကြောင်းသိရသည်။
