ဇွန်လ ၈ ရက် ။          ။ မြန်မာနိုင်ငံတွင် တရုတ်လုပ် သယ်ယူပို့ဆောင်ရေး လေယာဉ်ပျက်ကျမှုကို မြန်မာလေတပ်က စုံစမ်းစစ်ဆေးရာ၌ အကူအညီပေးသွားရေးအတွက် ပြင်ဆင်နေကြောင်း တရုတ်လေယာဉ်ကုမ္ပဏီကြီးဘက်က ထုတ်ပြန်သည်။

မြိတ်မြို့မှ ရန်ကုန်သို့ ဦးတည်သော တပ်မတော်မှ Y-8F-200W တာဘိုဂျက်လေယာဉ် ပင်လယ်ပြင်အတွင်း ပျက်ကျခဲ့ကြောင်းကို မြန်မာ့တပ်မတော်ထုတ်ပြန်ချက်အရ သိရကြောင်း တရုတ်အမျိုးသားလေယာဉ်နည်းပညာ သွင်းကုန်ထုတ်ကုန် ကော်ပိုရေရှင်း CAITC က ဇွန် ၈ ရက်တွင် ထုတ်ပြန်သည်။

အဆိုပါလေယာဉ်တွင် ကလေးများအပါအဝင် တပ်မတော်အမှုထမ်းများနှင့် ဆွေမျိုးများ လိုက်ပါခဲ့ခြင်းဖြစ်သည်။

ထိုလေယာဉ်မှာ တရုတ်လေကြောင်းစက်မှုကော်ပိုရေးရှင်းပိုင် CAITC ကုမ္ပဏီက ပြီးခဲ့သည့် နှစ်၊ မတ်လအတွင်း မြန်မာလေတပ်ထံ ပေးပို့ခဲ့ခြင်းဖြစ်သည်။

လေယာဉ်ပျက်ကျမှု၌ သေဆုံးမိသားစုများအတွက် ဝမ်းနည်းကြောင်း၊ ပျက်ကျရသည့်အကြောင်း စုံစမ်းရာတွင် မြန်မာနိုင်ငံအား ကူညီသွားမည်ဖြစ်ကြောင်း ကုမ္ပဏီထုတ်ပြန်ချက်တွင် ဖော်ပြသည်။