ဇွန် ၄၊ အင်္ဂလန် ။           ။ အာဆင်နယ်နည်းပြ အာစင်ဝင်းဂါးက လက်စတာတောင်ပံတိုက်စစ်ကစားသမားမာရက်ဇ်ကို စိတ်ဝင်စားသော်လည်း ကမ်းလှမ်းမှု ပြုလုပ်မည် မဟုတ်ကြောင်း ပြောဆိုလိုက်သည်။

အသက် ၂၆ နှစ်အရွယ်ရှိ မာရက်ဇ်သည် ၂၀၁၅-၁၆ ရာသီက လက်စတာအသင်းကို ပရီးမီးယားလိဂ်ချန်ပီယံဖြစ်အောင် အဓိက နေရာမှ စွမ်းဆောင်ပေးခဲ့သူ ဖြစ်သည်။ ၎င်းမှာ လက်စတာအသင်းနှင့် လေးနှစ်သက်တမ်းတိုးစာချုပ် ချုပ်ဆိုထားသူလည်း ဖြစ်သည်။

'မာရက်ဇ်ကို ကျွန်တော်တို့အသင်းက ကမ်းလှမ်းမှုလုပ်မှာလားဆိုတော့။ နိုး..မလုပ်ပါဘူး။ ဒါက ဖြစ်လာနိုင်မယ့် ကိစ္စမဟုတ်ပါဘူး' ဟု အာစင်ဝင်းဂါးက ဆိုသည်။

မာရက်ဇ်သည် ၂၀၁၄ ခုနှစ်က ပြင်သစ်ကလပ် လီဟာဗရီအသင်းမှ လက်စတာသို့ ပေါင် ၄ သိန်းဖြင့် ပြောင်းရွှေ့လာသူဖြစ်ပြီး လက်စတာနှင့် ခြေစွမ်းပြကာ ပီအက်ဖ်အေတစ်နှစ်တာအကောင်းဆုံးကစားသမားဆုကို ရခဲ့သူ ဖြစ်သည်။

'လက်စတာအသင်း ပရီးမီးယားလိဂ်ချန်ပီယံဖြစ်ခဲ့တဲ့ နှစ်ကတော့ သူရဲ့စွမ်းဆောင်မှုက အလွန်ကို ထိရောက်ခဲ့ပါတယ်။ ဒါပေမဲ့ ပြီးခဲ့တဲ့ရာသီတုန်းကတော့ အဲ့ဒီလိုမဟုတ်တော့ပါဘူး။ ဒါက မာရက်ဇ်ရဲ့ အရည်အချင်းတွေ ယုတ်လျော့သွားတယ်လို့ ဆိုလိုတာ မဟုတ်ပါဘူး' ဟု အာစင်ဝင်းဂါးက ဆိုခဲ့သည်။

ရည်ညွှန်း ဘီဘီစီ