ဇွန် ၉ ။ ။ ပျက်ကျသွားသော တပ်မတော်ပို့ဆောင်ရေး Y-8 လေယာဉ်အတွက် ယနေ့ ဇွန် ၉ ရက်တွင် ပင်လယ်ပြင်အတွင်း ရာသီဥတုဆိုးရွားနေသော်လည်း ကျွမ်းကျင်သူများနှင့် ဆက်လက်ရှာဖွေနေကြောင်း သိရသည်။
ရှာဖွေရာတွင် တပ်မတော်(ရေ)မှ စစ်ရေယာဉ် ၈ စီးနှင့်အတူ ဒေသခံငါးဖမ်းစက်လှေ ၂၀ စီးတို့ ပူးပေါင်း၍ ဆိုနာစနစ်ဖြင့်လည်းကောင်း၊ ငါးဖမ်းပိုက်များဖြင့် တရွတ်ဆွဲရှာဖွေခြင်းဖြင့်လည်းကောင်း၊ ရှာဖွေကယ်ဆယ်ရေးလုပ်ငန်းများ လုပ်ဆောင်နေသည်။
အလားတူ ပျက်ကျလေယာဉ်အား တပ်မတော်(ရေ) မှ ဆိုနာအသုံးပြု၍ ရှာဖွေခြင်း၊ ကျွမ်းကျင်ရေငုပ် စစ်သည်များဖြင့် ရှာဖွေခြင်းများ ဆက်လက်လုပ်ဆောင်လျက်ရှိသည်ဟု သိရသည်။
ဇွန် ၈ ရက် ည ၇ နာရီအထိ ပင်လယ်ပြင်အတွင်းမှ ရုပ်အလောင်း ၃၁ လောင်း ဆယ်ယူရရှိပြီး ဇွန် ၈ ရက် ညနေ ၆ နာရီ ၄၅ မိနစ်တွင် ထားဝယ်မြို့ရှိ တပ်မတော်ဆေးရုံတွင် လိုအပ်သည့် ဆေးဘက်ဆိုင်ရာစစ်ဆေးမှုများ ဆောင်ရွက်ခဲ့သည်ဟု တပ်မတော်ကာကွယ်ရေးဥးစီးချုပ်ရုံးမှ ထုတ်ပြန်သည်။
အဆိုပါ ရုပ်အလောင်းများအား ဆေးဘက်ဆိုင်ရာ စစ်ဆေးခြင်း၊ သက်ဆိုင်ရာ မိသားစုများက ကြည့်ရှုစစ်ဆေးခြင်းများ ပြုလုပ်ခဲ့ပြီး ရုပ်အလောင်း ၁၆ လောင်းအား ရုပ်အမည် အတည်ပြုနိုင်ခဲ့သည်။ အမျိုးအမည်ခွဲခြားပြီး ရုပ်အလောင်းများကိုလည်း သက်ဆိုင်ရာမိသားစုများရောက်ရှိချိန်တွင် နာရေးကိစ္စများ ဆောင်ရွက်သွားမည်ဖြစ်သည်။
